Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
4. Channa Vagga

Sutta 85

Suñña Loka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[54]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"'Suñño loko! Suñño loko! ti bhante vuccati.|| ||

Kittāvatā nukho bhante 'suñño loko' ti vuccatī" ti?|| ||

"Yasmā ca kho Ānanda,||
suññaɱ attena vā||
attaniyena vā,||
tasmā 'suñño loko' ti vuccati.|| ||

Kiñca Ānanda, suññaɱ attena vā||
attaniyena vā?|| ||

Cakkhuɱ kho Ānanda, suññaɱ attena vā||
attaniyena vā,||
rūpā suññā attena vā||
attaniyena vā,||
cakkhu-viññāṇaɱ suññaɱ attena vā||
attaniyena vā,||
cakkhu-samphasso suñño attena vā||
attaniyena vā||
yampidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.|| ||

Sotaɱ suññaɱ attena vā||
attaniyena vā,||
saddā suññā attena vā||
attaniyena vā,||
sota-viññāṇaɱ suññaɱ attena vā||
attaniyena vā,||
sota-samphasso suñño attena vā||
attaniyena vā,||
yampidaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.

Ghānaɱ suññaɱ attena vā||
attaniyena vā,||
gandhā suññā attena vā||
attaniyena vā,||
ghāna-viññāṇaɱ suññaɱ attena vā||
attaniyena vā,||
ghāna-samphasso suñño attena vā||
attaniyena vā,||
yampidaɱ ghān-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.

Jivhā suññā attena vā||
attaniyena vā,||
rasā suññā attena vā||
attaniyena vā,||
jivhā-viññāṇaɱ suññaɱ attena vā||
attaniyena vā,||
jivhā-samphasso suñño attena vā||
attaniyena vā,||
yampidaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.

Kāyo suñño attena vā||
attaniyena vā,||
phoṭṭhabbā suññā attena vā||
attaniyena vā,||
kāya-viññāṇaɱ suññaɱ attena vā||
attaniyena vā,||
kāya-samphasso suñño attena vā||
attaniyena vā,||
yampidaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.

Mano suñño attena vā||
attaniyena vā,||
dhammā suññā attena vā||
attaniyena vā,||
mano-viññāṇaɱ suññaɱ attena vā||
attaniyena vā,||
mano-samphasso suñño attena vā||
attaniyena vā,||
yampidaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi suññaɱ attena va attaniyena vā.

Yasmā ca kho Ānanda, suññaɱ attena vā attaniyena vā, tasmā suñño lokoti vuccatī ti.|| ||

 


Contact:
E-mail
Copyright Statement   Webmaster's Page