Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
4. Channa Vagga

Sutta 87

Channa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ bhagavā Rājagahe viharati Veḷuvane Kalandaka nivāpe.|| ||

Tena kho pana samayena āyasmā ca Sāriputto āyasmā ca Mahā Cundo āyasmā ca Channo||
Gijjhakūṭe pabbate viharanti.|| ||

Tena kho pana samayena āyasmā Channo||
ābādhiko hoti dukkhito bāḷhagilāno.

Atha kho āyasmā Sāriputto sāyanhasamayaɱ paṭi- [56] sallānā vuṭṭhito||
yen āyasmā Mahā Cundo tenupasaṅkami.|| ||

Upasaṅkamitvā āyasmantaɱ mahācundaɱ etad avoca:|| ||

"Āyām āvuso Cunda,||
yen āyasmā Channo tenupasaṅkamissāma Gilānapucchakā" ti.|| ||

"Evam āvuso" ti kho āyasmā Mahā Cundo||
āyasmato Sāriputtassa paccassosi.|| ||

Atha kho āyasmā ca Sāriputto āyasmā ca Mahā Cundo||
yen āyasmā Channo tenupasaṅkamiɱsu.|| ||

Upasaṅkamitvā paññatte āsane nisīdiɱsu.|| ||

Nisajja kho āyasmā Sāriputto āyasmantaɱ Channaɱ etad avoca:|| ||

"Kacci te āvuso khamanīyaɱ,||
kacci yāpanīyaɱ,||
kacci dukkhā vedanā||
paṭikkamanti no abhikkamanti,||
paṭikkamosānaɱ paññāyati no abhikkamo" ti?|| ||

"Na me āvuso Sāriputta khamanīyaɱ,||
na yāpanīyaɱ,||
bāḷhā me dukkhā vedanā||
abhikkamanti no paṭikkamanti,||
abhikkamosānaɱ paññāyati no paṭikkamo||
seyyathā pi āvuso balavā puriso tiṇhena sikharena muddhānaɱ abhimantheyya||
evam eva kho āvuso adhimattā vātā muddhānaɱ upahananti.|| ||

Na me āvuso Sāriputta khamanīyaɱ,||
na yāpanīyaɱ,||
bāḷhā me dukkhā vedanā||
abhikkamanti no paṭikkamanti,||
abhikkamosānaɱ paññāyati no paṭikkamo||
seyyathā pi āvuso balavā puriso daḷhena varattakhaṇḍena sīse sīsaveṭhaɱ dadeyya,||
evam eva kho āvuso adhimattā me sīse vedanā.|| ||

Na me āvuso khamanīyaɱ,||
na yāpanīyaɱ,||
bāḷhā me dukkhā vedanā||
abhikkamanti no paṭikkamanti,||
abhikkamosānaɱ paññāyati no paṭikkamo||
seyyathā pi āvuso dakkho goghātako vā||
goghātakantevāsī vā||
tiṇhena govikantanena kucchiɱ parikanenteyya,||
evam eva kho āvuso adhimattā vātā kucchiɱ parikantanti.|| ||

Na me āvuso khamanīyaɱ,||
na yāpanīyaɱ,||
bāḷhā me dukkhā vedanā||
abhikkamanti no paṭikkamanti,||
abhikkamosānaɱ paññāyati no paṭikkamo||
seyyathā pi āvuso dve balavanto purisā dubbalataraɱ purisaɱ nānābāhāsu gahetvā aṅgārakāsuyā santāpeyyuɱ,||
[57] samparitāpeyyuɱ,||
evam eva kho āvuso adhimanto kāyasmiɱ ḍāho.|| ||

Na me āvuso khamanīyaɱ,||
na yāpanīyaɱ,||
bāḷhā me dukkhā vedanā,||
abhikkamanti no paṭikkamanti,||
abhikkamosānaɱ paññāyati no paṭikkamo||
satthaɱ āvuso Sāriputta āharissāmi nāvakaṅkhāmi jīvitan" ti.|| ||

Mā āyasmā Channo satthaɱ āharesi.|| ||

Yāpet āyasmā Channo,||
yāpentaɱ mayaɱ āyasmantaɱ Channaɱ icchāma,||
sace āyasmato Channassa natthi sappāyāni bhojanāni,||
ahaɱ āyasmato Channassa sappāyāni bhojanāni pariyesissāmi,||
sace āyasmato Channassa natthi sappāyāni bhesajjāni,||
ahaɱ āyasmato Channassa sappāyāni bhesajjāni pariyesissāmi,||
sace āyasmato Channassa natthi patirūpā upaṭṭhākā,||
ahaɱ āyasmantaɱ Channaɱ upaṭṭhahissāmi,||
māyasmā Channo satthaɱ āharesi,||
yāpet āyasmā Channo,||
yāpentaɱ mayaɱ āyasmantaɱ Channaɱ icchāmā" ti.|| ||

"Na me āvuso Sāriputta natthi sappāyāni bhojanāni,||
atthi me sappāyāni bhojanāni,||
na pi me natthi sappāyāni bhesajjāni,||
atthi me sappāyāni bhesajjāni,||
na pi me natthi patirūpā upaṭṭhākā,||
atthi me patirūpā upaṭṭhākā.|| ||

Api ca me āvuso satthā pariciṇṇo dīgharattaɱ manāpen'eva no amanāpena,||
etaɱ hi āvuso sāvakassa patirūpaɱ yaɱ satthāraɱ paricareyya manāpen'eva no amanāpena;|| ||

'Taɱ anupavajjaɱ Channo bhikkhu satthaɱ āharissatī' ti|| ||

evam etaɱ āvuso Sāriputta dhārehī" ti.|| ||

 


 

"Puccheyyāma mayaɱ āyasmantaɱ Channaɱ||
kañcīd eva desaɱ,||
sace āyasmā Channo okāsaɱ karoti pañhassa veyyākaraṇāyā" ti.|| ||

[58]"Pucch'āvuso Sāriputta sutvā vedissāmā" ti.|| ||

"Cakkhuɱ āvuso Channa,||
cakkhu-viññāṇaɱ||
cakkhu-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi?|| ||

Sotaɱ āvuso Channa,||
sota-viññāṇaɱ||
sota-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi?|| ||

Ghānaɱ āvuso Channa,||
ghāna-viññāṇaɱ||
ghāna-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi?|| ||

Jivhaɱ āvuso Channa,||
jivhā-viññāṇaɱ||
jivhā-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi?|| ||

Kāyaɱ āvuso Channa,||
kāya-viññāṇaɱ||
kāya-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi?|| ||

Manaɱ āvuso Channa,||
mano-viññāṇaɱ||
mano-viññāṇa-viññātabbe dhamme,|| ||

'Etaɱ mama,||
eso ham asmi,||
eso me attā' ti samanupassasi" ti?|| ||

 


 

"Cakkhuɱ āvuso Sāriputta,||
cakkhu-viññāṇaɱ||
cakkhu-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi.|| ||

Sotaɱ āvuso Sāriputta,||
sota-viññāṇaɱ||
sota-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi.|| ||

Ghānaɱ āvuso Sāriputta,||
ghāna-viññāṇaɱ||
ghāna-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi.|| ||

Jivhaɱ āvuso Sāriputta,||
jivhā-viññāṇaɱ||
jivhā-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi.|| ||

Kāyaɱ āvuso Sāriputta,||
kāya-viññāṇaɱ||
kāya-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi.|| ||

Manaɱ āvuso Sāriputta,||
mano-viññāṇaɱ||
mano-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā' ti samanupassāmi" ti.|| ||

 


 

"Cakkhusmiɱ āvuso Channa,||
cakkhu-viññāṇe,||
cakkhu-viññāṇa-viññātabbesu dhammesu||
kiɱ disvā||
kiɱ abhiññāya||
cakkhuɱ||
cakkhu-viññāṇaɱ||
cakkhu-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

Sotasmiɱ āvuso Sāriputta,||
sota-viññāṇaɱ||
sota-viññāṇa-viññātabbe dhamme:||
kiɱ disvā||
kiɱ abhiññāya||
sotuɱ||
sota-viññāṇaɱ||
sota-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

Ghānasmiɱ āvuso Channa,||
ghāna-viññāṇe,||
ghāna-viññāṇa-viññātabbesu dhammesu||
kiɱ disvā||
kiɱ abhiññāya||
ghānaɱ||
ghāna-viññāṇaɱ||
ghāna-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

Jivhāya āvuso Channa,||
jivha-viññāṇe,||
jivhā-viññāṇa-viññātabbesu dhammesu||
kiɱ disvā||
kiɱ abhiññāya||
jivhaɱ||
jivhā-viññāṇaɱ||
jivhā-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

Kayasmiɱ āvuso Channa,||
kaya-viññāṇe,||
kaya-viññāṇa-viññātabbesu dhammesu||
kiɱ disvā||
kiɱ abhiññāya||
kayaɱ||
kaya-viññāṇaɱ||
kaya-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

Manasmiɱ āvuso Channa,||
mano-viññāṇe,||
mano-viññāṇa-viññātabbesu dhammesu||
kiɱ disvā||
kiɱ abhiññāya||
manaɱ||
mano-viññāṇaɱ||
mano-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassasi?|| ||

 


 

"Cakkhusmiɱ āvuso Sāriputta,||
cakkhu-viññāṇe||
cakkhu-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
cakkhuɱ||
cakkhu-viññāṇaɱ||
cakkhu-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

Sotasmiɱ āvuso Sāriputta,||
sota-viññāṇe||
sota-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
sotaɱ||
sota-viññāṇaɱ||
sota-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

Ghānasmiɱ āvuso Sāriputta,||
ghāna-viññāṇe||
ghāna-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
ghānaɱ||
ghāna-viññāṇaɱ||
ghāna-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

Jivhāya āvuso Sāriputta,||
jivha-viññāṇe||
jivhā-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
jivhaɱ||
jivhā-viññāṇaɱ||
jivhā-viññāṇa-viññātabbe [59] dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

Kāyasmiɱ āvuso Sāriputta,||
kāya-viññāṇe||
kāya-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
kāyaɱ||
kāya-viññāṇaɱ||
kāya-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

Manasmiɱ āvuso Sāriputta,||
mano-viññāṇe||
mano-viññāṇa-viññātabbesu dhammesu||
nirodhaɱ disvā||
nirodhaɱ abhiññāya||
manaɱ||
mano-viññāṇaɱ||
mano-viññāṇa-viññātabbe dhamme:|| ||

"N'etaɱ mama,||
n'eso ham asmi,||
na me so attā" ti samanupassāmi.|| ||

 


 

Evaɱ vutte āyasmā Mahā Cundo āyasmantaɱ Channaɱ etad avoca:|| ||

"Tasmā ti ha āvuso Channa,||
idam pi tassa Bhagavato sāsanaɱ niccakappaɱ sādhukaɱ manasi kātabbaɱ:|| ||

'Nissitassa calitaɱ,||
anissitassa calitaɱ n'atthi,||
calite asati passaddhi hoti,||
passaddhiyā sati nati na hoti,||
natiyā asati āgatigati na hoti,||
āgatigatiyā asati cutupapāto na hoti,||
cut'upapāte asati nevidha na huraɱ||
na ubhayam antarena esevanto dukkhassā' ti.|| ||

Atha kho āyasmā ca Sāriputto||
āyasmā ca Mahā Cundo||
āyasmantaɱ Channaɱ iminā ovādena ovaditvā uṭṭhāy āsanā pakkamiɱsu.|| ||

Atha kho āyasmā Channo acirapakkantesu||
tesu āyasmantesu satthaɱ āharesi.|| ||

Atha kho āyasmā Sāriputto yena bhagavā tenupasaṅkami.|| ||

Upasaṅkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

"Āyasmatā bhante, Channena satthaɱ āharitaɱ,||
tassa kā gati ko abhisamparāyo" ti?|| ||

"Nanu te Sāriputta,||
Channena bhikkhunā sammukhāyeva anupavajjatā khyākatā" ti?|| ||

"Atthi bhante, pubbacīraɱ nāma Vajjigāmo,||
tatth āyasmato Channassa mitta kulāni||
suhajja kulāni||
upavajja kulānī" ti.|| ||

Honti hete Sāriputta,||
Channassa bhikkhuno mitta kulāni||
suhajja kulāni||
upavajjakulāni,||
na kho panāhaɱ Sāriputta,||
[60] ettāvatā:|| ||

'Sa-upavajjo' ti vadāmi.|| ||

Yo kho Sāriputta imañ ca kāyaɱ nikkhipati,||
aññañ ca kāyaɱ upādiyati,||
tam ahaɱ:|| ||

'Sa-upavajjo' ti vadāmi.|| ||

Taɱ Channassa bhikkhuno n'atthi,||
anupavajjaɱ Channena bhikkhunā satthaɱ āharitanti||
evam etaɱ Sāriputta, dhārehī" ti.|| ||

 


Contact:
E-mail
Copyright Statement   Webmaster's Page