Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
5. Saḷa Vagga

Sutta 95

Māluŋkya-putta (Dutiya Saŋgaya) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[72]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

[73] Atha kho āyasmā Māluŋkya-putto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Māluŋkya-putto Bhagavantaɱ etad avoca:|| ||

"Sādhu me bhante, Bhagavā saŋkhittena dhammaɱ desetu||
yam ahaɱ Bhagavato dhammaɱ sutvā||
eko||
vūpakaṭṭho||
appamatto||
ātāpī||
pahit'atto vihareyyan" ti.|| ||

"Ettha dāni Māluŋkya-putta kiɱ dahare bhikkhū vakkhāma,||
yatra hi nāma tvaɱ bhikkhu jiṇṇo vuddho mahallako addhagato vayo anuppatto saŋkhittena ovādaɱ yā casī" ti?|| ||

"Kiñ cā pahaɱ bhante jiṇṇo vuddho mahallako addhagato vayo anuppatto,||
desetu me bhante Bhagavā saŋkhittena dhammaɱ,||
desetu me Sugato saŋkhittena dhammaɱ,||
app'evanāmāhaɱ Bhagavato bhāsitassa atthaɱ ājāneyyaɱ,||
app'evanāmāhaɱ Bhagavato bhāsitassa dāyādo assan" ti.|| ||

"Taɱ kim maññasi Māluŋkya-putta?|| ||

Ye te cakkhu-viññeyyā rūpā adiṭṭhā||
adiṭṭhapubbā,||
na ca passasi,||
na ca te hoti 'Passeyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

Ye te sota-viññeyyā saddā assutā||
a-s-sutapubbā,||
na ca suṇāsi,||
na ca te hoti 'Suṇeyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

Ye te ghāna-viññeyyā gandhā aghāyitā||
aghāyitapubbā,||
na ca sāyasi,||
na ca te hoti 'Ghāyeyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

Ye te jivh-āviññeyyā rasā asāyitā||
asāyitapubbā,||
na ca sāyasi,||
na ca te hoti 'Sāyeyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

Ye te kāya-viññeyyā phoṭṭhabbā asamphuṭṭhā||
asamphuṭṭha-pubbā,||
na ca phusasi,||
na ca te hoti 'Phuseyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

[74] Ye te mano-viññeyyā dhammā aviññātā||
aviññātapubbā,||
na ca vijānāsi,||
na ca te hoti 'Vijāneyyan' ti,||
atthi te tattha chando vā||
rāgo vā||
pemaɱ vā" ti?|| ||

No h'etaɱ bhante.|| ||

Ettha ca te Māluŋkya-putta diṭṭha-suta-muta-viññātabbesu dhammesu diṭṭhe diṭṭha-mattaɱ bhavissati,||
sute suta-mattaɱ bhavissati,||
mute muta-mattaɱ bhavissati,||
viññāte viññāta-mattaɱ bhavissati.|| ||

Yato kho te Māluŋkya-putta diṭṭha-suta-muta-viññātabbesu dhammesu diṭṭhe diṭṭha-mattaɱ bhavissati,||
sute suta-mattaɱ bhavissati,||
mute muta-mattaɱ bhavissati,||
viññāte viññāta-mattaɱ bhavissati||
tato tvaɱ Māluŋkya-putta na tena.|| ||

Yato tvaɱ Māluŋkaputta na tena,||
tato tvaɱ Māluŋkya-putta na tattha.|| ||

Yato tvaɱ Māluŋkya-putta na tattha,||
tato tvaɱ Māluŋakyaputta nevidha||
na huraɱ||
na ubhayamantarena||
esevanto dukkhassā" ti.|| ||

Imassa khvāhaɱ bhante Bhagavatā saŋkhittena bhāsitassa evaɱ vitthārena atthaɱ ājānāmi.|| ||

Rūpaɱ disvā sati muṭṭhā piyanimittaɱ manasi karoto||
Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā rūpasambhavā||
Abhijjhā ca vihesā ca cittamassūpahaññati Evaɱ ācinato dukkhaɱ ārā nibbāṇaɱ vuccati.|| ||

Saddaɱ sutvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā saddasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

[75] Gandhaɱ ghātvā sati muṭṭhā piyaɱ nimittaɱ manasi karoto Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā gandhasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Rasaɱ bhotvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā rasasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Phassaɱ phussa sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā saddasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Dhammaɱ ñatvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā dhammasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Na so rajjati rūpesu rūpaɱ disvā patissato||
Virattacitto vedeti tañ ca nājjhosāya tiṭṭhati.|| ||

Yathāssa passato rūpaɱ sevato cāpi vedanaɱ||
Khīyati nopacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati saddesu saddaɱ sutvā patissato||
Virattacitto vedeti tañ ca nājjhosāya tiṭṭhati.|| ||

Yathāssa suṇato saddaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

[76] Na so rajjati gandhesu gandhaɱ ghātvā patissato||
Virattacitto vedeti tañ ca nājjhosāya tiṭṭhati.|| ||

Yathāssa ghāyato gandhaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati rasesu rasaɱ bhotvā patissato||
Virattacitto vedeti tañ ca nājjhosāya tiṭṭhati.|| ||

Yathāssa sāyato rasaɱ sevato cāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati phassesu phassaɱ phussa patissato||
Virattacitto vedeti tañ ca nājjhosāya tiṭṭhati.|| ||

Yathāssa phusato phassaɱ sevato cāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati dhammesu dhammaɱ ñatvā patissato||
Virattacitto vedeti tañ ca nājjhosāya tiṭṭhati.|| ||

Yathāssa vijānato dhammaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccatī ti.|| ||

Imassa kho haɱ bhante Bhagavatā saŋkhittena bhāsitassa evaɱ vitthārena atthaɱ ājānāmīti.|| ||

"Sādhu sādhu Māluŋkya-putta, sādhu kho tvaɱ Māluŋkya-putta mayā saŋkhittena bhāsitassa vitthārena atthaɱ ājānāsi.|| ||

Rūpaɱ disvā sati muṭṭhā piyanimittaɱ manasi karoto||
Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā rūpasambhavā||
Abhijjhā ca vihesā ca cittamassūpahaññati Evaɱ ācinato dukkhaɱ ārā nibbāṇaɱ vuccati.|| ||

Saddaɱ sutvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā saddasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Gandhaɱ ghātvā sati muṭṭhā piyaɱ nimittaɱ manasi karoto Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā gandhasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Rasaɱ bhotvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā rasasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Phassaɱ phussa sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhosāya tiṭṭhati.|| ||

Tassa vaḍḍhanti vedanā anekā saddasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Dhammaɱ ñatvā sati muṭṭhā piyaɱ nimittaɱ manasi karoto||
Sārattacitto vedeti tañ ca ajjhesāya tiṭṭhati.|| ||

Tassa vaḍḍhanti vedanā anekā dhammasambhavā||
Abhijjhā ca vihesā ca cittamassūpahaññati||
Evaɱ ācinato dukkhaɱ ārā nibbāṇaɱ vuccati.|| ||

Na so rajjati rūpesu rūpaɱ disvā patissato||
Virattacitto vedeti tañ ca nājjhosāya tiṭṭhati.|| ||

Yathāssa passato rūpaɱ sevato cāpi vedanaɱ||
Khīyati nopacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati saddesu saddaɱ sutvā patissato||
Virattacitto vedeti tañ ca nājjhosāya tiṭṭhati.|| ||

Yathāssa suṇato saddaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati gandhesu gandhaɱ ghātvā patissato||
Virattacitto vedeti tañ ca nājjhosāya tiṭṭhati.|| ||

Yathāssa ghāyato gandhaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati rasesu rasaɱ bhotvā patissato||
Virattacitto vedeti tañ ca nājjhosāya tiṭṭhati.|| ||

Yathāssa sāyato rasaɱ sevato cāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

Na so rajjati phassesu phassaɱ phussa patissato||
Virattacitto vedeti tañ ca nājjhosāya tiṭṭhati.|| ||

Yathāssa phusato phassaɱ sevato cāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccati.|| ||

[77] Na so rajjati dhammesu dhammaɱ ñatvā patissato||
Virattacitto vedeti tañ ca nājjhosāya tiṭṭhati.|| ||

Yathāssa vijānato dhammaɱ sevatocāpi vedanaɱ||
Khīyati no pacīyati evaɱ so caratī sato||
Evaɱ apacinato dukkhaɱ santike Nibbānaɱ vuccatī ti.|| ||

Imassa kho Māluŋkya-putta mayā saŋkhittena bhāsitassa evaɱ vitthārena attho daṭṭhabbo" ti.|| ||

Atha kho āyasmā Māluŋkya-putto Bhagavato bhāsitaɱ abhinan'ditvā anumo-ditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho āyasmā Māluŋkya-putto||
eko||
vūpakaṭṭho||
appamatto||
ātāpī||
pahit'atto||
viharanto||
na cirass'eva yass'atthāya kula-puttā samma-d-eva āgārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ,||
nāparaɱ itthattāyā' ti abbhaññāsi.|| ||

Aññataro ca pan'āyasmā Māluŋkya-putto arahataɱ ahosī ti.|| ||

 


Contact:
E-mail
Copyright Statement