Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Dutiya
5. Saḷa Vagga

Sutta 99

Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[80]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Samādhiɱ bhikkhave bhāvetha;||
samāhito bhikkhave bhikkhu yathā-bhūtaɱ pajānāti.|| ||

Kiñca yathā-bhūtaɱ pajānāti?|| ||

'Cakkhuɱ aniccan' ti yathā-bhūtaɱ pajānāti.|| ||

'Rūpā aniccā' ti yathā-bhūtaɱ pajānāti.|| ||

'Cakkhu-viññāṇaɱ aniccan' ti yathā-bhūtaɱ pajānāti.|| ||

'Cakkhu-samphasso anicco' ti yathā-bhūtaɱ pajānāti.|| ||

'Yam pidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi aniccan' ti yathā-bhūtaɱ pajānāti.|| ||

'Sotaɱ aniccan' ti yathā-bhūtaɱ pajānāti.|| ||

'Saddā aniccā' ti yathā-bhūtaɱ pajānāti.|| ||

'Sota-viññāṇaɱ aniccan' ti yathā-bhūtaɱ pajānāti.|| ||

'Sota-samphasso anicco' ti yathā-bhūtaɱ pajānāti.|| ||

'Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tam pi aniccan' ti yathā-bhūtaɱ pajānāti.|| ||

'Ghānaɱ aniccan' ti yathā-bhūtaɱ pajānāti.|| ||

'Gandhā aniccā' ti yathā-bhūtaɱ pajānāti.|| ||

'Ghāna-viññāṇaɱ aniccan' ti yathā-bhūtaɱ pajānāti.|| ||

'Ghāna-samphasso anicco' ti yathā-bhūtaɱ pajānāti.|| ||

'Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tam pi aniccan' ti yathā-bhūtaɱ pajānāti.|| ||

'Jivhā aniccā' ti yathā-bhūtaɱ pajānāti.|| ||

'Rasā aniccā' ti yathā-bhūtaɱ pajānāti.|| ||

'Jivhā-viññāṇaɱ aniccan' ti yathā-bhūtaɱ pajānāti.|| ||

'Jivhā-samphasso anicco' ti yathā-bhūtaɱ pajānāti.|| ||

'Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tam pi aniccan' ti yathā-bhūtaɱ pajānāti.|| ||

'Kāyo anicco' ti yathā-bhūtaɱ pajānāti.|| ||

'Phoṭṭhabbā aniccā' ti yathā-bhūtaɱ pajānāti.|| ||

'Kāya-viññāṇaɱ aniccan' ti yathā-bhūtaɱ pajānāti.|| ||

'Kāya-samphasso anicco' ti yathā-bhūtaɱ pajānāti.|| ||

'Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tam pi aniccan' ti yathā-bhūtaɱ pajānāti.|| ||

'Mano anicco' ti yathā-bhūtaɱ pajānāti.|| ||

'Dhammā aniccā' ti yathā-bhūtaɱ pajānāti.|| ||

'Mano-viññāṇaɱ aniccan' ti yathā-bhūtaɱ pajānāti.|| ||

'Mano-samphasso anicco' ti yathā-bhūtaɱ pajānāti.|| ||

'Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tam pi aniccan' ti yathā-bhūtaɱ pajānāti.|| ||

Samādhiɱ bhikkhave bhāvetha,samāhito bhikkhave bhikkhu yathā-bhūtaɱ pajānātī" ti.|| ||

 


Contact:
E-mail
Copyright Statement