Paṭhama Parijānana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Cakkhuɱ bhikkhave||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Sotaɱ||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Ghānaɱ||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Jivhaɱ||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Kāyaɱ||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Manaɱ||
anabhijānaɱ||
aparijānaɱ||
avirājayaɱ||
appajahaɱ||
abhabbo dukkhakkhayāya.|| ||

Cakkhuñ ca kho bhikkhave||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya.|| ||

Sotaɱ||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya.|| ||

Ghānaɱ||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya.|| ||

Jivhaɱ||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya.|| ||

Kāyaɱ||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya.|| ||

Manaɱ||
abhijānaɱ||
parijānaɱ||
virājayaɱ||
pajahaɱ||
bhabbo dukkhakkhayāya" ti.|| ||