Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
2. Lokakāmaguṇa Vagga

Sutta 116

Paṭhama Loka-Kāma-Guṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[93]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

Bhagavā etad avoca:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Idaɱ vatvā Bhagavā uṭṭhāy āsanā vihāraɱ pāvisi.|| ||

3. Atha kho tesaɱ bhikkhūnaɱ acirapakkantassa Bhagavato etad ahosi:|| ||

"Idaɱ kho no āvuso Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Ko nu kho imassa Bhagavatā saṅkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti?|| ||

Atha kho tesaɱ bhikkhūnaɱ etad ahosi:|| ||

"Ayaɱ kho āyasmā Ānando satthu ceva saɱvaṇṇito,||
sambhāvito ca viññūnaɱ sabrahmacārīnaɱ.|| ||

Pahoti ca āyasmā Ānando imassa Bhagavatā saṅkhittena uddesassa uddiṭṭhassa vitthārena atthaɱ vibhajituɱ. || ||

Yaɱ nūna mayaɱ yenā yasmā Ānando tenupasaṅkameyyāma.|| ||

Upasaṅkamitvā āyasmantaɱ Ānandaɱ etam atthaɱ paṭipuccheyyāmā" ti.|| ||

Atha kho te bhikkhū yenāyasmā Ānando tenupasaṅkamiɱsu.|| ||

Upasaṅkamitvā āyasmatā Ānandena saddhiɱ sammodiɱsu.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū āyasmantaɱ [94] [\q 94/] Ānandaɱ etad avocuɱ:|| ||

"Idaɱ kho no āvuso Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Tesaɱ no āvuso amhākaɱ acirapakkantassa Bhagavato etad ahosi:|| ||

'Idaɱ kho no āvuso Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī' ti.|| ||

Ko nu kho imassa Bhagavatā saṅkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti?|| ||

Atha kho tesaɱ bhikkhūnaɱ etad ahosi:|| ||

"Ayaɱ kho āyasmā Ānando satthu ceva saɱvaṇṇito,||
sambhāvito ca viññūnaɱ sabrahmacārīnaɱ.|| ||

Pahoti ca āyasmā Ānando imassa Bhagavatā saṅkhittena uddesassa uddiṭṭhassa vitthārena atthaɱ vibhajituɱ. || ||

Yannūna mayaɱ yenāyasmā Ānando tenupasaṅkameyyāma.|| ||

Upasaṅkamitvā āyasmantaɱ Ānandaɱ etam atthaɱ paṭipuccheyyāmāti.|| ||

Vibhajatāyasmā Ānando" ti.|| ||

"Seyyathā pi āvuso puriso sāratthiko sāragavesī sārapariyesanaɱ caramāno mahato rukkhassa tiṭṭhato sāravato atikkammeva mūlaɱ atikkamma khandhaɱ sākhāpalāse sāraɱ pariyesitabbaɱ maññeyya evaɱ sampadam idaɱ.|| ||

Āyasmantānaɱ satthari sammukhībhūte taɱ Bhagavantaɱ atisitvā amhe etam atthaɱ paṭipucchitabbaɱ maññatha.|| ||

So āvuso Bhagavā||
jānaɱ jānāti||
passaɱ passati||
cakkhubhūto||
ñāṇabhūto||
dhammabhūto||
brahmabhūto||
vattā pavattā atthassa ninnetā amatassa dātā dhammassāmī Tathāgato.|| ||

So ceva panetassa kālo ahosi,||
yaɱ Bhagavantaɱ yeva etam atthaɱ paṭipucchey- [95] yātha,||
yathā vo Bhagavā vyākareyya tathā taɱ dhāreyyāthā" ti.|| ||

"Addhāvuso Ānanda Bhagavā||
jānaɱ jānāti||
passaɱ passati||
cakkhubhūto||
ñāṇabhūto||
dhammabhūto||
brahmabhūto||
vattā pavattā atthassa ninnetā amatassa dātā dhammassāmī Tathāgato.|| ||

So ceva panetassa kālo ahosi yaɱ Bhagavantaɱ yeva etam atthaɱ paṭipuccheyyāma,||
yathā no Bhagavā vyākareyya tathā naɱ dhāreyyāma.|| ||

Api cāyasmā Ānando satthu ceva saɱvaṇṇito sambhāvito ca viññūnaɱ sabrahmacārīnaɱ,||
pahoti cāyasmā Ānando imassa Bhagavatā saṅkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ,||
vibhajatāyāsmā Ānando agaruɱ karitvā" ti.|| ||

"Tenā hāvuso suṇātha,||
sādhukaɱ manasikarotha,||
bhāsissāmī" ti.|| ||

"Evam āvuso" ti kho te bhikkhū āyasmato Ānandassa paccassosuɱ.|| ||

Āyasmā Ānando etad avoca:|| ||

"Yaɱ kho vo āvuso Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Imassa khvāhaɱ āvuso Bhagavatā saṅkhittena uddesassa uddiṭṭhassa vitthārena atthaɱ avibhattassa evaɱ vitthārena atthaɱ ājānāmi:|| ||

Yena kho āvuso lokasmiɱ lokasaññi hoti lokamānī, ayaɱ vuccati ariyassa vinaye loko. Kena cāvuso lokasmiɱ lokasaññī hoti lokamānī?|| ||

Cakkhunā kho āvuso lokasmiɱ lokasaññi hoti lokamānī,||
sotena kho āvuso lokasmiɱ lokasaññi hoti lokamāni,||
ghānena kho āvuso lokasmiɱ lokasaññi hoti lokamāni,||
jivhāya kho āvuso lokasmiɱ lokasaññi hoti lokamāni,||
kāyena kho āvuso lokasmiɱ lokasaññi hoti lokamānī,||
manena kho āvuso lokasmiɱ lokasaññi hoti lokamānī.|| ||

Yena kho āvuso lokasmiɱ lokasaññī hoti lokamānī||
ayaɱ vuccati ariyassa vinaye loko.|| ||

[96] Yaɱ kho vo āvuso Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Imassa khvāhaɱ āvuso Bhagavatā saṅkhittena uddesassa uddiṭṭhassa vitthārena atthaɱ avibhattassa evaɱ vitthārena atthaɱ ājānāmi.|| ||

Ākaṅkhamānā ca pana tumhe āyasmanto, Bhagavantaɱ yeva upasaṅkamitvā etam atthaɱ paṭipuccheyyātha.|| ||

Yathā vo Bhagavā vyākaroti tathā naɱ dhāreyyāthā" ti.|| ||

"Evam āvuso" ti kho te bhikkhū āyasmato Ānandassa paṭissutavā uṭṭhāy āsanā yena Bhagavā tenupasaṅkamiɱsu,||
upasaṅkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ:|| ||

Yaɱ kho no bhante, Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Tesaɱ no bhante amhākaɱ acirapakkantassa Bhagavato etad ahosi:|| ||

Idaɱ kho no āvuso, Bhagavā saṅkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

"Nāhaɱ bhikkhave gamanena lokassa antaɱ ñāteyyaɱ daṭṭheyyaɱ patteyyan ti vadāmi||
na ca panāhaɱ bhikkhave appatvā lokassa antaɱ dukkhassa antakiriyaɱ vadāmī" ti.|| ||

Ko nu kho imassa Bhagavatā saṅkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti.|| ||

Tesaɱ no bhante amhākaɱ etad ahosi:|| ||

"Ayaɱ [97] kho āyasmā Ānando satthuceva saɱvaṇṇito saɱbhāvito ca viññūnaɱ sabrahmacārīnaɱ,||
pahoti cāyasmā Ānando imassa Bhagavatā saṅkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yenāyasmā Ānando tenupasaṅkameyyāma,||
upasaṅkamitvā āyasmantaɱ Ānandaɱ etam atthaɱ paṭipuccheyyāmāti.|| ||

Atha kho mayaɱ bhante yenāyasmā Ānando tenupasaṅkamimha||
upasaṅkamitvā āyasmantaɱ Ānandaɱ etam atthaɱ paṭipucchimha.|| ||

Tesaɱ no h'etaɱ bhante, āyasmatā Ānandena imehi ākārehi imehi padehi imehi vyañjanehi attho vibhatto" ti.|| ||

Paṇḍito bhikkhave Ānando, mahāpañño bhikkhave Ānando,||
maɱ ce pi tumhe bhikkhave etam atthaɱ paṭipuccheyyātha,||
aham pi ca taɱ evam eva vyākareyyaɱ,||
yathā taɱ Ānandena vyākataɱ.|| ||

Eso ce va tassa attho,||
evaɱ ca taɱ dhāreyyāthā" ti.|| ||

 


Contact:
E-mail
Copyright Statement   Webmaster's Page