Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
2. Lokakāmaguṇa Vagga

Sutta 120

Sāriputta-Saddhi-Vihārika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[103]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Sāriputto Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññataro bhikkhu yenāyasmā Sāriputto ten'upasaṅkami.|| ||

Upasaṅkamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho so bhikkhu āyasmantaɱ Sāriputtaɱ etad avoca:|| ||

"Saddhivihāriko āvuso Sāriputta bhikkhu sikkhaɱ paccakkhāya hīnāyāvatto" ti.|| ||

"Evaɱ etaɱ āvuso hoti indriyesu aguttadvārassa bhojane amattaññūno jāgariyaɱ ananuyuttassa.|| ||

So vatāvuso bhikkhu indriyesu aguttadvāro bhojane amattaññū [104] jāgariyaɱ ananuyutto yāvajīvaɱ paripuṇṇaɱ parisuddhaɱ brahmacariyaɱ santānessatīti netaɱ ṭhānaɱ vijjati.|| ||

So vatāvuso bhikkhu indriyesu guttadvāro bhojane mattaññū jāgariyaɱ anuyutto yāvajīvaɱ paripuṇṇaɱ parisuddhaɱ brahmacariyaɱ santānessatīti ṭhānametaɱ vijjati.|| ||

 


 

Kathañ c'āvuso indriyesu guttadvāro hoti?|| ||

Idh'āvuso, bhikkhu cakkhunā rūpaɱ disvā||
na nimittaggāhī hoti||
nānuvyañjanaggāhī,||
yatodhikaraṇam etaɱ cakkhundriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Sotena saddaɱ sutvā||
na nimittaggāhī hoti||
nānuvyañjanaggāhī,||
yatodhikaraṇam etaɱ sotendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Ghānena gandhaɱ ghāyitvā||
na nimittaggāhī hoti||
nānuvyañjanaggāhī,||
yatodhikaraṇam etaɱ ghāndriyeɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Jivhāya rasaɱ sāyitvā||
na nimittaggāhī hoti||
nānuvyañjanaggāhī,||
yatodhikaraṇam etaɱ jivhendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Kāyena phoṭṭhabbaɱ phusitvā||
na nimittaggāhī hoti||
nānuvyañjanaggāhī,||
yatodhikaraṇam etaɱ kāyendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Manasā dhammaɱ viññāya||
na nimittaggāhī hoti||
nānuvyañjanaggāhī,||
yatodhikaraṇam etaɱ manindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

 


 

Kathañ c'āvuso bhojane mattaññū hoti?|| ||

Idh'āvuso bhikkhu paṭisaṅkhāyoniso āhāraɱ āhāreti,||
n'eva davāya na madāya||
na maṇḍanāya||
na vibhusanāya||
yāvad eva imassa kāyassa ṭhitiyā yāpanāya vihiɱsūparatiyā brahmacariyā-nuggāhāya:|| ||

'Iti purāṇañ ca vedanaɱ paṭihaṅkhāmi||
navañ ca vedanaɱ na uppādessāmi||
yātrā ca me bhavissati||
anavajjatā ca||
phāsuvihāro cā' ti.|| ||

Evaɱ kho āvuso bhojane mattaññū hoti.|| ||

 


 

Kathañ c'āvuso jāgariyaɱ anuyutto hoti?|| ||

Idh'āvuso bhikkhu divasaɱ||
caṅkamena||
nisajjāya||
āvaraṇīyehi dhammehi cittaɱ parisodheti;|| ||

rattiyā paṭhamaɱ yāmaɱ||
caṅkamena||
nisajjāya||
āvaraṇiyehi dhammehi cittaɱ pariso- [105] dheti|| ||

rattiyā majjhamaɱ yāmaɱ dakkhiṇena passena sīhaseyyaɱ kappeti||
pāde pādaɱ||
accādhāya sato sampajāno uṭṭhānasaññaɱ manasikaritvā|| ||

rattiyā pacchimaɱ yāmaɱ paccuṭṭhāya||
caṅkamena||
nisajjāya||
āvaraṇiyehi dhammehi cittaɱ parisodheti.|| ||

Evaɱ kho āvuso jāgariyaɱ anuyutto hoti.|| ||

Tasmā ti āvuso evaɱ sikkhitabbaɱ:|| ||

'Indriyesu guttadvārā bhavissāma bhojane mattaññuno jāgariyaɱ anuyuttā' ti.|| ||

Evaɱ hi vo āvuso sikkhitabban" ti.|| ||

 


Contact:
E-mail
Copyright Statement   Webmaster's Page