Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
3. Gahapati Vagga

Sutta 127

Bhāradvāja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[110]

[1][pts][than][bodh] Evaɱ me sutaɱ:|| ||

Ekaɱ samayaɱ āyasmā Piṇḍāla-Bhāradvājo Kosambiyaɱ viharati Ghositārāme.|| ||

Atha kho Rājā Udeno yenāyasmā Piṇḍāla-Bhāradvājo ten'upasaŋkami.|| ||

Upasaŋkamitvā āyasmatā Piṇḍāla-Bhāradvājena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Rājā Udeno āyasmantaɱ Piṇḍāla-Bhāradvājaɱ etad avoca:|| ||

"Ko nu kho bho Bhāradvāja hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti?|| ||

"Vuttaɱ kho etaɱ Mahārāja tena Bhagavatā jānatā passatā arahatā sammā-sambuddhena:|| ||

'Etha tumhe bhikkhave mātu-mattīsu mātu-cittaɱ upaṭṭhapetha,||
bhagini-mattīsu [111] bhagini-cittaɱ upaṭṭhapetha,||
dhītu-mattīsu dhītu-cittaɱ upaṭṭhapethā' ti.|| ||

Ayaɱ kho Mahārāja hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti.|| ||

 


 

"Lolaɱ kho bho Bhāradvāja cittaɱ,||
appekadā mātumattīsu pi lobhadhammā uppajjanti||
bhaginimattīsu pi lobhadhammā uppajjanti,||
ṭhītumattīsu pi lobhadhammā uppajjanti.|| ||

Atthi nū kho bho Bhāradvāja añño ca hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti?|| ||

"Vuttaɱ kho etaɱ Mahārāja tena Bhagavatā jānatā passatā arahatā sammā-sambuddhena:|| ||

"Etha tumhe bhikkhave imam eva kāyaɱ uddhaɱ pādatalā adho kesamatthakā tacapariyan taɱ pūraɱ nānappakārassa asucino paccavekkhatha.|| ||

Atthī imasmiɱ kāye||
kesā||
lomā||
nakhā||
dantā||
taco||
maɱsaɱ||
nahāru||
aṭṭhi||
aṭṭhimiñjā||
vakkaɱ||
hadayaɱ||
yakanaɱ||
kilomakaɱ||
pihakaɱ||
papphāsaɱ||
antaɱ||
antaguṇaɱ||
udariyaɱ||
karīsaɱ||
pittaɱ||
semhaɱ||
pubbo||
lohitaɱ||
sedo||
medo||
assū||
vasā||
khelo||
siŋghānikā||
lasikā||
muttan' ti.|| ||

Ayam pi kho Mahārāja hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti.|| ||

 


 

"Ye te bho Bhāradvāja bhikkhu||
bhāvita-kāyā||
bhāvita-sīlā||
bhāvita-cittā||
bhāvita-paññā||
tesaɱ taɱ sukaraɱ hoti||
ye ca kho te bho Bhāradvāja bhikkhū||
abhāvita-kāyā||
abhāvita-sīlā||
abhāvita-cittā||
abhāvita-paññā||
tesaɱ taɱ dukkaraɱ hoti.|| ||

Appekadā bho Bhāradvāja:||
'asubhato manasi karissāmā' ti||
subhato vā āgacchati.|| ||

Atthi nū kho bho Bhāradvāja [112] añño ca hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti?|| ||

"Vuttaɱ kho etaɱ Mahārāja tena Bhagavatā jānatā passatā arahatā sammā-sambuddhena|| ||

'Etha tumhe bhikkhave indiyesu guttadvārā viharatha.|| ||

Cakkhunā rūpaɱ disvā||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ cakkhundriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha cakkhundriyaɱ,||
cakkhundriye saɱvaraɱ āpajjatha.|| ||

Sotena saddaɱ sutvā||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ sotendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha sotendriyaɱ,||
sotendriye saɱvaraɱ āpajjatha.|| ||

Ghānena gandhaɱ sāyitvā||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ ghānendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha ghānendriyaɱ,||
ghānendriye saɱvaraɱ āpajjatha.|| ||

Jivhāya rasaɱ sāyitvā||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ jivhendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha jivhendriyaɱ,||
jivhendriye saɱvaraɱ āpajjatha.|| ||

Kāyena phoṭṭhabbaɱ phusitvā||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ kāyendriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha kāyendriyaɱ,||
kāyendriye saɱvaraɱ āpajjatha.|| ||

Manasā dhammaɱ viññāya||
mā nimittaggāhino ahuvattha,||
mā nubyañjanaggāhino,||
yatvādhikaraṇam enaɱ manindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ||
tassa saɱvarāya paṭipajjatha,||
rakkhatha manindriyaɱ,||
manindriye saɱvaraɱ āpajjathā" ti.|| ||

Ayam pi kho Mahārāja hetu||
ko paccayo||
yenime daharā bhikkhū||
susu kāḷakesā bhadrena||
yobbanena samannāgatā||
paṭhamena vayasā anikīḷtāvino kāmesu,||
yāva jīvaɱ paripuṇṇaɱ parisuddhaɱ brahmacariyaɱ caranti,||
addhānañ ca āpādentī" ti.|| ||

 


 

Acchariyaɱ bho Bhāradvāja,||
abbhutaɱ bho Bhāradvāja,||
yāva subhāsitaɱ idaɱ bho Bhāradvāja tena Bhagavatā jānatā passatā arahatā sammā-sambuddhena.|| ||

Esa ce va bho Bhāradvāja hetu esa paccayo yenime daharā bhikkhu susu kāḷakesā bhadrena yobbanena samannāgatā paṭhamena vayasā anikīḷtāvino kāmesu yāva jīvaɱ paripuṇṇaɱ parisuddhaɱ brahmacariyaɱ caranti addhānañ ca āpādentī ti.|| ||

Aham pi bho Bhāradvāja,||
yasmiɱ samaye arakkhite n'eva kāyena ārakkhitāya vācāya ārakkhitena cittena anupaṭṭhitāya satiyā asaɱvutehi indriyehi antepuraɱ pavisāmi||
ativiya maɱ tasmiɱ samaye lobhadhammā parisahanti.|| ||

Yasmiñ ca khvāhaɱ bho Bhāradvāja samaye rakkhitenava kāyena||
rakkhitāya vācāya||
rakkhitena cittena upaṭṭhitāya||
[113] satiyā saɱvutehi indriyehi antepuraɱ pavisāmi na maɱ tattha tasmiɱ samaye lobhadhammā parisahantī.|| ||

Abhikkantaɱ bho Bhāradvāja,||
abhikkantaɱ bho Bhāradvāja,||
seyyathā pi bho Bhāradvāja nikkujjitaɱ vā ukkujjeyya,||
paṭicchannaɱ vā vivareyya,||
mūḷahassa vā maggaɱ ācikkheyya,||
andhakāre vā telapajjotaɱ dhāreyya cakkhumanto rūpāni dakkhintī ti.|| ||

Evam evaɱ bhotā||
bhāradvājena aneka-pariyāyena dhammo pakāsito,||
esāhaɱ bho Bhāradvāja taɱ Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ bhavaɱ Bhāradvājo||
dhāretu ajjatagge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement   Webmaster's Page