Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
3. Gahapati Vagga

Sutta 129

Ghosita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[113]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Ānando Kosambiyaɱ viharati Ghositārāme.|| ||

Atha kho Ghosito gahapati yen'āyasmā Ānando ten'upasaṅkami.|| ||

Upasaṅkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ nisinno kho ghosito gahapati āyasmantaɱ Ānandaɱ etad avoca:|| ||

"'Dhātu-nānattaɱ dhātu- [114] nānattan' ti bhante Ānanda vuccati,||
kittāvatā nu kho bhante dhātu-nānattaɱ vuttaɱ Bhagavatā" ti?|| ||

Saɱvijjati kho gahapati cakkhu-dhātu-rūpā[ed1] ca manāpā,||
cakkhu-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati cakkhu-dhātu-rūpā ca amanāpā,||
cakkhu-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati cakkhu-dhātu-rūpā ca upekhāṭhāniyā,||
cakkhu-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Saɱvijjati kho gahapati sota-dhātu-saddā ca manāpā,||
sota-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati sota-dhātu-saddā ca amanāpā,||
sota-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati sota-dhātu-saddā ca upekhāṭhāniyā,||
sota-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Saɱvijjati kho gahapati ghāna-dhātu-gandhā ca manāpā,||
ghāna-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati ghāna-dhātu-gandhā ca amanāpā,||
ghāna-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati ghāna-dhātu-gandhā ca upekhāṭhāniyā,||
ghāna-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Saɱvijjati kho gahapati jivhā-dhātu-rasā ca manāpā,||
jivhā-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati jivhā-dhātu-rasā ca amanāpā,||
jivhā-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati jivhā-dhātu-rasā ca upekhāṭhāniyā,||
jivhā-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Saɱvijjati kho gahapati kāya-dhātu-phoṭṭhabbā ca manāpā,||
kāya-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati kāya-dhātu-phoṭṭhabbā ca amanāpā,||
kāya-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati kāya-dhātu-phoṭṭhabbā ca upekhāṭhāniyā,||
kāya-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Saɱvijjati kho gahapati mano-dhātu-dhammā ca manāpā,||
mano-viññāṇañ ca,||
sukha-vedanīyaɱ phassaɱ paṭicca uppajjati sukhā-vedanā.|| ||

Saɱvijjati kho gahapati mano-dhātu-dhammā ca amanāpā,||
mano-viññāṇañ ca,||
dukkha-vedanīyaɱ phassaɱ paṭicca uppajjati dukkhā vedanā.|| ||

Saɱvijjati kho gahapati mano-dhātu-dhammā ca upekhāṭhāniyā,||
mano-viññāṇañ ca,||
adukkha-m-asukha-vedanīyaɱ phassaɱ paṭicca uppajjati adukkha-m-asukhā vedanā.|| ||

Ettāvatā kho gahapati dhātu-nānattaɱ vuttaɱ Bhagavatā" ti.|| ||

 


[ed1] BJT and CSCD have cakkhudhatu, rupa ca manapa, cakkhuviññaṇañca sukhavedaniya and the like for the rest. The PTS pali does not hyphinate the compounds, e.g.: cakkhudhāturūpā.

 


Contact:
E-mail
Copyright Statement   Webmaster's Page