Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
4. Devadaha Vagga

Sutta 134

Devadahakhaṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[124]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā sakkesu viharati devadahaɱ nāma Sakyānaɱ nigamo.|| ||

Tatra kho Bhagavā bhikkhū āmantesi:|| ||

Nāhaɱ bhikkhave sabbesaɱ yeva bhikkhūnaɱ chasu phassāyata- [125] nesu appamādena karaṇīyan ti vadāmi.|| ||

Na ca panāhaɱ bhikkhave sabbesaɱ yeva bhikkhūnaɱ chasu phassāyatanesu nāppamādena karaṇīyan ti vadāmi.|| ||

Ye te bhikkhave bhikkhū arahanto khīṇāsavā vusitavanno katakaraṇīyā ohitabhārā anuppattasadatthā parikkhiṇa-bhava-saŋyojanā sammadaññā vimuttā,||
tesāhaɱ bhikkhave bhikkhūnaɱ chasu phassāyatanesu nāppamādena karaṇīyan ti vadāmi.|| ||

Taɱ kissa hetu?|| ||

Kataɱ tesaɱ appamādena,||
abhabbā te pamajjituɱ.|| ||

Ye ca kho te bhikkhave bhikkhū sekhā appattamānasā anuttaraɱ yogakkhemaɱ patthayamānā viharanti,||
tesāhaɱ bhikkhave bhikkhūnaɱ chasu phassāyatanesu appamādena karaṇīyanti vadāmi.|| ||

Taɱ kissa hetuɱ.|| ||

Santi bhikkhave cakkhu-viññeyyā rūpā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

Santi bhikkhave sota-viññeyyā saddā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

Santi bhikkhave ghāna-viññeyyā gandhā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

Santi bhikkhave jivhā-viññeyyā rasā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

Santi bhikkhave kāya-viññeyyā phoṭṭhabbā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

Santi bhikkhave mano-viññeyyā dhammā manoramā pi amanoramā pi,||
tyāssa phussa phussa cittaɱ na pariyādāya tiṭṭhanti.|| ||

Cetaso apariyādānā āraddhaɱ hoti viriyaɱ asallīnaɱ,||
upaṭṭhitā sati asammuṭṭhā,
passaddho kāyo asāraddho,||
samāhitaɱ cittaɱ ekaggaɱ.|| ||

Imaɱ khvāhaɱ bhikkhave appamādaphalaɱ sampassamāno tesaɱ bhikkhūnaɱ chasu phassāyatanesu appamādena karaṇīyan ti vadāmi.|| ||

 


Contact:
E-mail
Copyright Statement   Webmaster's Page