Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
4. Devadaha Vagga

Sutta 135

Khaṇa (aka Saŋgayha) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā sakkesu viharati devadahaɱ nāma Sakyānaɱ nigamo.|| ||

Tatra kho Bhagavā bhikkhū āmantesi:|| ||

Lābhā vo bhikkhave,||
suladdhaɱ vo bhikkhave,||
khaṇo vo paṭiladdho brahmacariyāvāsāya.|| ||

Diṭṭhā mayā bhikkhave cha phassāyatanikā nāma nirayā.|| ||

Tattha yaɱ kiñci cakkhunā rūpaɱ passati||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Yaɱ kiñci sotena saddaɱ suṇāti||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Yaɱ kiñci ghānena gandhaɱ ghāyati||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Yaɱ kiñci jivhāya rasaɱ sāyati||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Yaɱ kiñci kāyena phoṭṭhabbaɱ phusati||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Yaɱ kiñci manasā dhammaɱ vijānāti||
aniṭṭharūpaɱ yeva passati no iṭṭharūpaɱ||
akantarūpaɱ yeva passati no kantarūpaɱ||
amanāparūpaɱ yeva passati no manāparūpaɱ.|| ||

Lābhā vo bhikkhave,||
suladdhaɱ vo bhikkhave,||
khaṇo vo paṭiladdho brahmacariyavāsāya.|| ||

 


 

Diṭṭhā mayā bhikkhave cha phassāyatanikā nāma saggā.|| ||

Tattha yaɱ kiñci cakkhunā rūpaɱ passati||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Yaɱ kiñci sotena saddaɱ suṇāti||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Yaɱ kiñci ghānena gandhaɱ ghāyati||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Yaɱ kiñci jivhāya rasaɱ sāyati||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Yaɱ kiñci kāyena phoṭṭhabbaɱ phusati||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Yaɱ kiñci manasā dhammaɱ vijānāti||
iṭṭharūpaɱ yeva passati no aniṭṭharūpaɱ,||
kantarūpaɱ yeva passati no akantarūpaɱ,||
manāparūpaɱ yeva passati no amanāparūpaɱ.|| ||

Lābhā vo bhikkhave,||
suladdhaɱ vo bhikkhave,||
khaṇo vo paṭiladdho brahmacariyavāsāyā" ti.|| ||

 


Contact:
E-mail
Copyright Statement   Webmaster's Page