Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
5. Navapurāṇa Vagga

Sutta 145

Kamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[132]

[1][pts][than][bodh][olds] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

Bhagavā etad avoca:|| ||

"Nava-purāṇāni bhikkhave, kammāni desissāmi,||
kamma-nirodhañ ca,||
kamma-nirodha-gāminiñ ca paṭipadaɱ.|| ||

Taɱ suṇātha,||
sādhukaɱ manasikarotha,||
bhāsissāmīti.|| ||

Katamañ ca bhikkhave purāṇaɱ kammaɱ:|| ||

Cakkhuɱ bhikkhave purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Sotaɱ purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Ghānaɱ purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Jivhā purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Kāyo purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Mano purāṇaɱ kammaɱ||
abhisaŋkhataɱ||
abhisañcetayitaɱ vedanīyaɱ daṭṭhabbaɱ.|| ||

Idaɱ vuccati bhikkhave, purāṇaɱ kammaɱ.|| ||

 


 

Katamañ ca bhikkhave navaɱ kammaɱ?|| ||

Yaɱ kho bhikkhave etarahi kammaɱ||
karoti kāyena, vācāya manasā.|| ||

Idaɱ vuccati bhikkhave navaɱ kammaɱ.|| ||

 


 

Katamo ca bhikkhave kamma-nirodho?|| ||

Yo kho bhikkhave kāya-kamma vacī-kamma mano-kammassa nirodhā [138] vimuttiɱ phusati.|| ||

Ayaɱ vuccati bhikkhave, kamma-nirodho.|| ||

 


 

Katamā ca bhikkhave kamma-nirodha-gāminī paṭipadā?

Syam'eva ariyo aṭṭhaŋgiko maggo.|| ||

Seyyathīdaɱ:||
sammā-diṭṭhi||
sammā-saŋkappo||
sammā-vācā||
sammā-kammānto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaɱ vuccati bhikkhave kamma-nirodha-gāminī paṭipadā.|| ||

 


 

Iti kho bhikkhave desitaɱ vo mayā purāṇaɱ kammaɱ||
desitaɱ navaɱ kammaɱ,||
desito kamma-nirodho,||
desitā kamma-nirodha-gāminī paṭipadā.|| ||

Yaɱ vo bhikkhave, satthārā karaṇīyaɱ sāvakānaɱ||
hitesinā||
anukampakena||
anukampaɱ upādāya,||
kataɱ vo taɱ mayā.|| ||

Etāni bhikkhave rukkhamūlāni.|| ||

Etāni suññāgārāni|| ||

Jhāyatha bhikkhave|| ||

Mā pamādattha|| ||

Mā pacchā vippaṭisārino ahuvattha|| ||

Ayaɱ vo amhākaɱ anusāsanī" ti.

 


Contact:
E-mail
Copyright Statement   Webmaster's Page