Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsaka Tatiya
5. Navapurāṇa Vagga

Sutta 151

Kim Atthiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[138]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

Bhagavā etad avoca:|| ||

"Sace vo bhikkhave, aññatitthiyā paribbājakā||
evaɱ puccheyyuɱ:|| ||

'Kim atthi yaɱ āvuso||
samaṇe Gotame brahmacariyaɱ vussatī' ti?|| ||

Evaɱ puṭṭhā tumhe bhikkhave,||
tesaɱ aññatitthiyānaɱ paribbājakānaɱ||
evaɱ vyākareyyātha:|| ||

'Dukkhassa kho āvuso pariññāya||
Bhagavati brahmacariyaɱ vussatī' ti.|| ||

Sace pana vo bhikkhave,||
aññatitthiyā paribbājakā||
evaɱ puccheyyuɱ:|| ||

'Katamaɱ pana taɱ āvuso dukkhaɱ yassa pariññāya||
samaṇe Gotame brahmacariyaɱ vussatī' ti?|| ||

Evaɱ puṭṭhā tumhe bhikkhave,||
tesaɱ aññatitthiyānaɱ paribbājakānaɱ||
evaɱ vyākareyyātha:|| ||

Cakkhuɱ kho āvuso dukkhaɱ,||
tassa pariññāya Bhagavati brahmacariyaɱ vussati.|| ||

Rūpā dukkhā,||
tesaɱ pariññāya Bhagavati brahmacariyaɱ vussati.|| ||

Cakkhu-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Cakkhu-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ cakkhu-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Sotaɱ dukkhaɱ,||
tassa pariññāya Bhagavati brahmacariyaɱ vussati.|| ||

Saddā dukkhā,||
tassa pariññāya Bhagavati brahmacariyaɱ vussati.|| ||

Sota-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Sota-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ sota-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Ghānaɱ dukkhaɱ,||
tassa pariññāya Bhagavati brahmacariyaɱ vussati.|| ||

Gandhā dukkhā,||
tassa pariññāya Bhagavati brahmacariyaɱ vussati.|| ||

Ghāna-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Ghāna-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ ghāna-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Jivhā dukkhā,||
tassa pariññāya Bhagavati brahmacariyaɱ vussati.|| ||

Rasā dukkhā,||
tassa pariññāya Bhagavati brahmacariyaɱ vussati.|| ||

Jivhā-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Jivhā-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ jivhā-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Kāyo dukkho,||
tassa pariññāya Bhagavati brahmacariyaɱ vussati.|| ||

Phoṭṭhabbā dukkhā,||
tassa pariññāya Bhagavati brahmacariyaɱ vussati.|| ||

Kāya-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Kāya-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ kāya-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Mano dukkho,||
tassa pariññāya Bhagavati brahmacariyaɱ vussati.|| ||

Dhammā dukkhā,||
tassa pariññāya Bhagavati brahmacariyaɱ vussati.|| ||

Mano-viññāṇaɱ dukkhaɱ,||
tassa pariññāya Bhagavati brahmacariyaɱ vussati.|| ||

Mano-samphasso dukkho,||
tassa pariññāya Bhagavati brahmacariyaɱ vussati.|| ||

Yam pidaɱ mano-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā,||
tam pi dukkhaɱ||
tassa pariññāya Bhagavati brahmacariyaɱ vussati.|| ||

Idaɱ kho āvuso dukkhaɱ yassa pariññāya||
Bhagavati brahmacariyaɱ vussatī ti.|| ||

Evaɱ puṭṭho tumhe bhikkhave,||
tesaɱ aññatitthiyānaɱ paribbājakānaɱ||
evaɱ vyākareyyathā" ti.|| ||

 


Contact:
E-mail
Copyright Statement   Webmaster's Page