Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsaɱ Catutthaɱ
1. Nandikkhaya Vagga

Sutta 159

Jīvakambavane aka Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati jīvakambavane.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Samādhiɱ bhikkhave bhāvetha,||
samāhitassa bhikkhave [144] bhikkhuno yathā-bhūtaɱ okkhāyati.|| ||

Kiñ ca yathā-bhūtaɱ okkhāyati?|| ||

Cakkhuɱ aniccanti yathā-bhūtaɱ okkhāyati,||
rūpā aniccāti yathā-bhūtaɱ okkhāyati,||
cakkhu-viññāṇaɱ aniccanti yathā-bhūtaɱ okkhāyati,||
cakkhu-samphasso aniccoti yathā-bhūtaɱ okkhāyati,||
yam pidaɱ cakkhu-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyati.|| ||

Sotaɱ aniccanti yathā-bhūtaɱ okkhāyati,||
saddā aniccāti yathā-bhūtaɱ okkhāyati,||
sota-viññāṇaɱ aniccanti yathā-bhūtaɱ okkhāyati,||
sota-samphasso aniccoti yathā-bhūtaɱ okkhāyati,||
yam pidaɱ sota-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyati.|| ||

Ghānaɱ aniccanti yathā-bhūtaɱ okkhāyati,||
gandhā aniccāti yathā-bhūtaɱ okkhāyati,||
ghāna-viññāṇaɱ aniccanti yathā-bhūtaɱ okkhāyati,||
ghāna-samphasso aniccoti yathā-bhūtaɱ okkhāyati,||
yam pidaɱ ghāna-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyati.|| ||

Jivhā aniccanti yathā-bhūtaɱ okkhāyati,||
rasā aniccāti yathā-bhūtaɱ okkhāyati,||
jivhā-viññāṇaɱ aniccanti yathā-bhūtaɱ okkhāyati,||
jivhā-samphasso aniccoti yathā-bhūtaɱ okkhāyati,||
yam pidaɱ jivhā-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyati.|| ||

Kāyo aniccoti yathā-bhūtaɱ okkhāyati,||
phoṭṭhabbā aniccāti yathā-bhūtaɱ okkhāyati,||
kāya-viññāṇaɱ aniccanti yathā-bhūtaɱ okkhāyati,||
kāya-samphasso aniccoti yathā-bhūtaɱ okkhāyati,||
yam pidaɱ kāya-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyati.|| ||

Mano aniccoti yathā-bhūtaɱ okkhāyati,||
dhammā aniccāti yathā-bhūtaɱ okkhāyati,||
mano-viññāṇaɱ aniccanti yathā-bhūtaɱ okkhāyati,||
mano-samphasso aniccoti yathā-bhūtaɱ okkhāyati,||
yam pidaɱ mano-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccanti yathā-bhūtaɱ okkhāyatī" ti.|| ||

"Samādhiɱ bhikkhave bhāvetha,||
samāhitassa bhikkhave bhikkhuno yathā-bhūtaɱ okkhāyati.|| ||

 


Contact:
E-mail
Copyright Statement