Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
35: Saḷāyatana Saɱyutta
Paññāsaɱ Catutthaɱ
1. Nandikkhaya Vagga

Sutta 162

Koṭṭhita Dukkha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Jīvakambavane.|| ||

Atha kho āyasmā Mahākoṭṭhito yena Bhagavā ten'upasaŋkami, upasaŋkamitvā Bhagavantaɱ abhivādetvā eka-m-antaɱ nisīdi.

Eka-m-antaɱ nisinno kho āyasmā Mahākoṭṭhito Bhagavantaɱ etad avoca:|| ||

"Sādhu me bhante, Bhagavā saŋkhittena dhammaɱ desetu||
yamahaɱ Bhagavato dhammaɱ sutvā||
eko||
vūpakaṭṭho||
appamatto||
ātāpi||
pahitatto vihareyyan"ti.|| ||

"Yaɱ kho Koṭṭhika dukkhaɱ,||
tatra te chando pahātabbo|| ||

Kiñca Koṭṭhika dukkhaɱ?|| ||

Cakkhuɱ kho Koṭṭhika dukkhaɱ, tatra te chando pahātabbo.|| ||

Rūpā dukkhā, tatra te chando pahātabbo.|| ||

Cakkhuviññāṇaɱ dukkhaɱ tatra te chando pahātabbo.|| ||

Cakkhu-samphasso dukkho, tatra te chando pahātabbo.|| ||

Yam pidaɱ cakkhu-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Sotaɱ kho Koṭṭhika dukkhaɱ, tatra te chando pahātabbo.|| ||

Saddā dukkhā, tatra te chando pahātabbo.|| ||

Sotaviññāṇaɱ dukkhaɱ tatra te chando pahātabbo.|| ||

Sotasamphasso dukkho, tatra te chando pahātabbo.|| ||

Yampidaɱ sota-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Ghānaɱ kho Koṭṭhika dukkhaɱ, tatra te chando pahātabbo.|| ||

Gandhā dukkhā, tatra te chando pahātabbo.|| ||

Ghānaviññāṇaɱ dukkhaɱ tatra te chando pahātabbo.|| ||

Ghāna samphasso dukkho, tatra te chando pahātabbo.|| ||

Yampidaɱ ghāna-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Jivhā kho Koṭṭhika dukkhā, tatra te chando pahātabbo.|| ||

Rasā dukkhā, tatra te chando pahātabbo.|| ||

Jivhāviññāṇaɱ dukkhaɱ tatra te chando pahātabbo.|| ||

Jivhāsamphasso dukkho, tatra te chando pahātabbo.|| ||

Yam pidaɱ jivhā-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Kāyo kho Koṭṭhika dukkho, tatra te chando pahātabbo.|| ||

Phoṭṭhabbā dukkhā, tatra te chando pahātabbo.|| ||

Kāyaviññāṇaɱ dukkhaɱ tatra te chando pahātabbo.|| ||

Kāyasamphasso dukkho, tatra te chando pahātabbo.|| ||

Yam pidaɱ kāyas-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Mano kho Koṭṭhika dukkho, tatra te chando pahātabbo.|| ||

Dhammā dukkhā, tatra te chando pahātabbo.|| ||

Manoviññāṇaɱ dukkhaɱ tatra te chando pahātabbo.|| ||

Manosamphasso dukkho, tatra te chando pahātabbo.|| ||

Yam pidaɱ mano-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi dukkhaɱ,||
tatra te chando pahātabbo.|| ||

Yaɱ kho Koṭṭhika, dukkhaɱ, tatra te chando pahātabboti.|| ||

 


Contact:
E-mail
Copyright Statement   Webmaster's Page