Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
3. Samudda Vagga

Sutta 187

Paṭhama Samudda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[157]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"'Samuddo! Samuddo!' ti bhikkhave||
assutavā puthujjano bhāsati||
neso bhikkhave ariyassa vinaye samuddo,||
mahā eso bhikkhave udakarāsi,||
mahā udakaṇṇavo.|| ||

Cakkhu bhikkhave purisassa samuddo,||
tassa rūpamayo vego.|| ||

Yo taɱ rūpa-mayaɱ vegaɱ sahati,||
ayaɱ vuccati bhikkhave atari||
cakkhu samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Sotaɱ bhikkhave purisassa samuddo,||
tassa saddamayo vego.|| ||

Yo taɱ sadda-mayaɱ vegaɱ sahati,||
ayaɱ vuccati bhikkhave atari||
sota samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Ghānaɱ bhikkhave purisassa samuddo,||
tassa gandhamayo vego.|| ||

Yo taɱ gandha-mayaɱ vegaɱ sahati,||
ayaɱ vuccati bhikkhave atari||
ghāna samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Jivhā bhikkhave purisassa samuddo,||
tassa rasamayo vego.|| ||

Yo taɱ rasa-mayaɱ vegaɱ sahati,||
ayaɱ vuccati bhikkhave atari||
jivhā samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Kāyaɱ bhikkhave purisassa samuddo,||
tassa phoṭṭhabbamayo vego.|| ||

Yo taɱ phoṭṭhabba-mayaɱ vegaɱ sahati,||
ayaɱ vuccati bhikkhave atari||
kāyo samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Mano bhikkhave purisassa samuddo,||
tassa dhammamayo vego.|| ||

Yo taɱ dhamma-mayaɱ vegaɱ sahati,||
ayaɱ vuccati bhikkhave atari||
mano samuddaɱ saūmiɱ sāvaṭṭaɱ sagāhaɱ sarakkhasaɱ tiṇṇo pāragato thale tiṭṭhati brāhmaṇo.|| ||

Yo imaɱ samuddaɱ sagāhaɱ sarakkhasaɱ||
saūmibhayaɱ duttaraɱ accatari||
Sa vedagū vusitabrahmacariyo||
Lokantagū pāragato ti vuccatī" ti.|| ||

 


Contact:
E-mail
Copyright Statement   Webmaster's Page