Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
3. Samudda Vagga

Sutta 191

Koṭṭhiko

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][ati][bd] Evaɱ me sutaɱ:|| ||

Ekaɱ samayaɱ āyasmā ca Sāriputto āyasmā ca Mahā-Koṭṭhiko Bārāṇasiyaɱ viharanti||
Isipatane Migadāye.|| ||

[2] Atha kho āyasmā Mahā-Koṭṭhiko sāyaṇhasamayaɱ paṭisallāṇā vuṭṭhito yen āyasmā Sāriputto ten'upasaŋkami.|| ||

Upasaŋkamitvā āyasmatā Sāriputto saddhiɱ sammodi,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

[3] Eka-m-antaɱ nisinno kho āyasmā Mahā-Koṭṭhiko āyasmantaɱ Sāriputto etad avoca:|| ||

"Kin nu kho āvuso Sāriputto||
cakkhu rūpānaɱ saŋyojanaɱ rūpā cakkhussa saŋyojanaɱ?

Sotaɱ saddānaɱ saŋyojanaɱ||
saddā sotassa saŋyojanaɱ?

Ghānaɱ gandhānaɱ saŋyojanaɱ||
gandhā ghānassa saŋyojanaɱ?

Jivhā rasānaɱ saŋyojanaɱ||
rasā jivhāya [163] saŋyojanaɱ?

Kāyo phoṭṭhabbānaɱ saŋyojanaɱ||
phoṭṭhabbā kāyassa saŋyojanaɱ?

Mano dhammānaɱ saŋyojanaɱ||
dhammā manassa saŋyojanan" ti?|| ||

[4] "Na kho āvuso Koṭṭhiko,||
cakkhu rūpānaɱ saŋyojanaɱ,||
na rūpā cakkhussa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Sota saddānaɱ saŋyojanaɱ,||
na saddā sotassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Ghāna ghandhānaɱ saŋyojanaɱ,||
na gandhā ghānassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Jivhā rasānaɱ saŋyojanaɱ,||
na rasā jivhāya saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Kāyo phoṭṭhabbānaɱ saŋyojanaɱ,||
na phoṭṭhabbā kāyassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Mano dhammānaɱ saŋyojanaɱ,||
na dhammā manassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

[5] Seyyathā pi āvuso kāḷo ca balivaddo||
odāto ca balivaddo||
ekena dāmena vā||
yottena vā saɱyuttāassu.|| ||

Yo nu kho evaɱ vadeyya:||
kāḷo balivaddo odātassa balivaddassa saŋyojanaɱ,||
odāto balivaddo kāḷassa balivaddassa saŋyojanan ti||
sammā nu kho so vadamāno vadeyyā" ti?|| ||

"No h'etaɱ āvuso."|| ||

"Na kho āvuso kāḷo balivaddo||
odātassa balivaddassa saŋyojanaɱ,||
na pi odāto balivaddo kāḷassa||
balivaddassa saŋyojanaɱ,||
yena ca kho te ekena dāmena vā||
yottena vā saɱyuttā,||
taɱ tattha saŋyojanaɱ.|| ||

Evam eva kho āvuso na cakkhu rūpānaɱ saŋyojanaɱ,||
na rūpā cakkhussa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na sotaɱ saddānaɱ saŋyojanaɱ,||
na saddā sotassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na ghānaɱ gandhānaɱ saŋyojanaɱ,||
na gandhā ghānassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na jivhā rasānaɱ saŋyojanaɱ,||
na rasā jivhāya saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na kayo phoṭṭhabbānaɱ saŋyojanaɱ,||
na phoṭṭhabbā kāyassa saŋyojanaɱ.|| ||

Yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na mano dhammānaɱ saŋyojanaɱ,||
na dhammā manassa saŋyojanaɱ.|| ||

Yaṇ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

 


 

[6] Cakkhuɱ vā āvuso rūpānaɱ saŋyojanaɱ abhavissa,||
rūpā vā cakkhussa saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na cakkhu rūpānaɱ saŋyojanaɱ||
na rūpā cakkhussa [164] saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

Sotaɱ vā āvuso saddānaɱ saŋyojanaɱ abhavissa,||
saddā vā sotassa saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na sota saddānaɱ saŋyojanaɱ||
na saddā sotassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

Ghānaɱ vā āvuso gandhānaɱ saŋyojanaɱ abhavissa,||
gandhā vā ghānassa saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na ghānaɱ gandhānaɱ saŋyojanaɱ||
na gandhā ghānassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

Jivhā vā āvuso rasānaɱ saŋyojanaɱ abhavissa,||
rasā vā jivhāya saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na jivhā rasānaɱ saŋyojanaɱ||
na rasā jivhāya saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

Kāyo vā āvuso phoṭṭhabbānaɱ saŋyojanaɱ abhavissa,||
phoṭṭhabbā vā kāyassa saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na kāyo phoṭṭhabbānaɱ saŋyojanaɱ||
na phoṭṭhabbā kāyassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

Mano vā āvuso dhammānaɱ saŋyojanaɱ abhavissa,||
dhammā vā manassa saŋyojanaɱ,||
na idaɱ brahmacariyavāso paññāyetha sammā dukkhakkhayāya.|| ||

Yasmā ca kho āvuso||
na mano dhammānaɱ saŋyojanaɱ||
na dhammā manassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ,||
tasmā brahmacariyavāso paññāyati sammā dukkhayāya.|| ||

 


 

[7] Iminā petaɱ āvuso pariyāyena veditabbaɱ:||
yathā na cakkhu rūpānaɱ saŋyojanaɱ,||
na rūpā cakkhussa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na sota saddānaɱ saŋyojanaɱ,||
na saddā sotassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na ghāna gandhānaɱ saŋyojanaɱ,||
na gandhā ghānassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na jivhā rasānaɱ saŋyojanaɱ,||
na rasā jivhāya saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na kāyo phoṭṭhabbānaɱ saŋyojanaɱ,||
na phoṭṭhabbā kāyassa,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na mano dhammānaɱ saŋyojanaɱ,||
na dhammā manassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

 


 

[8] Saɱvijjati kho āvuso Bhagavato cakkhu,||
passati Bhagavā cakkhunā rūpaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

Saɱvijjati kho āvuso Bhagavato sota,||
passati Bhagavā sotena saddaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

Saɱvijjati kho āvuso Bhagavato ghāna,||
passati Bhagavā ghānena gandhaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

Saɱvijjati kho āvuso Bhagavato jivhā,||
sāyati Bhagavā jivhāya rasaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

Saɱvijjati kho āvuso Bhagavato kāyo,||
sāyati Bhagavā kāyo phoṭṭhabbānaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

Saɱvijjati kho āvuso Bhagavato mano,||
jānāti Bhagavā [165] manasā dhammaɱ,||
chanda-rāgo Bhagavato n'atthi,||
su-vimutta-citto Bhagavā.|| ||

 


 

[9] Iminā kho etaɱ āvuso pariyāyena veditabbaɱ:||
yathā na cakkhu rūpānaɱ saŋyojanaɱ,||
na rūpā cakkhussa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na sota saddānaɱ saŋyojanaɱ,||
na saddā sotassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na ghāna gandhānaɱ saŋyojanaɱ,||
na gandhā ghānassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na jivhā rasānaɱ saŋyojanaɱ,||
na rasā jivhāya saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na kāyo phoṭṭhabbānaɱ saŋyojanaɱ,||
na phoṭṭhabbā kāyassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojanaɱ.|| ||

Na mano dhammānaɱ saŋyojanaɱ,||
na dhammā manassa saŋyojanaɱ,||
yañ ca tattha tad ubhayaɱ paṭicca uppajjati chanda-rāgo||
taɱ tattha saŋyojananti.

 


Contact:
E-mail
Copyright Statement   Webmaster's Page