Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ IV: Paññāsaka Catuttha
3. Samudda Vagga

Sutta 194

Āditta-Pariyāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[168]

[1][pts][olds][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Āditta-pariyāyaɱ vo bhikkhave dhamma-pariyāyaɱ desissāmi.|| ||

Taɱ suṇātha.|| ||

Katamo ca bhikkhave ādittā-pariyāyo dhamma-pariyāyo?|| ||

Varaɱ bhikkhave tattāya ayo-salākāya||
ādittāya||
sampajjalitāya||
sajoti-bhūtāya||
cakkhu'ndriyaɱ sampalimaṭṭhaɱ,||
na tv'eva cakkhu-viññeyyesu rūpesu||
anuvyañjanaso nimittaggāho.|| ||

Nimittassādagathitaɱ vā bhikkhave viññāṇaɱ tiṭṭha-mānaɱ tiṭṭheyya anuvyañjanassāda-gathitaɱ vā,||
tasmiɱ ce samaye kālaɱ kareyya,||
ṭhānam etaɱ vijjati||
yaɱ dvinnaɱ gatīnaɱ||
aññataraɱ gatiɱ gaccheyya||
Nirayaɱ vā||
tiracchāna-yoniɱ vā.|| ||

Imaɱ khvāhaɱ bhikkhave ādīnavaɱ disvā||
evaɱ vadāmi.|| ||

Varaɱ bhikkhave tiṇhena ayosankunā||
ādittena||
sampajjalitena||
sajotibhutena||
sot'indriyaɱ sampalimaṭṭhaɱ,||
na tv'eva sota-viññeyyesu saddesu||
anuvyañjanaso nimittaggāho.|| ||

Nimittassādagathitaɱ vā bhikkhave viññāṇaɱ tiṭṭha-mānaɱ tiṭṭheyya anuvyañjanassāda-gathitaɱ vā,||
tasmiɱ ce samaye kālaɱ kareyya,||
ṭhānam etaɱ vijjati||
yaɱ dvinnaɱ gatīnaɱ||
aññataraɱ gatiɱ gaccheyya||
Nirayaɱ vā||
tiracchāna-yoniɱ vā.|| ||

Imaɱ khvāhaɱ bhikkhave ādīnavaɱ disvā||
evaɱ [169] vadāmi.|| ||

Varaɱ bhikkhave tiṇhena nikhādanena||
ādittena||
sampajjalitena||
sajotibhutena||
ghān'indriyaɱ sampalimaṭṭhaɱ, na tv'eva ghāna-viññeyyesu gandhesu anuvyañjanaso nimittaggāho.|| ||

Nimittassādagathitaɱ vā bhikkhave viññāṇaɱ tiṭṭha-mānaɱ tiṭṭheyya anuvyañjanassāda-gathitaɱ vā,||
tasmiɱ ce samaye kālaɱ kareyya,||
ṭhānam etaɱ vijjati||
yaɱ dvinnaɱ gatīnaɱ||
aññataraɱ gatiɱ gaccheyya||
Nirayaɱ vā||
tiracchāna-yoniɱ vā.|| ||

Imaɱ khvāhaɱ bhikkhave ādīnavaɱ disvā||
evaɱ vadāmi.|| ||

Varaɱ bhikkhave tiṇhena khurena||
ādittena||
sampajjalitena||
sajotibhutena||
jivh'indriyaɱ sampalimaṭṭhaɱ, natv'eva jivhā-viññeyyesu rasesu anuvyañjanaso nimittaggāho.|| ||

Nimittassādagathitaɱ vā bhikkhave viññāṇaɱ tiṭṭha-mānaɱ tiṭṭheyya anuvyañjanassāda-gathitaɱ vā,||
tasmiɱ ce samaye kālaɱ kareyya,||
ṭhānam etaɱ vijjati||
yaɱ dvinnaɱ gatīnaɱ||
aññataraɱ gatiɱ gaccheyya||
Nirayaɱ vā||
tiracchāna-yoniɱ vā.|| ||

Imaɱ khvāhaɱ bhikkhave ādīnavaɱ disvā||
evaɱ vadāmi.|| ||

Varaɱ bhikkhave tiṇhāya sattiyā||
ādittāya||
sampajjalitāya||
sajoti-bhūtāya||
kāy'indriyaɱ sampalimaṭṭhaɱ, na tv'eva kāya-viññeyyesu phoṭṭhabbesu anuvyañjanaso nimittaggāho.|| ||

Nimittassādagathitaɱ vā bhikkhave viññāṇaɱ tiṭṭha-mānaɱ tiṭṭheyya anuvyañjanassāda-gathitaɱ vā,||
tasmiɱ ce samaye kālaɱ kareyya,||
ṭhānam etaɱ vijjati||
yaɱ dvinnaɱ gatīnaɱ||
aññataraɱ gatiɱ gaccheyya||
Nirayaɱ vā||
tiracchāna-yoniɱ vā.|| ||

Imaɱ khvāhaɱ bhikkhave ādīnavaɱ disvā||
evaɱ vadāmi.|| ||

Varaɱ bhikkhave suttaɱ||
suttaɱ kho pan'āhaɱ bhikkhave||
vañjhaɱ jīvitānaɱ vadāmi,||
aphalaɱ jīvitānaɱ vadāmi,||
momūhaɱ jīvitānaɱ vadāmi.|| ||

Na tv'eva tathā-rūpe vitakke vitakkeyya||
yathā-rūpānaɱ vitakkānaɱ vasaɱgato Sanghaɱ bhindeyya.|| ||

Imaɱ khvāhaɱ [170] bhikkhave vañjhaɱ jīvitānam ādīnavaɱ disvā evaɱ vadāmi.|| ||

 

§

 

Tattha bhikkhave sutavā ariya-sāvako iti paṭisañcikkhati:|| ||

Tiṭṭhatu tāva tattāya ayosalākāya||
ādittāya||
sampajjalitāya||
sajoti-bhūtāya||
cakkhu'ndriyaɱ samphalimaṭṭhaɱ,||
handāhaɱ idam eva mana-sikaromi,|| ||

'Iti cakkhuɱ aniccā,||
rūpā aniccā,||
cakkhu-viññāṇaɱ aniccaɱ,||
cakkhu samphasso anicco,||
yam pidaɱ cakkhu-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

Tiṭṭhatu tāva tiṇhena ayosaŋkunā||
ādittāya||
sampajjalitāya||
sajoti-bhūtāya||
sot'indriyaɱ samphalimaṭṭhaɱ,||
handāhaɱ idam eva mana-sikaromi,|| ||

'Iti sotaɱ aniccaɱ,||
saddā aniccā,||
sota-viññāṇaɱ aniccaɱ,||
sota-samphasso anicco,||
yam pidaɱ sota-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

Tiṭṭhatu tāva tiṇhena nikhādanena||
ādittāya||
sampajjalitāya||
sajoti-bhūtāya||
ghān'indriyaɱ samphalimaṭṭhaɱ,||
handāhaɱ idam eva mana-sikaromi:|| ||

'Iti ghānaɱ aniccaɱ,||
gandhā aniccā,||
ghāna-viññāṇaɱ aniccaɱ,||
ghāna-samphasso anicco,||
yam pidaɱ ghāna-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

Tiṭṭhatu tāva tiṇhena khurena||
ādittāya||
sampajjalitāya||
sajoti-bhūtāya||
jivh'indriyaɱ samphalimaṭṭhaɱ,||
handāhaɱ idam eva mana-sikaromi:|| ||

'Iti jivhā aniccā,||
rasā aniccā,||
jivhā-viññāṇaɱ aniccaɱ,||
jivhā-samphasso anicco,||
yam pidaɱ jivhā-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

Tiṭṭhatu tāva tiṇhāya sattiyā||
ādittāya||
sampajjalitāya||
sajoti-bhūtāya||
kāy'indriyaɱ samphalimaṭṭhaɱ,||
handāhaɱ idam eva mana-sikaromi,|| ||

'Iti kāyo anicco,||
phoṭṭhabbā [171] aniccā,||
kāya-viññāṇaɱ aniccɱ,||
kāya-samphasso anicco,||
yam pidaɱ kāya-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

Tiṭṭhatu tāva suttaɱ||
handāhaɱ idam eva mana-sikaromi|| ||

'Iti mano anicco,||
dhammā aniccā,||
mano-viññāṇaɱ aniccaɱ,||
mano-samphasso anicco,||
yam pidaɱ mano-samphassa-paccayā uppajjati vedayitaɱ||
sukhaɱ vā dukkhaɱ vā adukkha-m-asukhaɱ vā||
tam pi aniccaɱ.|| ||

 

§

 

Evam passaɱ bhikkhave sutavā ariya-sāvako cakkhusmim pi nibbindati,||
rūpesu pi nibbindati,||
cakkhu-viññāṇe pi nibbindati,||
cakkhu-samphasse pi nibbindati.|| ||

Yam pidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariya-sāvako sotasmim pi nibbindati,||
saddā pi nibbindati,||
sota-viññāṇe pi nibbindati,||
sota-samphasse pi nibbindati.|| ||

Yam pidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariya-sāvako ghānasmim pi nibbindati,||
gandhā pi nibbindati,||
ghāna-viññāṇe pi nibbindati,||
ghāna-samphasse pi nibbindati.|| ||

Yam pidaɱ ghāna-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariya-sāvako jivhāya pi nibbindati,||
rasesu pi nibbindati,||
jivhā-viññāṇe pi nibbindati,||
jivhā-samphasse pi nibbindati.|| ||

Yam pidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariya-sāvako kāyasmim pi nibbindati,||
phoṭṭhabbā pi nibbindati,||
kāya-viññāṇe pi nibbindati,||
kāya-samphasse pi nibbindati.|| ||

Yam pidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Evam passaɱ bhikkhave sutavā ariya-sāvako manasmim pi nibbindati,||
dhammesu pi nibbindati||
mano-viññāṇe pi nibbindati,||
mano-samphasse pi nibbindati.|| ||

Yam pidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā tasmim pi nibbindati.|| ||

Nibbindaɱ virajjati virāgā vimuccati,||
vimuttasmiɱ vimuttamiti ñāṇaɱ hoti:|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ||
nāparaɱ itthattāyā' ti pajānātī.|| ||

Ayaɱ kho bhikkhave āditta-pariyāyo dhamma-pariyāyo" ti.|| ||

 


Contact:
E-mail
Copyright Statement