Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 197

Āsīvisopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[172]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Seyyathā pi, bhikkhave, cattāro āsivisā||
uggatejā||
ghoravisā.|| ||

Atha puriso āgaccheyya||
jīvitukāmo||
amaritukāmo||
sukhakāmo||
dukkhapaṭikkulo,||
tam enaɱ evaɱ vadeyyuɱ:|| ||

'Ime te ambho purisa,||
cattāro āsivisā||
uggatejā||
ghoravisā||
[173] kālena kālaɱ vuṭṭhāpetabbā,||
kālena kālaɱ nahāpetabbā,||
kālena kālaɱ bhojetabbā,||
kālena kālaɱ pavesetabbā,||
yadā ca kho te ambho purisa imesaɱ catunnaɱ āsivisānaɱ||
uggatejānaɱ||
ghoravisānaɱ||
aññataro vā aññataro va kuppissati||
tato tvam ambho purisa maraṇam vā||
nigacchissasi maraṇamattaɱ va dukkhaɱ||
yan te ambho purisa karaṇīyam taɱ karohī' ti.|| ||

Atha kho so bhikkhave puriso bhīto catunnaɱ āsivisānaɱ||
uggatejānaɱ||
ghoravisānaɱ||
yena vā tena vā palāyetha,||
tam enaɱ evaɱ vadeyyuɱ:|| ||

'Ime te ambho purisa,||
pañca vadhakā paccatthikā piṭṭhito piṭṭhito anubaddhā.|| ||

"Yattheva naɱ passissāma||
tattheva jīvitā voropessāmā" ti.|| ||

Yan te ambho purisa karaṇīyaɱ taɱ karohī' ti.|| ||

Atha kho so bhikkhave puriso bhīto catunnaɱ āsivisānaɱ||
uggatejānaɱ||
ghoravisānaɱ||
bhīto pañcannaɱ vadhakānaɱ paccatthikānaɱ||
yena vā tena vā palāyetha.|| ||

Tam enaɱ evaɱ vadeyyuɱ:|| ||

'Ayaɱ te ambho purisa chaṭṭho antaracaro vadhako ukkhittāsiko piṭṭhito piṭṭhito anubaddho||
"yattheva naɱ passissāmi||
tattheva siro pātessāmī" ti.|| ||

Yan te ambho purisa karaṇīyaɱ taɱ karohī' ti.|| ||

Atha kho so bhikkhave puriso bhīto catunnaɱ āsivisānaɱ||
uggatejānaɱ||
ghoravisānaɱ||
bhīto pañcannaɱ vadhakānaɱ paccatthikānaɱ||
bhīto chaṭṭhassa antaracarassa||
vadhakassa||
ukkhittāsikassa||
yena vā tena vā palāyetha.|| ||

So passeyya suññaɱ gāmaɱ:|| ||

Yañña yad evaɱ gharaɱ paviseyya||
rittakaɱ yeva paviseyya,||
tucchakaɱ yeva paviseyya,||
suññakaɱ yeva paviseyya,||
yaññadeva bhājanaɱ parimaseyya,||
rittakaɱ yeva parimaseyya,||
tucchakaɱ yeva parimaseyya,||
suññakaɱ yeva parimaseyya||
tam enaɱ evaɱ vadeyyuɱ:|| ||

"Idāni ambho purisa,||
imaɱ suññaɱ gāmaɱ corā gāmaghātakā vadhissantī.|| ||

Yan te ambho purisa,||
karaṇīyaɱ taɱ karohī' ti.|| ||

[174] Atha kho so bhikkhave puriso bhīto catunnaɱ āsivisānaɱ||
uggatejānaɱ||
ghoravisānaɱ||
bhīto pañcannaɱ vadhakānaɱ paccatthikānaɱ||
bhīto chaṭṭhassa antaracarassa||
vadhakassa||
ukkhittāsikassa||
bhīto corānaɱ gāmaghātakānaɱ||
yena vā tena vā palāyetha.|| ||

So passeyya mahantaɱ udakaṇṇavaɱ,||
orimaɱtīraɱ sāsaŋkaɱ sappaṭibhayaɱ||
pārimaɱtīraɱ khemaɱ appaṭibhayaɱ,||
na cassa nāvā santāraṇī uttarasetuvā aparāparaɱ gamanāya.|| ||

Atha kho bhikkhave tassa purisassa evam assa:|| ||

'Ayaɱ kho mahā udakaṇṇavo,||
orimaɱtīraɱ sāsaŋkaɱ sappaṭibhayaɱ||
pārimaɱtīraɱ khemaɱ appaṭibhayaɱ,||
n'atthi ca nāvā santāraṇī uttarasetu vā aparāparaɱ gamanāya.|| ||

Yaɱ nūnāhaɱ tiṇakaṭṭha-sākhā-palāsaɱ saŋkaḍḍhitvā kullaɱ bandhitvā taɱ kullaɱ nissāya hatthehi ca pādehi ca vāyamamāno sotthinā pāraɱ gaccheyyan' ti.|| ||

Atha kho so bhikkhave puriso tiṇakaṭṭha-sākhā-palāsaɱ saŋkaḍḍhitvā kullaɱ bandhitvā taɱ kullaɱ nissāya hatthehi ca pādehi ca vāyamamāno sotthinā pāraɱ gaccheyya.|| ||

Tiṇṇo pāragato thale tiṭṭhati brāhmaṇo.|| ||

Upamā kho myāyaɱ bhikkhave,||
katā atthassa viññāpanatthāya,||
ayañ cettha attho:|| ||

Cattāro āsivisā||
ugganatejā||
ghoravisāti||
kho bhikkhave, catunn'etaɱ mahābhūtānaɱ adhivacanaɱ:||
paṭhavi-dhātuyā||
āpo-dhātuyā||
tejo-dhātuyā||
vāyo-dhātuyā.|| ||

Pañca vadhakā paccatthikā ti kho bhikkhave,||
pañcann'etaɱ upādānakkhandhānaɱ adhivacanaɱ,||
seyyathīdaɱ:||
rūp'upādānakkhandhassa,||
vedan'ūpādānakkhandhassa,||
saññ'ūpādānakkhandhassa,||
sankhār'ūpādānakkhandhassa||
viññāṇ'ūpādānakkhandhassa.|| ||

Chaṭṭho antaracaro vadhako ukkhittāsiko ti kho bhikkhave,||
nandirāgassetaɱ adhivacanaɱ.|| ||

Suñño gāmo ti kho bhikkhave,||
channaɱ ajjhattikānaɱ āyatanānaɱ adhivacanaɱ.|| ||

Cakkhuto ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tuc- [175] chakaɱ yeva khāyati,||
suññakaɱ yeva khāyati.|| ||

Sotato ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tucchakaɱ yeva khāyati,||
suññakaɱ yeva khāyati.|| ||

Ghānato ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tucchakaɱ yeva khāyati,||
suññakaɱ yeva khāyati.|| ||

Jivhāto ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tucchakaɱ yeva khāyati,||
suññakaɱ yeva khāyati.|| ||

Kāyako ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tucchakaɱ yeva khāyati,||
suññakaɱ yeva khāyati.|| ||

Manato ce pi naɱ bhikkhave paṇḍito vyatto medhāvi upaparikkhati,||
rittakaɱ yeva khāyati,||
tucchakaɱ yeva khāyati,||
suññakaɱ yeva khāyati.|| ||

Corā gāmaghātakā ti kho bhikkhave,||
channaɱ bāhirānaɱ āyatanānaɱ adhivacanaɱ.|| ||

Cakkhu bhikkhave haññati manāpāmanāpesu rūpesu,||
sotaɱ haññati manāpāmanāpesu saddesu,||
ghānaɱ haññati manāpāmanāpesu gandhesu,||
jivhā haññati manāpāmanāpesu rasesu,||
kāyo haññatī manāpāmanāpesu phoṭṭhabbesu,||
mano haññati manāpāmanāpesu dhammesu.|| ||

Mahā udakaṇṇavo ti kho bhikkhave,||
catunnaɱ oghānaɱ adhivacanaɱ:||
kām'oghassa,||
bhav'oghassa,||
diṭṭh'oghassa,||
avijj'oghassa.|| ||

Orimaɱ tīraɱ sāsaŋkaɱ sappaṭibhayan ti kho bhikkhave||
sakkāyass etaɱ adhivacanaɱ.|| ||

Pārimaɱ tīraɱ khemaɱ appaṭibhayan ti kho bhikkhave,||
nibbānass etaɱ adhivacanaɱ.|| ||

Kullan ti kho bhikkhave,||
ariyass etaɱ aṭṭhaŋgikassa maggassa adhivacanaɱ,||
seyyathīdaɱ:||
sammā-diṭṭhiyā||
sammā-saŋkappassa||
sammā-vācāya||
sammā-kammantassa,||
sammā-ājīvassa,||
sammā-vāyāmassa,||
sammā-satiyā,||
sammā-samādhissa.|| ||

Hatthehi ca pādehi ca vāyamamāno ti kho bhikkhave||
viriyārambhass etaɱ adhivacanaɱ.|| ||

Tiṇṇo pāragato thale tiṭṭhati brāhmaṇo ti kho bhikkhave,||
arahato etaɱ adhivacanan" ti.|| ||

 


Contact:
E-mail
Copyright Statement   Webmaster's Page