Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 199

Kummopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[177]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Bhutapubbaɱ bhikkhave, kummo kacchapo||
sāyaṇhasamayaɱ anunadītīre gocarapasuto ahosi;||
sigālo pi kho bhikkhave||
sāyaṇhasamayaɱ anunadītīre gocarapasuto hoti.|| ||

Addasā kho bhikkhave kummo kacchapo||
sigālaɱ durato va gocarapasutaɱ,||
disvāna soṇḍi pañcamāni [178] aŋgāni sake kapāle samodahitvā appossukko tuṇhī bhuto saɱkasāyati.|| ||

Sigālo pi kho bhikkhave addasa kummaɱ kacchapā durato va.|| ||

Disvāna yena kummo kacchapo ten'upasaŋkami,||
upasaŋkamitvā kummaɱ kacchapaɱ paccupaṭṭhito ahosi|| ||

'Yadāyaɱ kummo kacchapo soṇaḍipañcamānaɱ aŋgānaɱ aññataraɱ vā aññataraɱ vā aŋgaɱ abhininnāmessati,||
tattheva naɱ gahetvā uddālitvā khādissāmī' ti.|| ||

Yadā kho bhikkhave kummo kacchapo soṇḍipañcamānaɱ aŋgānaɱ aññataraɱ vā aññataraɱ vā aŋgaɱ na abhininnāmesi,||
atha sigālo kummamhā nibbijja pakkami otāraɱ alabhamāno.|| ||

Evam eva kho bhikkhave tumhe pi Māro Pipāmā satataɱ samitaɱ paccupaṭṭhito;|| ||

'Appevanāmāhaɱ imesaɱ||
cakkhuto vā otāraɱ labheyyaɱ,||
sotato vā otāraɱ labheyyaɱ,||
ghānato vā otāraɱ labheyyaɱ,||
jivhāto vā otāraɱ labheyyaɱ,||
kāyato vā otāraɱ labheyyaɱ,||
manato vā otāraɱ labheyyaɱ' nti.|| ||

Tasmāt ihabhikkhave indriyesu guttadvārā viharatha.|| ||

Cakkhunā rūpaɱ disvā mā nimitataggāhino ahuvattha, mānuvyañjanaggāhino,||
yatvādhikaraṇam enaɱ cakkhundriyaɱ asaɱvutaɱ viharantaɱ||
abhijjhādomanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhatha cakkhundriyaɱ,||
cakkhundriye saɱvaraɱ āpajjatha.|| ||

Sotena saddaɱ sutvā mā nimitataggāhino ahuvattha,||
mānuvyañjanaggāhino,||
yatvādhikaraṇam enaɱ sotindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhati sotandriyaɱ,||
sotindriye saɱvaraɱ āpajjatha.|| ||

Ghānena gandhaɱ ghāyitvā mā nimitataggāhino ahuvattha,||
mānuvyañjanaggāhino,||
yatvādhikaraṇam enaɱ ghānindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhati ghānindriyaɱ,||
ghānandriye saɱvaraɱ āpajjatha.|| ||

Jivhāya rasaɱ sāyitvā mā nimitataggāhino ahuvattha,||
mānuvyañjanaggāhino,||
yatvādhikaraṇam enaɱ jivhindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhati jivhindriyaɱ,||
jivhandriye saɱvaraɱ āpajjatha.|| ||

Kāyena phoṭṭhabbaɱ phusitvā mā nimitataggāhino ahuvattha,||
mānuvyañjanaggāhino,||
yatvādhikaraṇam enaɱ kāyindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhati kāyindriyaɱ,||
kāyindriye saɱvaraɱ āpajjatha.|| ||

Manasā dhammaɱ viññāya mā nimitataggāhino ahuvattha,||
mānuvyañjanaggāhino,||
yatvādhikaraṇam enaɱ manindriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjatha,||
rakkhati manindriyaɱ,||
manindriye saɱvaraɱ āpajjatha.|| ||

Yato kho tumhe bhikkhave, indriyesu guttadvārā viharissatha,||
atha tumhehi pi māro pāpimā nibbijja pakkamissati otāraɱ alabhamāno kummambhāva sigālo" ti.|| ||

 

[179] Kummova aŋgāni sake kapāle||
Samodahaɱ bhikkhu mano vitakko||
Anissito aññam aheṭhayāno||
Parinibbuto na upavadeyya kañci ti.|| ||

 


Contact:
E-mail
Copyright Statement   Webmaster's Page