Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 200

Dārukkhandhopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[179]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Kosambiyaɱ viharati Gaṇgāya nadiyā tīre.|| ||

Addasā kho Bhagavā mahantaɱ dārukkhandhaɱ Gaŋgāya nadiyā sotena vuyhamānaɱ,||
disvāna bhikkhū āmantesi:|| ||

"Passatha no tumhe bhikkhave amuɱ mahantaɱ dārukkhandhaɱ Gaŋgāya nadiyā sotena vuyhamānan" ti?|| ||

"Evaɱ bhante".|| ||

"Sace kho bhikkhave dārukkhandho na orimaɱ tīraɱ upagacchati,||
na pārimaɱ tīraɱ upagacchati,||
na majjhe saɱsīdissati,||
na thale ussīdissati||
na manussaggāho bhavissati,||
na amanussaggāho bhavissati,||
na āvaṭṭaggāho bhavissati,||
na antopūti bhavissati:||
evaɱ hi so bhikkhave dārukkhandho||
samudda-ninno bhavissati,||
samudda-poṇo||
samudda-pabhāro.|| ||

Taɱ kissa hetu?|| ||

Samudda-ninno bhikkhave, Gaŋgāya nadiyā soto,||
samudda-poṇo,||
samudda-pabbhāro.|| ||

Evam eva kho bhikkhave sace tumhe pi||
na orimaɱ tīraɱ upagacchatha||
na pārimaɱ tīraɱ upagacchatha||
na majjhe saɱsīdissatha,||
na thale ussīdissatha,||
na manussaggāhā hessatha||
na amanussaggāhā hessatha,||
na āvaṭṭaggāhā hessatha,||
na antopūti bhavissatha.|| ||

Evaɱ [180] tumhe bhikkhave nibbāna-ninnā bhavissatha,||
nibbāna-poṇā||
nibbāna-pabbhārā.|| ||

Taɱ kissa hetu?|| ||

Nibbāna-ninnā bhikkhave sammādiṭṭhi,||
nibbāna-poṇā,||
nibbāna-pabbhārā" ti.|| ||

Evaɱ vutte aññataro bhikkhu Bhagavantaɱ etad avoca:|| ||

"Kin nu kho bhante orimaɱtīraɱ?|| ||

Kiɱ pārimaɱtīraɱ?|| ||

Ko majjhe saɱsādo?|| ||

Ko thale ussādo?|| ||

Ko manussaggāho?|| ||

Ko amanussaggāho?|| ||

Ko āvaṭṭaggāho?|| ||

Ko antopūtibhāvo" ti?|| ||

"'Orimaɱtīran' ti kho bhikkhu,||
chann'etaɱ ajjhattikānaɱ āyatanānaɱ adhivacanaɱ.|| ||

'Pārimaɱtīran' ti kho bhikkhu||
chann'etaɱ bāhirānaɱ āyatanānaɱ adhivacanaɱ.|| ||

'Majjhe saɱsādo' ti kho bhikkhu,||
nandirāgassetaɱ adhivacanaɱ.|| ||

'Thale ussādo' ti kho bhikkhu||
asmimānassetaɱ adhivacanaɱ.|| ||

Katamo ca bhikkhu manussaggāho?|| ||

Idha bhikkhu gihīhi saɱsaṭṭho viharati||
sahanandi||
sahasokī||
sukhitesu||
sukhito||
dukkhitesu||
dukkhito uppannesu||
kicca karaṇīyesu||
attanā tesu yogaɱ āpajjati,||
ayaɱ vuccati bhikkhu,||
manussaggāho.|| ||

Katamo ca bhikkhu, amanussaggāho?|| ||

Idha bhikkhu ekacco aññataraɱ devanikāyaɱ paṇidhāya brahmacariyaɱ carati:|| ||

'Imināhaɱ sīlena vā||
vatena vā||
tapena vā||
brahmacariyena vā||
devo vā||
bhavissāmī devaññataro vā' ti.|| ||

Ayaɱ vuccati bhikkhū amanussaggāho.|| ||

Āvaṭṭagāho ti kho bhikkhu,||
pañcann'etaɱ kāmaguṇānaɱ adhivacanaɱ.|| ||

Katamo ca bhikkhu antopūtibhāvo?|| ||

Idha bhikkhu ekacco dussīlo hoti||
pāpadhammo asuci saŋkassarasamācāro paṭicchannakammanto assamaṇo samaṇapaṭiñño [181] abrahmacārī brahmacārīpaṭiñño antopūti avassuto kasambujāto.|| ||

Ayaɱ vuccati bhikkhu, antopūtibhāvo" ti.|| ||

Tena kho pana samayena Nando gopālako Bhagavato avidūre ṭhito hoti.|| ||

Atha kho Nando gopālako Bhagavantaɱ etad avoca:|| ||

"Ahaɱ kho bhante na orimaɱtīraɱ upagacchāmi,||
na pārimaɱtīraɱ upagacchāmi,||
na majjhe saɱsīdissāmi,||
na thale ussīdissāmi,||
na manussaggāho gahi'ssati||
na amanussaggaho gahi'ssati,||
na āvaṭṭaggāho gahi'ssati||
Na antopūti bhavissāmi;||
labheyyāhaɱ bhante Bhagavato santike pabbajjaɱ||
labheyyaɱ upasampadan" ti.|| ||

"Tena hi tvaɱ Nanda,||
sāmikānaɱ gāvo nīyyādehī" ti.|| ||

"Gamissanti bhante gāvo vacchagiddhiniyo" ti.|| ||

"Nīyyādehve tvaɱ Nanda,||
sāmikānaɱ gāvo" ti.|| ||

Atha kho Nando gopālako sāmikānaɱ gāvo niyyādetvā yena Bhagavā ten'upasaŋkami.|| ||

Upasaŋkamitvā Bhagavantaɱ etad avoca:|| ||

"Niyyāditā bhante sāmikānaɱ gāvo,||
labheyayyāhaɱ bhante Bhagavato santike pabbajjaɱ||
labheyyaɱ upasampadan" ti.|| ||

Alattha kho Nando gopālako Bhagavato santike pabbajjaɱ,||
alatthupasampadaɱ;||
acirūpasampanno ca panāyasmā Nandoeko vūpakaṭṭho||
appamatto||
ātāpī||
pahitatto||
viharanto||
na cirasseva yassatthāya kulaputtā samma-d-eva agārasmā anagāriyaɱ pabbajanti||
tad anuttaraɱ brahmacariyaɱ-pariyosānaɱ||
diṭṭhe va dhamme sayaɱ abhiññā sacchikatvā upasampajja vihāsi:|| ||

'Khīṇā jāti||
vusitaɱ brahmacariyaɱ,||
kataɱ karaṇīyaɱ||
nāparaɱ itthattāyā' tī abbhaññāsi.|| ||

Aññataro ca panāyasmā Nando arahataɱ ahosī.|| ||

 


Contact:
E-mail
Copyright Statement   Webmaster's Page