Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 202

Avassuta-Pariyāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[182]

[1][pts][than][bodh] Evaɱ me sutaɱ:|| ||

Ekaɱ samayaɱ Sakkesu viharati Kāpilavatthusmiɱ Nigrodhārāme.|| ||

Tena kho pana samayena Kāpilavatthavānaɱ Sakkānaɱ navaɱ santhāgāraɱ acirakāritaɱ hoti,||
anajjhāvutthaɱ samaṇena vā brāhmaṇena vā kenaci vā manussabhutena.|| ||

Atha kho Kāpilavatthavā Sakkā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho Kāpilavatthavā Sakkā Bhagavantaɱ etad avocuɱ;|| ||

"Idha bhante Kāpilavatthavānaɱ Sakkānaɱ navaɱ santhāgāraɱ acirakāritaɱ hoti,||
anajjhāvuttaɱ samaṇena vā brāhmaṇena vā kenaci vā manussa- [183] bhutena||
taɱ bhante Bhagavā paṭhamaɱ paribhuñjatu,||
Bhagavatā paṭhamaɱ paribhuttaɱ pacchā Kāpilavatthavā Sakkā paribhuñjissanti;||
tad assa Kāpilavatthavānaɱ Sakkānaɱ dīgha-rattaɱ hitāya sukhāyā" ti.|| ||

Adhivāsesi Bhagavā tuṇhībhāvena.|| ||

Atha kho Kāpilavatthavā Sakkā Bhagavato adhivāsanaɱ viditvā uṭṭhāy āsanā Bhagavantaɱ abhivādetvā padakkhiṇaɱ katvā yena navaɱ santhāgāraɱ ten'upasaŋkamiɱsu,||
upasaŋkamitvā sabbasanthariɱ santhāgāraɱ santharitvā||
āsanāni paññāpetvā udakamaṇikaɱ patiṭṭhāpetvā telappadīpaɱ āropetvā yena Bhagavā ten'upasaŋkamiɱsu,||
upasaŋkamitvā Bhagavantaɱ etad avocuɱ:|| ||

"Sabbasanthariɱ santhataɱ bhante santhāgāraɱ,||
āsanāni paññattāni udakamaṇiko patiṭṭhāpito,||
telappadīpo āropito||
yassadāni Bhagavā kālaɱ maññatī" ti.|| ||

Atha kho Bhagavā nivāsetvā pattacīvaraɱ ādāya saddhiɱ bhikkhu-saŋghena yena navaɱ santhāgāraɱ ten'upasaŋkami,||
upasaŋkamitvā pāde pakkhāletvā santhāgāraɱ pavisitvā majjhima thambhaɱ nissāya puratthābhimukho nisīdi.|| ||

Bhikkhusaŋgho pi kho pāde pakkhāletvā santhāgāraɱ pavisitvā pacchimaɱ bhittiɱ nissāya puratthābhimukho nisīdi Bhagavantaɱ yeva purakkhatvā.|| ||

Kāpilavatthavā pi kho Sakkā pāde pakkhāletvā santhāgāraɱ pavisitvā puratthimaɱ bhittiɱ nissāya pacchāmukhā nisīdiɱsu||
Bhagavantaɱ yeva purakkhatvā.|| ||

Atha kho Bhagavā Kāpilavatthave Sakke bahudeva rattiɱ dhammiyā kathāya sandassetvā samādapetvā samuttejitvā sampahaɱsetvā uyyojesi:|| ||

"Abhikkantā kho Gotamā ratti yassa dāni kālaɱ maññathā" ti.|| ||

[184] "Evam bhante" ti kho Kāpilavatthavā Sakkā Bhagavato paṭissutvā uṭṭhāy āsanā Bhagavantaɱ abhivādetvā padakkhiṇaɱ katvā pakkamiɱsu.|| ||

Atha kho Bhagavā acirapakkantesu Kāpilavatthevesu Sakkesu āyasmantaɱ Mahā Moggallānaɱ āmantesi:|| ||

"Vigatathīnamiddho kho Moggallāna, bhikkhusaŋgho,||
paṭibhātu taɱ Moggallāna bhikkhūnaɱ dhammī kathā,||
piṭṭhi me āgilāyati tam ahaɱ āyamissāmī" ti.|| ||

"Evaɱ bhante" ti kho āyasmā Mahā Moggallāno Bhagavato paccassosi.|| ||

Atha kho Bhagavā catugguṇaɱ sanghāṭiɱ paññāpetvā dakkhiṇena passena sīhaseyyaɱ kappesi||
pāde pādāɱ accādhāya sato sampajāno uṭṭhānasaññaɱ manasi karitvā.|| ||

 


 

Tatra kho āyasmā Mahā Moggallāno bhikkhu āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuɱ,||
āyasmā Mahā Moggallāno etad avoca:|| ||

"Avassutapariyāyaɱ ca vo āvuso desissāmi,||
anavassutapariyāyañ ca.|| ||

Taɱ suṇātha||
sādhukam manasi karotha||
bhāsissāmi" ti.|| ||

"Evam āvuso" ti kho te bhikkhū āyasmato Mahā-Moggalānassa paccassosuɱ.|| ||

Āyasmā MahāMoggalāno etad avoca:|| ||

Kathañ cā vuso avassuto hoti?|| ||

Idh'āvuso bhikkhu cakkhunā rūpaɱ disvā piyarūpe rūpe adhimuccati,||
appiyarūpe rūpe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā [185] nirujjhanti.|| ||

Sotena saddaɱ sutvā piyarūpe sadde adhimuccati,||
appiyarūpe sadde vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe adhimuccati,||
appiyarūpe gandhe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase adhimuccati,||
appiyarūpe rase vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe adhimuccati,||
appiyarūpe phoṭṭhabbe khyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme adhimuccati,||
appiyarūpe dhamme vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ayaɱ vuccatāvuso bhikkhu||
avassuto cakkhu-viññeyyesu rūpesu,||
avassuto sota-viññeyyesu saddesu,||
avassuto ghāna-viññeyyesu gandhesu,||
avassuto jivhā-viññeyyesu rasesu,||
avassuto kāya-viññeyyesu phoṭṭhabbesu,||
avassuto mano-viññeyyesu dhammesu.|| ||

Evaɱ vihāraɱ cāvuso bhikkhuɱ||
cakkhuto ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Sotato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Ghānato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Jivhāto ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Kāyato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Manato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ.|| ||

Seyyathā pi āvuso naḷāgāraɱ vā||
tiṇāgāraɱ vā||
sukkhaɱ kolāpaɱ terovassikaɱ||
puratthimāya ce pi naɱ disāya puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Pacchimāya ce pi naɱ disāya puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Uttarāya ce pi naɱ disāya puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Dakkhiṇāya ce pi naɱ disāya puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Heṭṭhimato ce pi naɱ disāya puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Uparimato ce pi naɱ —||
yato kuto ce pi naɱ puriso||
ādittāya tiṇukkāya upasaŋkameyya;||
labhetheva aggi otāraɱ,||
labhetha aggi ārammaṇaɱ.|| ||

Evam eva kho āvuso evaɱ vihāraɱ bhikkhuɱ||
cakkhuto ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Sotato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Ghānato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Jivhāto ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Kāyato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ;|| ||

Manato ce pi naɱ Māro upasaŋkamati||
labhateva Māro otāraɱ||
labhati Māro ārammaṇaɱ.|| ||

Evaɱ vihāriɱ cāvuso bhikkhuɱ||
rūpā adhibhaɱsu,||
na bhikkhu rūpe adhibhosi;|| ||

saddā bhikkhuɱ adhibhaɱsu||
na [186] bhikkhu sadde adhibhosī;|| ||

gandhā bhikkhuɱ adhibhaɱsu,||
na bhikkhuɱ gandhe adhibhosi;|| ||

rasā bhikkhuɱ adhibhaɱsu,||
na bhikkhu rase adhibhosi;|| ||

phoṭṭhabbā bhikkhuɱ adhibhaɱsu,||
na bhikkhu phoṭṭhabbe adhibhosi;|| ||

dhammā bhikkhuɱ adhibhaɱsu,||
na bhikkhu dhamme adhibhosi.|| ||

Ayaɱ vuccat'āvuso bhikkhu||
rūpā-dhibhuto||
saddā-dhibhuto||
gandhā-dhibhuto||
rasā-dhibhuto||
phoṭṭhabbā-dhibhuto||
dhammā-dhibhuto
adhibhūto.|| ||

Anadhibhū||
adhibhaɱsu||
naɱ pāpakā akusalā dhammā||
saŋkilesikā ponobhavikā||
sadarā dukkhavipākā||
āyatiɱ jāti jarāmaraṇīyā.|| ||

Evaɱ kho āvuso avassuto hoti.|| ||

 


 

Kathañ caāvuso anavassuto hoti?|| ||

Idh'āvuso bhikkhu cakkhunā rūpaɱ disvā piyarūpe rūpe nādhimuccati,||
appiyarūpe rūpe na khyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde nādhimuccati,||
appiyarūpe sadde na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe nādhimuccati,||
appiyarūpe gandhe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase nādhimuccati,||
appiyarūpe rase na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe nādhimuccati,||
appiyarūpe phoṭṭhabbe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme nādhimuccati,||
appiyarūpe dhamme na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ayaɱ vuccatāvuso bhikkhu||
anavassuto cakkhuviññeyyesu rūpesu,||
anavassuto sotaviññeyyesu saddesu,||
anavassuto ghānaviññeyyesu gandhesu,||
anavassuto jivhāviññeyyesu rasesu,||
anavassuto kāyaviññeyyesu phoṭṭhabbesu,||
anavassuto manoviññeyyesu dhammesu.|| ||

Evaɱ vihāriɱ cāvuso bhikkhuɱ||
cakkhuto ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Sotato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Ghānato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Jivhāto ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Kāyato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Manato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Seyyathā pi āvuso kuṭāgārakā vā kuṭāgārasālā vā||
[187] bahalamattikā addāvalimpanā||
puratthimāya ce pi naɱ disāya puriso ādittāya tiṇukkāya upasaŋkameyya;||
n'eva labhetha aggi otāraɱ,||
na labhetha aggi ārammaṇaɱ.|| ||

Pacchimāya ce pi naɱ disāya puriso||
ādittāya tiṇukkāya upasaŋkameyya;||
n'eva labhetha aggi otāraɱ,||
na labhetha aggi ārammaṇaɱ.|| ||

Uttarāya ce pi naɱ disāya puriso||
ādittāya tiṇukkāya upasaŋkameyya;||
n'eva labhetha aggi otāraɱ,||
na labhetha aggi ārammaṇaɱ.|| ||

Dakkhiṇāya ce pi naɱ disāya puriso||
ādittāya tiṇukkāya upasaŋkameyya;||
n'eva labhetha aggi otāraɱ,||
na labhetha aggi ārammaṇaɱ.|| ||

Heṭṭhato ce pi naɱ disāya puriso||
ādittāya tiṇukkāya upasaŋkameyya;||
n'eva labhetha aggi otāraɱ,||
na labhetha aggi ārammaṇaɱ.|| ||

Yato kuto ce pi naɱ puriso,||
ādittāya tiṇukkāya upasaŋkameyya;||
n'eva labhetha aggi otāraɱ||
na labhetha aggi ārammaṇaɱ.|| ||

Evam eva kho āvuso evaɱ vihāriɱ bhikkhuɱ cakkhuto ce pi naɱ Māro upasaŋkamati;||
n'eva labhati Māro otāraɱ||
na labhati Māro ārammaṇaɱ;|| ||

Sotato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Ghānato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Jivhāto ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Kāyato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

Manato ce pi naɱ Māro upasaŋkamati,||
n'eva labhati Māro otāraɱ||
na labhati Māro ārammaṇaɱ;|| ||

■|| ||

Evaɱ vihārī cāvuso bhikkhu rūpe adhibhosi,||
na rūpā bhikkhuɱ adhibhaɱsu;|| ||

Sadde bhikkhu adhibhosi,||
na saddā bhikkhuɱ adhibhaɱsu;|| ||

gandhe bhikkhu adhibhosi,||
na gandhā bhikkhuɱ adhibhaɱsu;|| ||

rase bhikkhu adhibhosi,||
na rasā bhikkhuɱ adhibhaɱsu;|| ||

Phoṭṭhabbe bhikkhu adhibhosi,||
na phoṭṭhabbā bhikkhuɱ adhibhaɱsu;|| ||

dhamme bhikkhu adhibhosi,||
na dhammā bhikkhuɱ adhibhaɱsu.|| ||

Ayaɱ vuccatāvuso bhikkhu||
rūpādhibhū||
saddādhibhū||
gandhādhibhū||
rasādhibhū||
phoṭṭhabbādhibhū||
dhammādhibhū;||
adhibhū||
anadhibhūto||
adhibhosu te pāpake akusale dhamme saŋkilesike ponobhavike sadare dukkhavipāke āyatiɱ jāti jarāmaraṇike.|| ||

Evaɱ kho āvuso anavassuto hotī" ti.|| ||

Atha kho Bhagavā uṭṭhahitvā āyasmantaɱ Mahā Moggallānaɱ āmantesi:|| ||

"Sādhu sādhu Moggallāna,||
sādhu kho tvaɱ Moggallāna bhikkhūnaɱ||
avassutapariyāyañ ca||
anavassutapariyāyañ ca abhāsī" ti.|| ||

Idam avoca āyasmā Mahā Moggallāno,||
samanuñño [188] satthā ahosi,||
attamanā te bhikkhū āyasmato Mahā Moggallānassa bhāsitaɱ abhinandiɱsū.|| ||

 


Contact:
E-mail
Copyright Statement   Webmaster's Page