Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 203

Dukkha-Dhamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[188]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Yato kho bhikkhave bhikkhu sabbesaɱ yeva dukkhadhammānaɱ samudayañ ca||
atthagamañ ca||
yathābhūtaɱ pajānāti,||
tathā kho panassa kāmā diṭṭhā honti,||
yathāssa kāme passato yo kāmesu kāmacchando||
kāmasneho||
kāmamucchā||
kāmapariḷāho so nānuseti.|| ||

Tathā kho panassa cāro ca vihāro ca anubuddho hoti,||
yathā carantaɱ viharantaɱ abhijjhā domanassā pāpakā akusalā dhammā nānussavanti.|| ||

Kathañ ca bhikkhave bhikkhu sabbesaɱ yeva dukkhadhammānaɱ samudayañ ca||
atthagamañ ca||
yathābhūtaɱ pajānāti?|| ||

Iti rūpaɱ,||
iti rūpassa samudayo,||
iti rūpassa atthagamo;|| ||

iti vedanā,||
iti vedanāya samudayo,||
iti vedanāya atthagamo;|| ||

iti saññā,||
iti saññāya samudayo,||
iti saññāya atthagamo;|| ||

iti saṅkhārā,||
iti saṅkhārānaɱ samudayo,||
iti saṅkhārānaɱ atthagamo;|| ||

iti viññāṇaɱ,||
iti viññāṇassa samudayo,||
iti viññāṇassa atthagamoti.|| ||

Evaɱ kho bhikkhave bhikkhu sabbesaɱyeva dukkhadhammānaɱ samudayañ ca||
atthagamañ ca||
yathābhūtaɱ pajānāti.|| ||

 


 

Kathañ ca bhikkhave bhikkhuno kāmā diṭṭhā honti||
yathāssa kāme passato yo kāmesu||
kāmacchando||
kāmasneho||
kāmamucchā||
kāmapariḷāho so nānuseti?|| ||

Seyyathā pi bhikkhave aṅgārakāsu sādhikaporisā puṇṇā aṅgārānaɱ vītaccikānaɱ vītadhūmānaɱ,||
atha puriso āgaccheyya jīvitukāmo amaritukāmo sukhakāmo dukkhapaṭikkulo,||
tam enaɱ dve balavanto purisā nānābāhāsu gahetvā taɱ aṅgārakāsuɱ upakaḍeḍhayyuɱ,||
so iti citi ceva kāyaɱ santāmeyya.|| ||

Taɱ kissa hetu?|| ||

Ñātaɱ hi bhikkhave [189] tassa purisassa hoti:|| ||

'Imañ khvāhaɱ aṅgārakāsuɱ papatissāmi||
tato nidānaɱ maraṇaɱ vā nigacchāmi||
Maraṇamattaɱ vā dukkhan' ti.|| ||

Evam eva kho bhikkhave bhikkhuno aṅgārakāsūpamā kāmā diṭṭhā honti,||
yathāssa kāme passato yo kāmesu||
kāmacchando||
kāmasneho||
kāmamucchā||
kāmapariḷāho so nānuseti.|| ||

 


 

Kathañ ca bhikkhave bhikkhuno cāro ca vihāro ca anubuddho hoti||
yathā carantaɱ viharantaɱ abhijjhā domanassā pāpakā akusalā dhammā nānussavanti?|| ||

Seyyathā pi bhikkhave puriso bahukaṇṭakaɱ dāyaɱ paviseyya:|| ||

Tassassa purato pi kaṇṭako,||
pacchato pi kaṇṭako,||
uttarato pi kaṇṭako,||
dakkhiṇato pi kaṇṭako,||
heṭṭhato pi kaṇṭako,||
uparito pi kaṇṭako.|| ||

So yato ca abhikkameyya||
yato ca paṭikkameyya:|| ||

'Mā maɱ kaṇṭako' ti.|| ||

Evaɱ kho bhikkhave yaɱ loke piyarūpaɱ sātarūpaɱ ayaɱ vuccati ariyassa vinaye kaṇṭako ti|| ||

Iti viditvā saɱvaro ca asaɱvaro ca veditabbo.|| ||

 


 

Kathañ ca bhikkhave asaɱvaro hoti?|| ||

Idha bhikkhave bhikkhu cakkhunā rūpaɱ disvā piyarūpe rūpe adhimuccati,||
appiyarūpe rūpe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde adhimuccati,||
appiyarūpe sadde vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe adhimuccati,||
appiyarūpe gandhe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase adhimuccati,||
appiyarūpe rase vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe adhimuccati,||
appiyarūpe phoṭṭhabbe khyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme adhimuccati,||
appiyarūpe dhamme vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Evaɱ kho bhikkhave asaɱvaro hoti.|| ||

 


 

Kathañ ca bhikkhave saɱvaro hoti?|| ||

Idha bhikkhave bhikkhu cakkhunā rūpaɱ disvā piyarūpe rūpe nādhimuccati,||
appiyarūpe rūpe na khyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā [190] pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde nādhimuccati,||
appiyarūpe sadde na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe nādhimuccati,||
appiyarūpe gandhe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase nādhimuccati,||
appiyarūpe rase na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe nādhimuccati,||
appiyarūpe phoṭṭhabbe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme nādhimuccati,||
appiyarūpe dhamme na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Evaɱ kho bhikkhave saɱvaro hoti.|| ||

Tassa ce bhikkhave, bhikkhuno evaɱ carato||
evaɱ viharato||
kadāci karahaci satisammosā uppajjanti pāpakā akusalā dhammā sarasaṅakappā saŋyojaniyā,||
dandho bhikkhave, satuppādo,||
atha kho naɱ khippam eva pajahati vinodeti,||
vyantīkaroti,||
anabhāvaɱ gameti.|| ||

Seyyathā pi bhikkhave, puriso divasaɱ santatte ayokaṭāhe dve vā tīṇi vā udakaphusitāni nipāteyya;||
dandho bhikkhave udakaphusitānaɱ nipāto,||
atha kho naɱ khippam eva parikkhayaɱ pariyādānaɱ gaccheyya.|| ||

Evam eva kho bhikkhave, tassa ce bhikkhuno evaɱ viharato kadāci karahaci satisammosā uppajjanti pāpakā akusalā dhammā sarasaŋkappā saɱyojaniyā;||
dandho bhikkhave, satuppādo||
atha kho naɱ khippam eva pajahati vinodeti byantī karoti anabhāvaɱ gameti.|| ||

Evaɱ kho bhikkhave bhikkhuno cāro ca vihāro ca anubuddho hoti||
yathā carantaɱ viharantaɱ abhijjhā domanassā pāpakā akusalā dhammā nānussavanti.|| ||

Taɱ ce bhikkhave bhikkhuɱ evaɱ carantaɱ evaɱ viharantaɱ rājāno vā||
rājamahāmattā vā||
mittā vā||
amaccā vā||
ñātī vā||
sālohitā vā||
bhogehi abhihaṭṭhuɱ pavāreyyuɱ:|| ||

'Ehi bho purisa,||
kiɱ te kāsāva anudahanti?|| ||

Kiɱ muṇḍo kapālam anucarasi?|| ||

Ehi hīnāyāvattitvā bhoge ca bhuñjassu,||
puññāni ca karohī' ti.|| ||

So vata bhikkhave bhikkhu evaɱ caranto||
evaɱ viharanto||
sikkhaɱ paccakkhāya hīnāyāvattissatīti netaɱ ṭhānaɱ vijjati.|| ||

[191] Seyyathā pi bhikkhave Gaṅgā nadī||
pācīnaninnā||
pācīna poṇā||
pācīnapabhārā,||
atha mahājanakāyo āgaccheyya kuddālapiṭakaɱ ādāya:|| ||

'Mayaɱ imaɱ Gaŋgānadiɱ||
pacchāninnaɱ karissāma||
pacchāpoṇaɱ||
pacchāpabbhārantī.'|| ||

Taɱ kim maññatha bhikkhave?|| ||

Api nu se mahājanakāyo Gaŋgānadiɱ||
pacchāninnaɱ kareyya||
pacchāpoṇaɱ||
pacchāpabbhāran" ti?|| ||

"No h'etaɱ bhante.|| ||

Taɱ kissa hetu?|| ||

Gaṅgā nadī bhante||
pācīna ninnā||
pācīna poṇā||
pācīna pabbhārā,||
sā na sukarā||
pacchāninnaɱ kātuɱ||
paccāpoṇaɱ||
pacchāpababhāraɱ,||
yāvadeva ca pana so mahājanakāyo kilamathassa vighātassa bhāgī assā" ti.|| ||

Evam eva kho bhikhve taɱ ce bhikkhuɱ||
evaɱ carantaɱ||
evaɱ viharantaɱ||
rājāno vā||
rājamahāmattā vā||
mittā vā||
amaccā vā||
ñātī vā||
sālohitā vā||
bhogehi abhihaṭṭhuɱ pavāreyyuɱ:|| ||

"Ehambho purisa,||
kiɱ te ime kāsāvā anudahanti?|| ||

Kiɱ nu muṇḍo kapālam anucarasi?|| ||

Ehi hīnāyāvattitvā bhoge ca bhuñjassu,||
puññāni ca karohi' ti.|| ||

So pana bhikkhave bhikkhu||
evaɱ caranto||
evaɱ viharanto||
sikkhaɱ paccakkhāya hīnāyāvattissatīti netaɱ ṭhānaɱ vijjati.|| ||

Taɱ kissa hetu?|| ||

Yaɱ hi taɱ bhikkhave cittaɱ dīgharattaɱ||
vivekaninnaɱ||
vivekapoṇaɱ||
vivekapabbhāraɱ.|| ||

Tatha hīnāyāvattissatīti netaɱ ṭhānaɱ vijjatī" ti.|| ||

 


Contact:
E-mail
Copyright Statement   Webmaster's Page