Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 204

Kiɱ sukopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[191]

[1][pts][than][bodh] Evaɱ me sutaɱ:|| ||

Atha kho aññataro bhikkhu yenaññataro bhikkhu ten'upasaŋkami,||
upasaŋkamitvā taɱ bhikkhuɱ etad avoca:|| ||

"Kittāvatā nu kho āvuso bhikkhuno||
dassanaɱ suvisuddhaɱ hotī" ti?|| ||

"Yato kho āvuso bhikkhu||
channaɱ phassāyatanānaɱ [192]||
samudayañ ca||
atthagamañ ca||
yathābhūtaɱ pajānāti,||
ettāvatā kho āvuso bhikkhuno||
dassanaɱ suvisuddhaɱ hotī" ti.|| ||

Atha kho so bhikkhu asantuṭṭho||
tassa bhikkhussa pañhavyākaraṇena||
yenaññataro bhikkhu ten'upasaŋkami,||
upasaŋkamitvā taɱ bhikkhuɱ etad avoca:|| ||

"Kittāvatā nū kho āvuso bhikkhuno||
dassanaɱ suvisuddhaɱ hotī" ti?|| ||

"Yato kho āvuso bhikkhu||
pañcannaɱ upādānakkhandhānaɱ||
samudayagña ca||
atthagamañ ca||
yathābhūtaɱ pajānāti,||
ettāvatā kho āvuso bhikkhuno||
dassanaɱ suvisuddhaɱ hotī ti.|| ||

Atha kho so bhikkhu asantuṭṭho||
tassa bhikkhussa pañhavyākaraṇena||
yenaññataro bhikkhu ten'upasaŋkami,||
upasaŋkamitvā taɱ bhikkhuɱ etad avoca:|| ||

"Kittāvatā nū kho āvuso bhikkhuno||
dassanaɱ suvisuddhaɱ hotī" ti?|| ||

"Yato kho āvuso bhikkhu||
catunnaɱ mahābhūtānaɱ||
samudayagña ca||
atthagamañ ca||
yathābhūtaɱ pajānāti,||
ettāvatā kho āvuso bhikkhuno||
dassanaɱ suvisuddhaɱ hotī ti.|| ||

Atha kho so bhikkhu asantuṭṭho||
tassa bhikkhussa pañhavyākaraṇena||
[193] yenaññataro bhikkhu ten'upasaŋkami,||
upasaŋkamitvā taɱ bhikkhuɱ etad avoca:|| ||

"Kittāvatā nū kho āvuso bhikkhuno||
dassanaɱ suvisuddhaɱ hotī" ti?|| ||

"Yato kho āvuso bhikkhu||
"yaɱ kiñci samudayadhammaɱ sabbantaɱ nirodhadhammanti"||
yathābhūtaɱ pajānāti,||
ettāvatā kho āvuso bhikkhuno||
dassanaɱ suvisuddhaɱ hotī ti.|| ||

Atha kho so bhikkhu asantuṭṭho||
tassa bhikkhuno pañhavyākaraṇena||
yena Bhagavā ten'upasaŋkami,||
upasaŋkamitvā Bhagavantaɱ abhivādetvā||
eka-m-antaɱ nisīdi,||
eka-m-antaɱ nisinno kho||
so bhikkhu Bhagavantaɱ etad avoca:|| ||

"Idhāhaɱ bhante yenaññataro bhikkhu ten'upasaŋkami,||
upasaŋkamitvā taɱ bhikkhuɱ etad avoca:|| ||

Kittāvatā nu kho āvuso bhikkhuno||
dassanaɱ suvisuddhaɱ hotī ti?|| ||

Evaɱ vutte bhante so bhikkhu maɱ etad avoca:|| ||

'Yato kho āvuso bhikkhu||
channaɱ phassāyatanānaɱ||
samudayañ ca||
atthagamañ ca||
yathābhūtaɱ pajānāti||
ettāvatā kho āvuso bhikkhuno||
dassanaɱ suvisuddhaɱ hotī' ti.|| ||

Atha khvāhaɱ bhante asantuṭṭho||
tassa bhikkhussa pañhavyākaraṇena||
yenaññataro bhikkhu ten'upasaŋakami,||
upasaŋkamitvā taɱ bhikkhuɱ etad avoca:|| ||

'Kittāvatā nu kho āvuso bhikkhuno||
dassanaɱ suvisuddhaɱ hotī' ti?|| ||

Evaɱ vutte bhante so bhikkhu maɱ etad avoca:|| ||

'Yato ca kho āvuso bhikkhu||
pañcannaɱ upādānakkhandhānaɱ||
samudayañ ca||
atthagamañ ca||
yathābhūtaɱ pajānāti||
ettāvatā kho āvuso bhikkhuno||
dassanaɱ suvisuddhaɱ hotī' ti.|| ||

Atha khvāhaɱ bhante asantuṭṭho||
tassa bhikkhussa pañhavyākaraṇena||
yenaññataro bhikkhu ten'upasaŋakami,||
upasaŋkamitvā taɱ bhikkhuɱ etad avoca:|| ||

'Kittāvatā nu kho āvuso bhikkhuno||
dassanaɱ suvisuddhaɱ hotī' ti?|| ||

Evaɱ vutte bhante so bhikkhu maɱ etad avoca:|| ||

'Yato ca kho āvuso bhikkhu||
catunnaɱ mahābhūtānaɱ||
samudayañ ca||
atthagamañ ca||
yathābhūtaɱ pajānāti||
ettāvatā kho āvuso bhikkhuno||
dassanaɱ suvisuddhaɱ hotī' ti.|| ||

Atha khvāhaɱ bhante asantuṭṭho||
tassa bhikkhussa pañhavyākaraṇena||
yenaññataro bhikkhu ten'upasaŋakami,||
upasaŋkamitvā taɱ bhikkhuɱ etad avoca:|| ||

'Kittāvatā nu kho āvuso bhikkhuno||
dassanaɱ suvisuddhaɱ hotī' ti?|| ||

Evaɱ vutte bhante so bhikkhu maɱ etad avoca:|| ||

'Yaɱ kiñci samudayadhammaɱ sabbantaɱ nirodhadhammanti||
yathābhūtaɱ pajānāti,||
ettāvatā kho āvuso bhikkhuno||
dassanaɱ suvisuddhaɱ hotī' ti.|| ||

Atha khvāhaɱ bhante asantuṭṭho||
tassa bhikkhuno pañhavyākaraṇena||
yena Bhagavā ten'upasaŋkami.|| ||

Kittāvatā nu kho bhante bhikkhuno||
dassanaɱ suvisuddhaɱ hotī" ti?|| ||

 


 

"Seyyathā pi bhikkhu purisassa kiɱ suko adiṭṭhapubbo assa,||
so yenaññataro puriso kiɱ sukassa dassāvī ten'upasaŋkameyya,||
upasaŋkamitvā taɱ purisaɱ evaɱ vadeyya:|| ||

'Kīdiso bho purisa, kiɱ suko" ti?|| ||

So evaɱ vadeyya:|| ||

'Kāḷako kho ambho purisa, kiɱ suko,||
seyyathā pi jhāmakhāṇū' ti.|| ||

Tena kho pana bhikkhu, samayena||
tādiso vassa kiɱ suko||
yathā pi tassa purisassa dassanaɱ.|| ||

Atha kho so bhikkhu puriso asantuṭṭho||
tassa purisassa pañhavyākareṇana||
yenaññataro puriso kiɱ sukassa dassāvī ten'upasaŋkameyya,||
upasaŋkamitvā taɱ purisaɱ evaɱ vadeyya:|| ||

'Kīdiso bho purisa, kiɱ suko' ti?|| ||

So evaɱ vadeyya:|| ||

'Lohitako ambho purisa, kiɱ suko||
seyyathā pi maɱsapesī' ti.|| ||

Tena kho pana bhikkhu samayena||
tādiso vassa kiɱ suko||
yathā tassa purisassa dassanaɱ.|| ||

Atha kho so bhikkhu puriso asantuṭṭho||
tassa purisassa pañhavyākareṇana||
yenaññataro puriso kiɱ sukassa dassāvī ten'upasaŋkameyya,||
upasaŋkamitvā taɱ purisaɱ evaɱ vadeyya:|| ||

'Kīdiso bho purisa, kiɱ suko' ti?|| ||

So evaɱ vadeyya:|| ||

'Odīrakajāto ko ambho purisa, kiɱ suko||
ādinnasipāṭiko,||
seyyathā pi sirīso' ti.|| ||

Tena kho pana bhikkhu samayena||
tādiso vassa kiɱ suko||
yathā tassa purisassa dassanaɱ.|| ||

Atha kho so bhikkhu puriso asantuṭṭho||
tassa purisassa [194] pañhavyākareṇana||
yenaññataro puriso kiɱ sukassa dassāvī ten'upasaŋkameyya,||
upasaŋkamitvā taɱ purisaɱ evaɱ vadeyya:|| ||

'Kīdiso bho purisa, kiɱ suko' ti?|| ||

So evaɱ vadeyya:|| ||

'Bahalapattapaḷāso ko ambho purisa, kiɱ suko||
sandacchāyo||
seyyathā pi nigrodho' ti.|| ||

Tena kho pana bhikkhu samayena||
tādisovassa kiɱ suko||
yathā tassa purisassa dassanaɱ.|| ||

Evam eva kho bhikkhu||
yathā yathā adhimuttānaɱ tesaɱ sappurisānaɱ||
dassanaɱ suvisuddhaɱ||
tathā tathā kho tehi||
sappurisehi vyākataɱ.|| ||

Seyyathā pi bhikkhū rañño paccantimaɱ nagaraɱ daḷahuddāpaɱ||
daḷha pākāratoraṇaɱ chadvāraɱ,||
tatr'assa dovāriko paṇḍito vyatto medhāvī aññātānaɱ nivāretā ñātānaɱ pavesetā.|| ||

Puratthimāya disāya āgantvā sīghaɱ||
dūtayugaɱ taɱ dovārikaɱ||
evaɱ vadeyya:|| ||

'Kaham bho purisa,||
imassa nagarassa nagarasāmī" ti?|| ||

So evaɱ vadeyya:|| ||

'Eso bhante majjhe siŋghāṭake nisinno' ti.|| ||

Atha kho taɱ sīghaɱ dūtayugaɱ nagarasāmissa yathābhūtaɱ vacanaɱ nīyyātetvā yathāgatamaggaɱ paṭipajjeyya.|| ||

Pacchimāya disāya āgantvā sīghaɱ||
dūtayugaɱ taɱ dovārikaɱ||
evaɱ vadeyya:|| ||

'Kaham bho purisa,||
imassa nagarassa nagarasāmī" ti?|| ||

So evaɱ vadeyya:|| ||

'Eso bhante majjhe siŋghāṭake nisinno' ti.|| ||

Atha kho taɱ sīghaɱ dūtayugaɱ nagarasāmissa yathābhūtaɱ vacanaɱ nīyyātetvā yathāgatamaggaɱ paṭipajjeyya.|| ||

Uttarāya disāya āgantvā sīghaɱ||
dutayugaɱ taɱ dovārikaɱ||
evaɱ vadeyya:|| ||

'Kaham bho purisa,||
imassa nagarassa nagarasāmī" ti?|| ||

So evaɱ vadeyya:|| ||

'Eso bhante majjhe siŋghāṭake nisinno' ti.|| ||

Atha kho taɱ sīghaɱ dūtayugaɱ nagarasāmissa yathābhūtaɱ vacanaɱ nīyyātetvā yathāgatamaggaɱ paṭipajjeyya.|| ||

Dakkhiṇāya disāya āgantvā sīghaɱ||
dūtayugaɱ taɱ dovārikaɱ||
evaɱ vadeyya:|| ||

'Kaham bho purisa,||
imassa nagarassa nagarasāmī" ti?|| ||

So evaɱ vadeyya:|| ||

'Eso bhante majjhe siŋghāṭake nisinno' ti.|| ||

Atha kho taɱ sīghaɱ dūtayugaɱ nagarasāmissa yathābhūtaɱ vacanaɱ nīyyātetvā yathāgatamaggaɱ paṭipajjeyya.|| ||

 


 

Upamā kho myāyaɱ bhikkhu katā atthassa viññāpanāya,||
ayañcevettha attho:|| ||

'Nagaran' ti kho bhikkhu||
imassetaɱ cātummahābhutikassa kāyassa adhivacanaɱ.|| ||

Mātāpettikasambhavassa||
odanakummāsūpacayassa||
aniccucchādana||
parimaddana-bhedana-viddaɱsana-dhammassa.|| ||

'Chadvāran' ti kho bhikkhu,||
chann'etaɱ ajjhattikānaɱ āyatanānaɱ adhivacanaɱ.|| ||

'Dovāriko' ti kho bhikkhu||
satiyā etaɱ adhivacanaɱ.|| ||

[195] 'Sīghaɱ dutayugan' ti kho bhikkhu||
samatha-vipassanān'etaɱ adhivacanaɱ.|| ||

'Nagarasāmi' ti kho bhikkhu viññāṇass'etaɱ adhivacanaɱ.|| ||

'Majjhe siŋghāṭako' ti kho bhikkhu||
catunn'etaɱ mahābhūtānaɱ adhivacanaɱ:||
paṭhavi-dhātuyā||
āpo-dhātuyā||
tejo-dhātuyā||
vāyo-dhātuyā.|| ||

'Yathābhutavacanan' ti kho bhikkhu||
nibbānassetaɱ adhivacanaɱ.|| ||

'Yathāgatamaggo' ti kho bhikkhu||
ariyass'etaɱ aṭṭhaŋgikassa maggassa adhivacanaɱ||
syeyathīdaɱ:|| ||

Sammā-diṭṭhiyā,||
sammā-saŋkappā,||
sammā-vācā,||
sammā-kammantā,||
sammā-ājīvā,||
sammā-vāyāmā,||
sammā-sati,||
sammā-samādhissā" ti.|| ||

 


Contact:
E-mail
Copyright Statement   Webmaster's Page