Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 206

Chappāṇaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[198]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Seyyathā pi, bhikkhave, puriso||
arugatto pakkagatto||
saravanaɱ paviseyya,||
tassa kusakaṇṭakā c'eva pāde vijejhayyuɱ,||
arapakkāni gattāni vilikkheyyuɱ.|| ||

Evaɱ hi so bhikkhave puriso bhiyyo somattāya tato nidānaɱ dukkhaɱ domanassaɱ paṭisaŋvediyetha.|| ||

Evam eva kho bhikkhave idh'ekacco bhikkhu gāmagato vā||
araññagato vā||
labhati cattāraɱ:|| ||

'Ayañ ca so āyasmā evaɱkārī evaɱ samācāro asuci gāmakaṇṭako' ti.|| ||

'Taɱ kaṇṭako' tī||
viditvā saɱvaro ca asaɱvaro ca veditabbo.|| ||

 


 

Kathañ ca bhikkhave asaɱvaro hoti?|| ||

Idha bhikkhave bhikkhu cakkhunā rūpaɱ disvā piyarūpe rūpe adhimuccati,||
appiyarūpe rūpe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde adhimuccati,||
appiyarūpe sadde vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe adhimuccati,||
appiyarūpe gandhe vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase adhimuccati,||
appiyarūpe rase vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe adhimuccati,||
appiyarūpe phoṭṭhabbe khyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme adhimuccati,||
appiyarūpe dhamme vyāpajjati,||
anupaṭṭhitakāyasati ca viharati parittacetaso,||
tañ ca ceto-vimuttiɱ paññā-vimuttiɱ yathābhūtaɱ nappajānāti||
yatth'assa te uppannā pāpakā akusalā dhammā aparisesā nirujjhanti.|| ||

Evaɱ kho bhikkhave asaɱvaro hoti.|| ||

 


 

Seyyathā pi, bhikkhave, puriso chappāṇake gahetvā nānā visaye nānāgocare daḷhāya bandheyya:|| ||

Ahiɱ gahetvā daḷhāya rajjuyā bandheyya,||
suɱsumāraɱ gahetvā daḷhāya rajjuyā bandheyya,||
pakkhiɱ gahetvā daḷhāya rajjuyā bandhayya,||
kukkuraɱ gahetvā daḷhāya rajjuyā [199] bandheyya,||
sigālaɱ gahetvā daḷhāya rajjuyā bandheyya,||
makkaṭaɱ gahetvā daḷhāya rajjuyā bandheyya.|| ||

Daḷhāya rajjuyā bandhitvā majjhe gaṇaṭhiɱ karitvā ossajjeyya,||
atha kho te bhikkhave chappāṇakā nānā visayā nānā gocarā sakaɱ sakaɱ gocaravisayaɱ āviñjeyyuɱ,|| ||

Ahi āviñjeyya vammikaɱ pavekkhāmīti,||
suɱsumāro āviñjeyya udakaɱ pavekkhāmīti,||
pakkhi āviñjeyya ākāsaɱ ḍessāmīti,||
kukkuro āviñjeyya gāmaɱ pavekkhāmīti,||
sigālo āviñjeyya sīvathikaɱ pavekkhāmīti,||
makkaṭo āviñjeyya vanaɱ pavekkhāmīti.|| ||

Yadā kho te bhikkhave chappāṇakā jhattā assu kilantā,||
atha yo n'esaɱ pāṇako.|| ||

Balavataro assa,||
tassa te anuppavatteyyuɱ,||
anuvidhāyeyyuɱ vasaɱ gaccheyyuɱ.|| ||

Evam eva kho bhikkhave yassa kassaci bhikkhuno kāyagatā-sati abhāvitā abahulīkatā,||
taɱ cakkhu āviñjati manāpikesu rūpesu,||
amanāpikassa rūpā paṭikkulā honti,||
sotaɱ āviñjati manāpikesu saddesu,||
amanāpikassa saddā paṭikkulā honti,||
ghānaɱ āviñjati manāpikesu gandhesu,||
amanāpikassa gandhā paṭikkulā honti,||
jivhā āviñjati manāpikesu rasesu,||
amanāpikassa rasā paṭikkulā honti,||
kāyo āviñjati manāpikesu phoṭṭhabbesu,||
amanāpikassa phoṭṭhabbā paṭikkulā honti,||
mano āviñjati manāpikesu dhammesu,||
amanāpikassa dhammā paṭikkulā honti.|| ||

Evaɱ kho bhikkhave asaɱvaro hoti.|| ||

Idha bhikkhave bhikkhu cakkhunā rūpaɱ disvā piyarūpe rūpe nādhimuccati,||
appiyarūpe rūpe na khyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde nādhimuccati,||
appiyarūpe sadde na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ ghāyitvā piyarūpe gandhe nādhimuccati,||
appiyarūpe gandhe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase nādhimuccati,||
appiyarūpe rase na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe nādhimuccati,||
appiyarūpe phoṭṭhabbe na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme nādhimuccati,||
appiyarūpe dhamme na vyāpajjati,||
upaṭṭhitakāyasati ca viharati appamāṇacetaso,||
tañ ca ceto-vimuttiɱ paññā-vimuttiɱ yathābhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Evaɱ kho bhikkhave saɱvaro hoti.|| ||

Seyyathā pi, bhikkhave, puriso chappāṇake gahetvā nānā visaye nānāgocare daḷhāya bandheyya:|| ||

Ahiɱ gahetvā daḷhāya rajjuyā bandheyya,||
suɱsumāraɱ gahetvā daḷhāya rajjuyā bandheyya,||
pakkhiɱ gahetvā daḷhāya rajjuyā bandhayya,||
kukkuraɱ gahetvā daḷhāya rajjuyā bandheyya,||
sigālaɱ gahetvā daḷhāya rajjuyā bandheyya,||
makkaṭaɱ gahetvā daḷhāya rajjuyā bandheyya.||
daḷhāya rajjuyā bandhitvā daḷhe khīle vā thamhe vā upanibandheyya.|| ||

Atha kho te bhikkhave chappāṇakā||
nānā visayā||
nānā gocarā||
sakaɱ sakaɱ gocaravisayaɱ āviñjeyyuɱ;||
ahi āviñjeyya vammikaɱ pavekkhāmīti,||
suɱsumāro āviñjeyya udakaɱ pavekkhāmīti,||
pakkhi āviñjeyya ākāsaɱ ḍessāmīti,||
kukkuro āviñjeyya gāmaɱ pavekkhāmīti,||
sigālo āviñjeyya sīvathikaɱ pavekkhāmīti,||
makkaṭo āviñjeyya vanaɱ pavekkhāmīti.|| ||

Yadā kho pana te bhikkhave chappāṇakā jhattā assu kilantā,||
atha tam eva khīlaɱ vā thamhaɱ vā upatiṭṭheyyuɱ,||
upanisīdeyyuɱ,||
upanipajjeyyuɱ,||
vasaɱ gaccheyyuɱ.|| ||

Evam eva kho bhikkhave yassa kassaci bhikkhuno kāyagatā-sati bhāvitā bahulīkatā,||
taɱ cakkhu nāviñjati manāpikesu rūpesu,||
amanāpikassa rūpāni nappaṭikkulā honti;||
sotaɱ nāviñjati manāpikesu saddesu,||
amanāpikassa saddāni nappaṭikkulā honti,||
ghānaɱ nāviñjati manāpikesu gandhesu,||
amanāpikassa gandhā nappaṭikkulā honti,||
jivhā nāviñjati manāpikesu rasesu,||
manāpikassa rasā nappaṭikkulā honti,||
kāyo nāviñjati manāpikesu phoṭṭhabbesu,||
amanāpikassa phoṭṭhabbā nappaṭikkulā honti,||
mano nāviñjati manāpikesu dhammesu,||
amanāpikassa dhammā nappaṭikkulā honti.|| ||

Evaɱ kho bhikkhave saɱvaro hoti.|| ||

Daḷhe khīle vā thamhe vā.|| ||

Ti kho bhikkhave kāyagatā-satiyā etaɱ adhivacanaɱ,||
tasmāt iha bhikkhave evaɱ sikkhitabbaɱ:|| ||

'Kāyagatā no sati bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā' ti,||
evaɱ hi vo bhikkhave sikkhitabban" ti.|| ||

 


Contact:
E-mail
Copyright Statement   Webmaster's Page