Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
36: Vedanā Saɱyutta
1. Sagāthā Vagga

Sutta 4

Pātāla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[206]

[1][pts][nypo][than][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Assutavā bhikkhave puthujjano evaɱ vācaɱ bhāsati:||
'atthi mahāsamudde pātālo' ti.|| ||

Taɱ kho pan'etaɱ bhikkhave assutavā puthujjano asantaɱ avijjamānaɱ evaɱ vācaɱ bhāsati:||
'atthi mahā samudde pātālo'ti.|| ||

Sārīrikānaɱ kho etaɱ bhikkhave dukkhānaɱ vedanānaɱ adhivacanaɱ yad idaɱ pātāloti.|| ||

Assutavā bhikkhave puthujjano sārīrikāya dukkhāya vedanāya phuṭṭho samāno socati kilamati paridevati urattāḷiɱ kandati sammohaɱ āpajjati.|| ||

Ayaɱ vuccati bhikkhave assutavā puthujjano pātāle na paccṭṭhāsi, gādhañca nājajhagā.|| ||

Sutavā bhikkhave ariyasāvako sārīrikāya dukkhāya vedanāya phuṭṭho samāno na sovati na kilamati na paridevati na urattāḷiɱ kandati na sammohaɱ āpajjati.|| ||

Ayaɱ vuccati bhikkhave Sutavā ariyasāvako pātāle paccuṭṭhāsi, gādhañca ajjhagāti.|| ||

 

Yo etā nādhivāseti||
uppannā vedanā dukhā.||
Sārīrikā pāṇaharā||
yāhi phuṭṭho pavedhati.|| ||

Akkandati parodati||
dubbalo appathāmako||
Na so pātāle paccuṭṭhāsi atho gādhampi nājajhagā.|| ||

[207] Yo cetā adhivāseti||
uppannā vedanā dukhā.||
Sārīrikā pāṇaharā||
yāhi phuṭṭho na vedhati||
Sa ce pātāle paccuṭṭhāsi atho gādhampi ajjhagā ti.|| ||

 


Contact:
E-mail
Copyright Statement   Webmaster's Page