Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
36: Vedanā Saɱyutta
1. Sagāthā Vagga

Sutta 10

Phassamūlaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][nypo][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

[215] "Tisso imā bhikkhave vedanā phassajā phassamūlakā phassa nidānā phassa-paccayā.|| ||

Katamā tisso?|| ||

Sukhā vedanā dukkhā vedanā adukkha-m-asukhā vedanā. Sukhavedaniyaɱ bhikkhave phassaɱ paṭicca uppajjati sukhā vedanā.|| ||

Tass'eva sukhavedaniyassa phassassa nirodhā yaɱ tajjaɱ vedayitaɱ, sukhavedaniyaɱ phassaɱ paṭicca uppannā sukhā vedanā sā nirujjhati, sā vūpasammati;|| ||

Dukkhavedaniyaɱ bhikkhave phassaɱ paṭicca uppajjati dukkhā vedanā tass'eva dukkhavedaniyassa phassassa nirodhā yaɱ tajjaɱ vedayitaɱ dukkhavedaniyaɱ phassaɱ paṭicca uppannā dukkhā vedanā sā nirujajhati, sā vūpasammati.|| ||

Adukkha-m-asukha-vedanīyaɱ bhikkhave phassaɱ paṭicca uppajjati adukkha-m-asukhā vedanā.|| ||

Tass'eva adukkha-m-asukhavedanīyassa phassassa nirodhā yaɱ tajjaɱ vedayitaɱ adukkha-m-asukhavedanīyaɱ phassaɱ paṭicca uppannā adukkha-m-asukhā vedanā sā nirujajhati, sā vūpasammati.|| ||

seyyathā pi, bhikkhave, dvinnaɱ kaṭṭhānaɱ saŋghaṭṭhanasamodhānā usmā jāyati tejo abhinibbattati, tesaɱ yeva kaṭṭhānaɱ nānā bhāvā vinikkhepā yā tajjā usmā sā nirujajhati, sā vūpasammati.|| ||

Evam eva kho bhikkhave imā tisso vedanā phassajā phassamūlakā phassanidānā phassa-paccayā tajjaɱ tajjaɱ phassaɱ paṭicca tajjā tajjā vedanā uppajjanti.|| ||

Tajjassa tajjassa phassassa nirodhā tajjā tajjā vedanā nirujajhantī ti.|| ||

 


Contact:
E-mail
Copyright Statement   Webmaster's Page