Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
36. Vedanā Saɱyutta
2. Raho-Gata Vagga

Sutta 19

Pañca-k-aŋga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[223]

[1][pts][bodh][nypo] Evaɱ me sutaɱ:|| ||

Atha kho Pañca-k-aŋgo thapati yen'āyasmā Udāyī ten'upasankami.|| ||

Upasaŋkamitvā āyasmantaɱ Udāyiɱ abhivādetvā eka-m-antaɱ nisīdi.|| ||

Eka-m-antaɱ nisinno kho Pañca-k-aŋgo thapati āyasmantaɱ Udāyiɱ etad avoca:|| ||

"Kati nu kho bhante Udāyī vedanā vuttā Bhagavatā" ti?|| ||

"Tisso kho gahapati vedanā vuttā Bhagavatā:||
sukhā vedanā,||
dukkhā vedanā,||
adukkha-m-asukhā vedanā.|| ||

Imā kho gahapati tisso vedanā vuttā Bhagavatā" ti.|| ||

Evaɱ vutte Pañca-k-aŋgo thapati āyasmantaɱ Udāyiɱ etad avoca:|| ||

"Na kho bhante Udāyi tisso vedanā vuttā Bhagavatā.|| ||

Dve bhante vedanā vuttā Bhagavatā||
sukhā vedanā||
dukkhā-vedanā.|| ||

Yāyaɱ bhante adukkha-m-asukhā vedanā,||
sattasmiɱ esā paṇite sukhe vuttā Bhagavatā" ti.|| ||

Dutiyam pi kho āyasmā Udāyi Pañca-k-aŋgaɱ thapatiɱ etad avoca:|| ||

"Na kho gahapati dve vedanā vuttā Bhagavatā,||
tisso vedanā vuttā Bhagavatā:||
sukhā vedanā,||
dukkhā vedanā,||
adukkha-m-asukhā vedanā.|| ||

Imā tisso vedanā vuttā Bhagavatā" ti.|| ||

Dutiyam pi kho Pañca-k-aŋgo thapati āyasmantaɱ [224] Udāyiɱ etad avoca:|| ||

"Na kho bhante Udāyi tisso vedanā vuttā Bhagavatā,||
dve vedanā vuttā Bhagavatā:||
sukhā vedanā,||
dukkhā vedanā.|| ||

Yāyaɱ bhante adukkha-m-asukhā vedanā santasmiɱ esā paṇīte sukhe vuttā Bhagavatā" ti.|| ||

Tatiyam pi kho āyasmā Udāyi Pañca-k-aŋgaɱ thapati etad avoca:|| ||

"Na kho gahapati dve vedanā vuttā Bhagavatā,||
tisso vedanā vuttā Bhagavatā:||
sukhā vedanā,||
dukkhā vedanā,||
adukkha-m-asukhā vedanā.|| ||

Imā tisso vedanā vuttā Bhagavatā" ti.|| ||

Tatiyam pi kho Pañca-k-aŋgo thapati āyasmantaɱ Udāyiɱ etad avoca:|| ||

"Na kho bhante Udāyi tisso vedanā vuttā Bhagavatā,||
dve vedanā vuttā Bhagavatā:||
sukhā vedanā,||
dukkhā vedanā.|| ||

Yāyaɱ bhante adukkha-m-asukhā vedanā santasmiɱ esā paṇīte sukhe vuttā Bhagavatā" ti.|| ||

N'eva kho asakkhi āyasmā Udāyī Pañca-k-aŋgaɱ thapatiɱ saññāpetuɱ,||
na pana asakkhi Pañca-k-aŋgo thapati āyasmantaɱ Udāyiɱ saññāpetuɱ.|| ||

 

§

 

Assosi kho āyasmā Ānando āyasmato Udāyissa Pañca-k-aŋgena thapatinā saddhiɱ imaɱ kathā-sallāpaɱ.|| ||

Atha kho āyasmā Ānando yena Bhagavā ten'upasankami.|| ||

Upasaŋkamitvāeka-m-antaɱ nisīdi.|| ||

Eka-m-antaɱ nisinno kho āyasmā Ānando yāvatako āyasmato Udāyissa Pañca-k-aŋgena thapatinā saddhiɱ ahosi kathā-sallāpo taɱ sabbaɱ Bhagavato ārocesi.|| ||

"Santaɱ yeva kho Ānanda pariyāyaɱ Pañca-k-aŋgo thapati Udāyissa bhikkhuno nābbhanumodi,||
santañ ca pan'Ānanda pariyāyaɱ Udāyi bhikkhu Pañca-k-aŋgassa thapatino nābbhanumodi.|| ||

Dve pi mayā Ānanda vedanā vuttā pariyāyena.|| ||

Tisso pi mayā vedanā vuttā pariyāyena.|| ||

Pañca pi mayā vedanā vuttā pariyāyena.|| ||

Cha pi mayā vedanā vuttā pariyāyena.|| ||

Aṭṭhārasā pi mayā vedanā vuttā pariyāyena.|| ||

Chattiɱsā pi mayā vedanā vuttā pariyāyena.|| ||

[225] Aṭṭhasatam pi mayā vedanā vuttā pariyāyena.|| ||

Evaɱ pariyāya-desito kho Ānanda mayā dhammo.|| ||

Evaɱ pariyāya desite kho Ānanda mayā dhamme ye añña-maññassa su-bhāsitaɱ sulapitaɱ na samanumaññissanti||
na samanujānissanti||
na samanumodissanti.|| ||

Tessam etaɱ pāṭikaŋakhaɱ bhanḍana-jātā kalaha-jātā vivādāpannā añña-maññaɱ mukhasatatīhi vitudantā viharissantī.|| ||

Evaɱ pariyāya-desito kho Ānanda mayā dhammo|| ||

Evaɱ pariyāya desite kho Ānanda mayā dhamme ye añña-maññassa su-bhāsitaɱ sulapitaɱ samanumaññissanti samanujānissanti,||
samanumodissanti.|| ||

Tesaɱ etaɱ pāṭikaŋkhaɱ,||
samaggā sammodamānā avivadamānā khīrodakī bhūtā añña-maññaɱ piyacakkhūhī sampassantā viharissantī.|| ||

Pañc'ime Ānanda kāma-guṇā.|| ||

Katame pañca?|| ||

Cakkhu-viññeyyā rūpā||
iṭṭhā kantā manāpā piya-rūpā||
kām'ūpasaɱ-hitā rajanīyā.|| ||

Sota-viññeyyā saddā||
iṭṭhā kantā manāpā piya-rūpā||
kām'ūpasaɱ-hitā rajanīyā.|| ||

Ghāna-viññeyyā gandhā||
iṭṭhā kantā manāpā piya-rūpā||
kām'ūpasaɱ-hitā rajanīyā.|| ||

Jivhā-viññeyyā rasā||
iṭṭhā kantā manāpā piya-rūpā||
kām'ūpasaɱ-hitā rajanīyā.|| ||

Kāya-viññeyyā phoṭṭhabbā||
iṭṭhā kantā manāpā piya-rūpā||
kām'ūpasaɱ-hitā rajanīyā.|| ||

Ime kho Ānanda pañca kāma-guṇā.|| ||

Yaɱ kho Ānanda ime pañca kāma-guṇe paṭicca||
uppajjati sukhaɱ somanassaɱ,||
idaɱ vuccati kāma-sukhaɱ.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
vivicc'eva kāmehi||
vivicca akusalehi dhammehi||
sa-vitakkaɱ||
sa-vicāraɱ||
viveka-jaɱ||
pīti-sukhaɱ||
paṭhamaɱ-jhānaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañ ca.|| ||

[226] Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhi-jaɱ||
pīti-sukhaɱ||
dutiyaɱ-jhānaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
pītiyā ca virāgā||
upekkhako ca viharati||
sato ca sampajāno sukhañ ca||
kāyena paṭisaŋvedeti,||
yan taɱ ariyā ācikkhanti,||
'Upekkhako satimā sukha-vihārī' ti,||
taɱ tatiyaɱ-jhānaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sukhassa ca pahānā||
dukkhassa ca pahānā||
pubb'eva somanassa-domanassānaɱ attha-gamā||
adukkha-m-asukhaɱ||
upekkhāsati||
pārisuddhiɱ||
catutthaɱ-jhānaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sabbaso rūpa saññānaɱ samati-k-kamā||
paṭigha-saññānaɱ attha-gamā||
nānatta-saññānaɱ||
amanasi-kārā ananto||
'ākāso' ti||
Ākāsanañ-c'āyatanaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ [227] nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sabbaso Ākāsanañ-c'āyatanaɱ samati-k-kamma||
'Anantaɱ viññāṇan' ti||
viññāṇañvāyatanaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sabbaso viññāṇañvākāsānañ samati-k-kamma||
'N'atthi Kiñci' ti||
Ākiñ caññ'āyatanam upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sabbaso ākiñcāyatanaɱ samati-k-kamma||
n'evasaññnāsaññāyatanaɱ upasampajja viharati.|| ||

Idaɱ kho Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho Ānanda evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nes'āhaɱ nānujānāmi.|| ||

Taɱ kissa hetu?|| ||

Atth'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ c'Ānanda etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idh'Ānanda bhikkhu||
sabbaso N'eva-saññā-nā-saññ'āyatanaɱ samati-k-kamma||
saññā-vedayita-nirodhaɱ upasampajja viharati.|| ||

Idaɱ kho [228] Ānanda etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ṭhānaɱ kho pan'etaɱ Ānanda vijjati yaɱ añña-titthiyā paribbājakā evaɱ vadeyyuɱ:|| ||

'Saññā-vedayita-nirodhaɱ Samaṇo Gotamo āha,||
tañ ca sukhasmiɱ paññāpeti,||
tayidaɱ kiɱ su tayidaɱ kathaɱsū' ti?|| ||

Evaɱ vādino Ānanda añña-titthiyā paribbājakā evam assu vacanīyā:|| ||

'Na kho āvuso Bhagavā sukhaɱ yeva vedanaɱ sandhāya sukhasmiɱ paññāpeti,||
yattha yatth'āvuso sukhaɱ upalabbhati,||
yaɱ hi yaɱ hi sukhaɱ taɱ||
taɱ Tathāgato sukhasmiɱ paññāpetī" ti.|| ||

 


Contact:
E-mail
Copyright Statement