Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
36: Vedanā Saɱyutta
II. Rahogata Vagga

Sutta 20

Bhikkhunā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Dve pi mayā bhikkhave vedanā vuttā pariyāyena.|| ||

Tisso pi mayā vedanā vuttā pariyāyena.|| ||

Pañca pi mayā vedanā vuttā pariyāyena.|| ||

Cha pi mayā vedanā vuttā pariyāyena.|| ||

Aṭṭhārasā pi mayā vedanā vuttā pariyāyena.|| ||

Chattiɱsā pi mayā vedanā vuttā pariyāyena.|| ||

Aṭṭhasatam pi mayā vedanā vuttā pariyāyena.|| ||

Evaɱ pariyāyadesito kho bhikkhave mayā dhammo.|| ||

Evaɱ pariyāya desite kho bhikkhave mayā dhamme ye aññamaññassa subhāsitaɱ sulapitaɱ na samanumaññissanti||
na samanujānissanti||
na samanumodissanti.|| ||

Tessam etaɱ pāṭikaŋakhaɱ bhanḍanajātā kalaha-jātā vivādāpannā aññamaññaɱ mukhasatatīhi vitudantā viharissantī.|| ||

Evaɱ pariyāyadesito kho bhikkhave mayā dhammo|| ||

Evaɱ pariyāya desite kho bhikkhave mayā dhamme ye aññamaññassa subhāsitaɱ sulapitaɱ samanumaññissanti samanujānissanti,||
samanumodissanti.|| ||

Tesaɱ etaɱ pāṭikaŋkhaɱ,||
samaggā sammodamānā avivadamānā khīrodakī bhūtā aññamaññaɱ piyacakkhūhī sampassantā viharissantī.|| ||

Pañc'ime bhikkhave kāmaguṇā.|| ||

Katame pañca?|| ||

Cakkhu-viññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sota-viññeyyā saddā iṭṭhā kantā manāpā piyarūpā kāmūpasaɱhitā rajanīyā.|| ||

Ghāna-viññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhā-viññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāya-viññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho bhikkhave pañca kāmaguṇā.|| ||

Yaɱ kho bhikkhave ime pañca kāmaguṇe paṭicca uppajjati sukhaɱ somanassaɱ,||
idaɱ vuccati kāmasukhaɱ.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
vivicc'eva kāmehi||
vivicca akusalehi dhammehi||
savitakkaɱ||
savicāraɱ||
vivekajaɱ||
pīti-sukhaɱ||
paṭhamaɱ-jhānaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhijaɱ||
pīti-sukhaɱ||
dutiyaɱ-jhānaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
pītiyā ca virāgā||
upekkhako ca viharati||
sato ca sampajāno sukhañ ca||
kāyena paṭisaŋvedeti,||
yan taɱ ariyā ācikkhanti,||
'Upekkhako satimā sukha-vihārī' ti,||
taɱ tatiyaɱ-jhānaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sukhassa ca pahānā||
dukkhassa ca pahānā||
pubb'eva somanassa-domanassānaɱ attha-gamā||
adukkha-m-asukhaɱ||
upekkhāsati||
pārisuddhiɱ||
catutthaɱ-jhānaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sabbaso rūpa saññānaɱ samatikkamā||
paṭigha-saññānaɱ attha-gamā||
nānattasaññānaɱ||
amanasi-kārā ananto||
'ākāso' ti||
ākāsānañcāyatanaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sabbaso ākāsānañcāyatanaɱ samatikkamma||
'Anantaɱ viññāṇan' ti||
viññāṇañvāyatanaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sabbaso viññāṇañvākāsānañ samatikkamma||
'Natthi kiñci' ti||
ākiñcaññāyatanam upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sabbaso ākiñcāyatanaɱ samatikkamma||
n'evasaññnāsaññāyatanaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ye kho bhikkhave evaɱ vadeyyuɱ:|| ||

'Etaɱ paramaɱ sattā sukhaɱ somanassaɱ paṭisaŋvedentī' ti.|| ||

Idaɱ nesāhaɱ nānujānāmi.|| ||

Taɱ kissa hetu?|| ||

Attha bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca.|| ||

Katamañ ca bhikkhave etamhā sukhā||
aññaɱ sukhaɱ||
abhikkantatarañ ca||
paṇītatarañ ca?|| ||

Idha bhikkhave bhikkhu||
sabbaso n'eva-saññā-nāsaññāyatanaɱ samatikkamma||
saññā-vedayita-nirodhaɱ upasampajja viharati.|| ||

Idaɱ kho bhikkhave etamhā sukhā||
aññaɱ sukhaɱ||
abhikkantarañ ca||
paṇītatarañca.|| ||

Ṭhānaɱ kho pan'etaɱ bhikkhave vijjati yaɱ aññatitthiyā paribbājakā evaɱ vadeyyuɱ:|| ||

'Saññā-vedayita-nirodhaɱ Samaṇo Gotamo āha,||
tañ ca sukhasmiɱ paññāpeti,||
tayidaɱ kiɱ su tayidaɱ kathaɱsū' ti?|| ||

Evaɱ vādino bhikkhave aññatitthiyā paribbājakā evam assu vacanīyā:|| ||

'Na kho āvuso Bhagavā sukhaɱ yeva vedanaɱ sandhāya sukhasmiɱ paññāpeti,||
yattha yatthāvuso sukhaɱ upalabbhati,||
yaɱ hi yaɱ hi sukhaɱ taɱ||
taɱ Tathāgato sukhasmiɱ paññāpetī" ti.|| ||

 


Contact:
E-mail
Copyright Statement   Webmaster's Page