Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
36: Vedanā Saɱyutta
III. Aṭṭhasata-Pariyāya Vagga

Sutta 21

MoḷiyaSīvaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][than][nypo] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Moliya-Sīvako paribbājako yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Moḷiya-Sīvako paribbājako Bhagavantaɱ etad avoca:|| ||

"Santi hi bho Gotama eke samaṇa-brāhmaṇā evaɱ-vādino evaɱ-diṭṭhino:|| ||

'Yaɱ kiñcāyaɱ purisapuggalo paṭisaŋvedeti sukhaɱ vā dukkhaɱ vā adukkha-m-asukhaɱ vā||
sabbantaɱ pubbe katahetu' ti.|| ||

Idha pana bhavaɱ Gotamo kim āhā" ti?|| ||

 


 

"Pittasamuṭṭhānāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā pittasamuṭṭhānāni pi idhekaccāni vedayitāni uppajjanti.|| ||

Lokassa pi kho etaɱ Sīvaka saccasammataɱ,||
yathā pittasamuṭṭhānāni pi idhekaccāni vedayitāni uppajjanti.|| ||

Tatra Sīvaka ye te samaṇa-brāhmaṇā evaɱ-vādino evaɱ-diṭṭhino:|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā||
sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Semhasamuṭṭhānāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā semhasamuṭṭhānāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā semhasamuṭṭhānāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino:|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā||
sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Vātasamuṭṭhānāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā vātasamuṭṭhānāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā vātasamuṭṭhānāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Sannipātikāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā sannipātikāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā sannipātikāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Utupariṇāmajāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā utupariṇāmajāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā utupariṇāmajāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Visamaparihārajāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā visamaparihārajāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā visamaparihārajāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Opakkamikāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā opakkamikāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā opakkamikāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi.|| ||

Kammavipākajāni pi kho Sīvaka idhekaccāni vedayitāni uppajjanti.|| ||

Sāmam pi kho etaɱ Sīvaka veditabbaɱ,||
yathā kammavipākajāni pi idhekaccāni vedayitāni uppajjantī.|| ||

Lokassa pi kho etaɱ Sīvaka saccasammataɱ,||
yathā kammavipākajāni pi idhekaccāni vedayitāni upapajjanti.|| ||

Tatra Sīvaka ye te samaṇa-brāhmaṇā evaɱ vādino evaɱ-diṭṭhino|| ||

'Yaɱ kiñcāyaɱ purisapuggalo paṭisaŋvediyati sukhaɱ vā dukkhaɱ vā adukkha-m-asukhaɱ vā sabbantaɱ pubbe katahetu,' ti.|| ||

Yaṇ ca sāmaɱ ñātaɱ||
tañ ca atidhāvanti,||
yañ ca loke saccasammataɱ||
tañ ca atidhāvanti.|| ||

Tasmā tesaɱ samaṇa-brāhmaṇānaɱ micchāti vadāmi" ti.|| ||

Evaɱ vutte Moliya-Sīvako paribbājako Bhagavantaɱ etad avoca:|| ||

"Abhikkantaɱ bho Gotama!|| ||

Abhikkantaɱ bho Gotama!|| ||

Seyyathā pi bho Gotama nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya,||
evam eva gotā Gotamena aneka-pariyāyena dhammo pakāsito.|| ||

Esāhaɱ bhavantaɱ Gotamaɱ saraṇaɱ gacchāmi||
dhammañ ca||
bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱ gatan" ti.|| ||

 

Pittaɱ semhañca vāto ca||
sannipātā utuni ca||
Visamaɱ opakkamiko ca||
kammavipākena aṭṭhamīti.|| ||

 


Contact:
E-mail
Copyright Statement   Webmaster's Page