Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
36: Vedanā Saɱyutta
III. Aṭṭhasata-Pariyāya Vagga

Sutta 22

Aṭṭhasata-Pariyāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][nypo][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Aṭṭhasatapariyāyaɱ vo bhikkhave dhamma-pariyāyaɱ desissāmi taɱ suṇātha.|| ||

Katamo ca bhikkhave aṭṭhasatapariyāyo dhamma-pariyāyo?|| ||

Dve pi mayā bhikkhave vedanā vuttā pariyāyena,||
tisso pi mayā vedanā vuttā pariyāyena,||
pañca pi mayā vedanā vuttā pariyāyena,||
cha pi mayā vedanā vuttā pariyāyena,||
aṭṭhārasā pi mayā vedanā vuttā pariyāyena,||
chattiɱsā pi mayā vedanā vuttā pariyāyena,||
aṭṭhasatam pi mayā vedanā vuttā pariyāyena.|| ||

Katamā ca bhikkhave dve vedanā?|| ||

Kāyikā ca,||
cetasikā ca.|| ||

Imā vuccanti bhikkhave dve vedanā.|| ||

[232] Katamā ca bhikkhave tisso vedanā?|| ||

Sukhā vedanā||
dukkhā vedanā||
adukkha-m-asukhā vedanā.|| ||

Imā vuccanti bhikkhave tisso vedanā.|| ||

Katamā ca bhikkhave pañca vedanā?|| ||

Sukhindriyaɱ||
dukkhindriyaɱ||
somanassindriyaɱ||
domanassindriyaɱ||
upekkhindriyaɱ.|| ||

Imā vuccanti bhikkhave pañca vedanā.|| ||

Katamā ca bhikkhave cha vedanā?|| ||

Cakkhusamphassajā vedanā||
sotasamphassajā vedanā||
ghānasamphassajā vedanā||
jivhāsamphassajā vedanā||
kāyasamphassajā vedanā||
manosamphassajā vedanā.|| ||

Imā vuccanti bhikkhave cha vedanā.|| ||

Katamā ca bhikkhave aṭṭhārasa vedanā?|| ||

Cha somanassupavicārā||
cha domanassupavicārā||
cha upekkhūpavicārā.|| ||

Imā vuccanti bhikkhave aṭṭhārasa vedanā.|| ||

Katamā ca bhikkhave chattiɱsa vedanā?|| ||

Cha gehasitāni somanassāni||
cha nekkhammasitāni somanassāni||
cha gehasitāni domansāni||
cha nekkhammasitāni domanassāni||
cha gehasitā upekkho||
cha nekkhammasitā upekkhā.|| ||

Imā vuccanti bhikkhave chattiɱsa vedanā.|| ||

Katamā ca bhikkhave aṭṭhasata vedanā?|| ||

Atītā chattiɱsa vedanā,||
anāgatā chattiɱsa vedanā,||
paccuppannā chattiɱsa vedanā.|| ||

Imā vuccanti bhikkhave aṭṭhasatavedanā.|| ||

Ayaɱ bhikkhave aṭṭhasatapariyāyo dhamma-pariyāyoti.|| ||

 


Contact:
E-mail
Copyright Statement   Webmaster's Page