Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga
36: Vedanā Saɱyutta
III. Aṭṭhasata-Pariyāya Vagga

Sutta 29

Suddhika-Vedanā Nirāmisam Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][nypo] Evaɱ me sutaɱ:|| ||

Tisso imā bhikkhave vedanā.|| ||

Katamā tisso?|| ||

Sukhā vedanā||
dukkhā vedanā||
adukkha-m-asukhā vedanā.|| ||

Imā kho bhikkhave tisso vedanāti.|| ||

[WP,ATI: 31. Nirāmisa Suttaɱ]

[31.1][ati] Atthi bhikkhave sāmisā pīti,||
atthi nirāmisā pīti,||
atthi nirāmisā nirāmisatarā pīti.|| ||

Atthi sāmisaɱ sukhaɱ,||
atthi nirāmisaɱ sukhaɱ,||
atthi nirāmisā nirāmisataraɱ sukhaɱ.|| ||

Atthi sāmisā upekhā,||
atthi nirāmisā upekhā,||
atthi nirāmisā nirāmisatarā upekhā.|| ||

Atthi sāmiso vimokkho,||
atthi nirāmiso vimokkho,||
atthi nirāmisā nirāmisataro vimokkho.|| ||

Katamā ca bhikkhave sāmisā pīti?|| ||

Pañcime bhikkhave kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho bhikkhave pañcakāmaguṇā.|| ||

Ya kho bhikkhave ime pañca kāmaguṇe paṭicca uppajjati pīti,||
ayaɱ vuccati bhikkhave sāmisā pīti.|| ||

[236] Katamā ca bhikkhave nirāmisā pīti?|| ||

Idha bhikkhave bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajajhānaɱ upasampajja viharati,||
vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyajajhānaɱ upasampajja viharati.|| ||

Ayaɱ vuccati bhikkhave nirāmisā pīti.|| ||

Katamā ca bhikkhave nirāmisā nirāmisatarā pīti?|| ||

Yā kho bhikkhave khīṇāsavassa bhikkhuno rāgā cittaɱ vimuttaɱ paccavekkhato dosā cittaɱ vimuttaɱ paccavekkhato mohā cittaɱ vimuttaɱ paccavekkhato uppajjati pīti.|| ||

Ayaɱ vuccati bhikkhave nirāmisā nirāmisatarā pīti.|| ||

Katamañ ca bhikkhave sāmisaɱ sukhaɱ?|| ||

Pañcime bhikkhave kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho bhikkhave pañcakāmaguṇā.|| ||

Yaɱ kho bhikkhave ime pañca kāmaguṇe paṭicca uppajjati sukhaɱ somanassaɱ,||
idaɱ vuccati bhikkhave sāmisaɱ sukhaɱ.|| ||

Katamañ ca bhikkhave nirāmisā sukhaɱ?|| ||

Idha bhikkhave bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamajajhānaɱ upasampajja viharati,||
vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyajajhānaɱ upasampajja viharati,||
pītiyā ca virāgā upekkhako ca viharati sato sampajāno sukhañca kāyena paṭisaŋvedeti,||
yaɱ taɱ ariyā ācikkhanti||
'Upekkhako satimā sukha-vihārī' ti||
taɱ tatiyajajhānaɱ upasampajja viharati.|| ||

Idaɱ vuccati bhikkhave nirāmisaɱ sukhaɱ.|| ||

Katamañ ca bhikkhave nirāmisā nirāmisataraɱ sukhaɱ?|| ||

Yaɱ kho bhikkhave khīṇāsavassa bhikkhuno rāgā cittaɱ vimuttaɱ paccavekkhato dosā cittaɱ vimuttaɱ paccavekkhato mohā cittaɱ vimuttaɱ [237] paccavekkhato uppajjati sukhaɱ somanassaɱ,||
idaɱ vuccati bhikkhave nirāmisānirāmisataraɱ sukhaɱ.|| ||

Katamā ca bhikkhave sāmisā upekhā?|| ||

Pañcime bhikkhave kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho bhikkhave pañcakāmaguṇā.|| ||

Yā kho bhikkhave ime pañca kāmaguṇe paṭicca uppajjati upekhā,||
ayaɱ vuccati bhikkhave sāmisā upekhā.|| ||

Katamā ca bhikkhave nirāmisā upekhā?|| ||

Idha bhikkhave bhikkhu sukhassa ca pahānā dukkhassa ca pahānā pubb'eva somanassa-domanassānaɱ atthaŋgamā adukkha-m-asukhaɱ upekhāsatipārisuddhiɱ catutthajajhānaɱ upasampajja viharati.|| ||

Ayaɱ vuccati bhikkhave nirāmisā upekhā.|| ||

Katamā ca bhikkhave nirāmisā nirāmisatarā upekhā?|| ||

Yā kho bhikkhave khīṇāsavassa bhikkhuno rāgā cittaɱ vimuttaɱ paccavekkhato dosā cittaɱ vimuttaɱ paccavokkhato mohā cittaɱ vimuttaɱ paccavekkhato uppajjati upekhā,||
ayaɱ vuccati bhikkhave nirāmisā nirāmisatarā upekhā.|| ||

Katamo ca bhikkhave sāmiso vimokkho?|| ||

Rūpapaṭisaññutto vimokkho sāmiso vimokkho.|| ||

Katamo ca bhikkhave nirāmiso vimokkho?|| ||

Arūpapaṭisaññutto vimokkho nirāmiso vimokkho.|| ||

Katamo ca bhikkhave nirāmisā nirāmisataro vimokkho?|| ||

Yo kho bhikkhave khīṇāsavassa bhikkhuno rāgā cittaɱ vimuttaɱ paccavekkhato dosaɱ cittaɱ vimuttaɱ paccavekkhato mohā cittaɱ vimuttaɱ paccavekkhato uppajjati vimokkho,||
ayaɱ vuccati bhikkhave nirāmisā nirāmisataro vimokkhoti.|| ||

 

Aṭṭhasatapariyāyavaggo tatiyo.|| ||

 


Contact:
E-mail
Copyright Statement   Webmaster's Page