Saɱyutta Nikāya
4. Saḷāyatana Vagga
40. Moggallāna Saɱyutta

Sutta 5

Ākāsanañ-c'Āyatana Suttaɱ

 

---

[266]

[1][pts][olds] Evaɱ me sutaɱ:|| ||

Ekaɱ samayaɱ āyasmā Mahā Moggallāno Sāvatthiyaɱ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuɱ.|| ||

Āyasmā Mahā Moggallāno etad avoca:|| ||

"Idha mayhaɱ āvuso raho-gatassa paṭīsallīnassa
evaɱ cetaso parivitakko udapādi:|| ||

'"Ākāsanañ-c'āyatanaɱ,||
Ākāsanañ-c'āyatanan" ti vuccati.|| ||

Katamaɱ nu kho Ākāsanañ-c'āyatanan' ti?|| ||

Tassa mayhaɱ āvuso etad ahosi:|| ||

'Idha bhikkhu||
sabbaso rūpa-saññānaɱ samati-k-kamā||
paṭigha-saññānaɱ attha-gamā||
nānatta-saññānaɱ amana-sikārā||
"Ananto ākāso" ti||
Ākāsanañ-c'āyatanaɱ upasampajja viharati.|| ||

Idaɱ vuccati "Ākāsanañ-c'āyatanan" ti' ti.|| ||

So khvāhaɱ āvuso||
sabbaso rūpa-saññānaɱ samati-k-kamā||
paṭigha-saññānaɱ attha-gamā||
nānatta-saññānaɱ amana-sikārā||
'Ananto ākāso' ti||
Ākāsanañ-c'āyatanaɱ upasampajja viharāmi||
tassa mayhaɱ āvuso||
iminā vihārena viharato||
rūpa-sahagatā saññā-mana-sikārā samud'ācaranti.|| ||

Atha kho maɱ āvuso Bhagavā iddhiyā upasankamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
Ākāsanañ-c'āyatanaɱ pamādo,||
ākāsānāñcāyatane cittaɱ saṇṭhapehi,||
ākāsānāñcāyatane cittaɱ ekodiɱ-karohi,||
ākāsānāñcāyatane cittaɱ samādahā' ti.|| ||

So khvāhaɱ āvuso||
aparena samayena||
sabbaso rūpa-saññānaɱ samati-k-kamā||
paṭigha-saññānaɱ attha-gamā||
nānatta-saññānaɱ amana-sikārā||
'Ananto ākāso' ti||
Ākāsanañ-c'āyatanaɱ upasampajja vihāsiɱ.|| ||

Yaɱ hi taɱ āvuso sammā vadamāno vadeyya:|| ||

'Satthārānuggahito sāvako mahābhiññataɱ patto' ti,|| ||

mamantaɱ sammā vadamāno vadeyya,|| ||

'Satthārānuggahito sāvako mahābhiññataɱ patto' ti" ti.|| ||