Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
IV. Saḷāyatana Vagga
40. Moggallāna Saɱyutta

Sutta 6

Viññānañ-c'āyatana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evaɱ me sutaɱ:|| ||

Ekaɱ samayaɱ āyasmā Mahā Moggallāno Sāvatthiyaɱ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuɱ.|| ||

Āyasmā Mahā Moggallāno etad avoca:|| ||

"Idha mayhaɱ āvuso raho-gatassa paṭīsallīnassa
evaɱ cetaso parivitakko udapādi:|| ||

'"Viññānañ-c'āyatanaɱ,||
Viññānañ-c'āyatanan" ti vuccati.|| ||

Katamaɱ nu kho Viññānañ-c'āyatanan' ti?|| ||

[267] Tassa mayhaɱ āvuso etad ahosi:|| ||

Idha bhikkhu||
sabbaso Ākāsanañ-c'āyatanaɱ samati-k-kamma||
'Anantaɱ viññāṇan' ti||
Viññāṇañ-c'āyatanaɱ upasampajja viharati.|| ||

Idaɱ vuccati Viññānañ-c'āyatanan ti.|| ||

So khvāhaɱ āvuso||
sabbaso Ākāsanañ-c'āyatanaɱ samati-k-kamma||
'Anantaɱ viññāṇan' ti||
Viññāṇañ-c'āyatanaɱ upasampajja viharāmi||
tassa mayhaɱ āvuso||
iminā vihārena viharato||
Ākāsanañ-c'āyatanasahagatā saññā-mana-sikārā samud'ācaranti.|| ||

Atha kho maɱ āvuso Bhagavā iddhiyā upasankamitvā etad avoca:|| ||

"Moggallāna!|| ||

Moggallāna!|| ||

Mā brāhmaṇa,||
Viññāṇañ-c'āyatanaɱ pamādo,||
viññānañcāyatane cittaɱ saṇṭhapehi,||
viññānañcāyatane cittaɱ ekodiɱ-karohi,||
viññānañcāyatane cittaɱ samādahā" ti.|| ||

So khvāhaɱ āvuso||
aparena samayena||
sabbaso Ākāsanañ-c'āyatanaɱ samati-k-kamma||
'Anantaɱ viññāṇan' ti||
Viññāṇañ-c'āyatanaɱ upasampajja vihāsiɱ.|| ||

Yaɱ hi taɱ āvuso sammā vadamāno vadeyya:|| ||

"Satthārānuggahito sāvako mahābhiññataɱ patto" ti,|| ||

mamantaɱ sammā vadamāno vadeyya,|| ||

"Satthārānuggahito sāvako mahābhiññataɱ patto" ti.|| ||

 


Contact:
E-mail
Copyright Statement