Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
41: Citta Saɱyuttaɱ

Sutta 2

Isidatta Suttaɱ (1)

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]Evaɱ me sutaɱ:|| ||

Ekaɱ samayaɱ sambahulā therā bhikkhu Macchikāsaṇḍe viharanti Ambāṭakavane.|| ||

Atha kho Citto gahapati yena therā bhikkhu ten'upasaŋkami|| ||

Upasaŋkamitvā there bhikkhu abhivādetvā eka-m-antaɱ nisīdi.|| ||

Eka-m-antaɱ nisinno kho Citto gahapati||
there bhikkhū etad avoca:|| ||

"Adhivāsentu me bhante therā svātanāya bhattan" ti.|| ||

Adhivāsesuɱ ca kho therā bhikkhu tuṇhībhāvena.|| ||

[284]Atha kho Citto gahapati therānaɱ bhikkhūnaɱ adhivāsanaɱ viditvā uṭṭhāy āsanā there bhikkhū abhivādetvā padakkhiṇaɱ katvā pakkāmi.|| ||

Atha kho therā bhikkhu tassā rattiyā accayena pubbanhasamayaɱ nivāsetvā pattacīvaram ādāya yena Cittassa gahapatino nivesanaɱ ten'upasaŋkamiɱsu.|| ||

Upasaŋkamitvā paññatte āsane nisīdiɱsu.|| ||

Atha kho Citto gahapati yena therā bhakkhū ten'upasaŋkami.|| ||

Upasaŋkamitvā there bhikkhū abhivādetvā eka-m-antaɱ nisīdi.|| ||

Eka-m-antaɱ nisinno kho Citto gahapati āyasmantaɱ theraɱ etad avoca:|| ||

"'Dhātu-nānattaɱ dhātu-nānattan' ti||
bhante therā vuccati.|| ||

Kittāvatā nu kho bhante dhātu-nānattaɱ vuttaɱ Bhagavatā" ti|| ||

Evaɱ vutte āyasmā thero tuṇhī ahosi.|| ||

■|| ||

Dutiyam pi Citto gahapati āyasmantaɱ theraɱ etad avoca:|| ||

"'Dhātu-nānattaɱ dhātu-nānattan' ti||
bhante therā vuccati.|| ||

Kittāvatā nu kho bhante dhātu-nānattaɱ vuttaɱ Bhagavatā" ti|| ||

Dutiyam pi kho āyasmā thero tuṇhī ahosi.|| ||

Tatiyam pi Citto gahapati āyasmantaɱ theraɱ etad avoca:|| ||

"'Dhātu-nānattaɱ dhātu-nānattan' ti||
bhante therā vuccati.|| ||

Kittāvatā nu kho bhante dhātu-nānattaɱ vuttaɱ Bhagavatā" ti|| ||

Tatiyam pi kho āyasmā thero tuṇhī ahosi.|| ||

 


 

Tena kho pana samayena āyasmā Isidatto tasmiɱ bhikkhu saṅghe sabbanavako hoti.|| ||

Atha kho āyasmā Isidatto āyasmantaɱ theraɱ etad avoca:|| ||

"Vyākaromahaɱ bhante thera Cittassa gahapatino etaɱ pañhan" ti?|| ||

"Vyākarohi tvaɱ āvuso Isidatta Cittassa gahapatino etaɱ pañhan" ti.|| ||

"Evaɱ hi tvaɱ gahapati pucchasi:|| ||

'Dhātu-nānattaɱ dhātu-nānattan' ti||
bhante thera vuccati.|| ||

Kittāvatā nu kho bhante dhātu-nānattaɱ vuttaɱ Bhagavatā' ti?"|| ||

[285] "Evaɱ bhante".|| ||

"Idaɱ kho gahapati dhātu-nānattaɱ vuttaɱ Bhagavatā:|| ||

Cakkhudhātu rūpadhātu cakkhu-viññāṇadhātu,||
sotadhātu saddadhātu sota-viññāṇadhātu,||
ghānadhātu gandhadhātu ghāna-viññāṇadhātu,||
jivhādhātu rasadhātu jivhā-viññāṇadhātu,||
kāyadhātu phoṭṭhabbadhātu kāya-viññāṇadhātu,||
manodhātu dhammadhātu mano-viññāṇadhātu.|| ||

Ettāvatā nu kho gahapati dhātu-nānattaɱ vuttaɱ Bhagavatā" ti.|| ||

Atha kho Citto gahapati āyasmato Isidattassa bhāsitaɱ abhinanditvā||
anumoditvā there bhikkhū paṇītena khādanīyena bhojanīyena sahatthā santappesi,||
sampavāresi.|| ||

Atha kho therā bhikkhū bhuttāvino onītapattapāṇino uṭṭhāy āsanā pakkamiɱsu.|| ||

Atha kho āyasmā thero āyasmantaɱ Isidattaɱ etad avoca:|| ||

"Sādhu kho tvaɱ āvuso Isidatta eso pañho paṭibhāsi,||
neso pañho maɱ paṭibhāsi,||
tena hāvuso Isidatta yadā aññadā pi||
evarūpo pañho āgaccheyya||
taɱyevettha paṭibhāseyyā" ti.|| ||

 


Contact:
E-mail
Copyright Statement   Webmaster's Page