Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
41: Citta Saɱyuttaɱ

Sutta 3

Dutiya Isidatta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ sambahulā therā bhikkhu Macchikāsaṇḍe viharanti Ambāṭakavane.|| ||

Atha kho Citto gahapati yena therā bhikkhu ten'upasaŋkami|| ||

Upasaŋkamitvā there bhikkhu abhivādetvā eka-m-antaɱ nisīdi.|| ||

Eka-m-antaɱ nisinno kho Citto gahapati||
there bhikkhū etad avoca:|| ||

"Adhivāsentu me bhante therā svātanāya bhattan" ti.|| ||

Adhivāsesuɱ ca kho therā bhikkhu tuṇhībhāvena.|| ||

Atha kho Citto gahapati therānaɱ bhikkhūnaɱ adhivāsanaɱ viditvā uṭṭhāy āsanā there bhikkhū abhivādetvā padakkhiṇaɱ katvā pakkāmi.|| ||

Atha kho therā bhikkhu tassā rattiyā accayena pubbanhasamayaɱ nivāsetvā pattacīvaram ādāya yena Cittassa gahapatino nivesanaɱ ten'upasaŋkamiɱsu.|| ||

Upasaŋkamitvā paññatte āsane nisīdiɱsu.|| ||

[286] Atha kho Citto gahapati yena therā bhakkhū ten'upasaŋkami.|| ||

Upasaŋkamitvā there bhikkhū abhivādetvā eka-m-antaɱ nisīdi.|| ||

Eka-m-antaɱ nisinno kho Citto gahapati āyasmantaɱ theraɱ etad avoca:|| ||

"Yā imā bhante thera anekavihitā diṭṭhiyo loke uppajjanti:|| ||

'Sassato loko', ti vā,||
'asassato loko' ti, vā,||
'antavā loko' ti, vā||
'anantavā loko' ti, vā,||
'taɱ jīvaɱ taɱ sarīran' ti, vā,||
'aññaɱ jīvaɱ aññaɱ sarīran' ti, vā,||
'hoti Tathāgato param maraṇā' ti, vā,||
'na hoti Tathāgato param maraṇā' ti, vā,||
'hoti ca na ca hoti Tathāgato param maraṇā' ti, vā,||
'n'eva hoti na na hoti Tathāgato param maraṇā' ti, vā,||
yāni cimāni dvāsaṭṭhi diṭṭhigatāni Brahmajāle bhaṇitāni.|| ||

Imā nu kho bhante diṭṭhiyo||
kismiɱ sati honti||
kismiɱ asati na hontī" ti?|| ||

Evaɱ vutte āyasmā thero tuṇhī ahosi.|| ||

Dutiyam pi kho Citto gahapati āyasmantaɱ theraɱ etad avoca:|| ||

"Yā imā bhante thera anekavihitā diṭṭhiyo loke uppajjanti:|| ||

'Sassato loko', ti vā,||
'asassato loko' ti, vā,||
'antavā loko' ti, vā||
'anantavā loko' ti, vā,||
'taɱ jīvaɱ taɱ sarīran' ti, vā,||
'aññaɱ jīvaɱ aññaɱ sarīran' ti, vā,||
'hoti Tathāgato param maraṇā' ti, vā,||
'na hoti Tathāgato param maraṇā' ti, vā,||
'hoti ca na ca hoti Tathāgato param maraṇā' ti, vā,||
'n'eva hoti na na hoti Tathāgato param maraṇā' ti, vā,||
yāni cimāni dvāsaṭṭhi diṭṭhigatāni Brahmajāle bhaṇitāni.|| ||

Imā nu kho bhante diṭṭhiyo||
kismiɱ sati honti||
kismiɱ asati na hontī" ti?|| ||

Dutiyam pi kho āyasmā thero tuṇhī ahosi.|| ||

Tatiyam pi kho Citto gahapati āyasmantaɱ theraɱ etad avoca:|| ||

"Yā imā bhante thera anekavihitā diṭṭhiyo loke uppajjanti:|| ||

'Sassato loko', ti vā,||
'asassato loko' ti, vā,||
'antavā loko' ti, vā||
'anantavā loko' ti, vā,||
'taɱ jīvaɱ taɱ sarīran' ti, vā,||
'aññaɱ jīvaɱ aññaɱ sarīran' ti, vā,||
'hoti Tathāgato param maraṇā' ti, vā,||
'na hoti Tathāgato param maraṇā' ti, vā,||
'hoti ca na ca hoti Tathāgato param maraṇā' ti, vā,||
'n'eva hoti na na hoti Tathāgato param maraṇā' ti, vā,||
yāni cimāni dvāsaṭṭhi diṭṭhigatāni Brahmajāle bhaṇitāni.|| ||

Imā nu kho bhante diṭṭhiyo||
kismiɱ sati honti||
kismiɱ asati na hontī" ti?|| ||

Tatiyam pi kho āyasmā thero tuṇhī ahosi.|| ||

 


 

Tena kho pana samayena āyasmā Isidatto tasmiɱ bhikkhu saṅghe sabbanavako hoti.|| ||

Atha kho āyasmā Isidatto āyasmantaɱ theraɱ etad avoca:|| ||

"Vyākaromahaɱ bhante thera Cittassa gahapatino etaɱ pañhan" ti?|| ||

"Vyākarohi tvaɱ āvuso Isidatta Cittassa gahapatino etaɱ pañhan" ti.|| ||

[287] "Evaɱ hi tvaɱ gahapati pucchasi:|| ||

"Yā imā bhante thera anekavihitā diṭṭhiyo loke uppajjanti:|| ||

'Sassato loko', ti vā,||
'asassato loko' ti, vā,||
'antavā loko' ti, vā||
'anantavā loko' ti, vā,||
'taɱ jīvaɱ taɱ sarīran' ti, vā,||
'aññaɱ jīvaɱ aññaɱ sarīran' ti, vā,||
'hoti Tathāgato param maraṇā' ti, vā,||
'na hoti Tathāgato param maraṇā' ti, vā,||
'hoti ca na ca hoti Tathāgato param maraṇā' ti, vā,||
'n'eva hoti na na hoti Tathāgato param maraṇā' ti, vā,||
yāni cimāni dvāsaṭṭhi diṭṭhigatāni Brahmajāle bhaṇitāni.|| ||

Imā nu kho bhante diṭṭhiyo||
kismiɱ sati honti||
kismiɱ asati na hontī" ti?|| ||

"Evaɱ bhante."|| ||

"Yā imā gahapati anekavihitā diṭṭhiyo loke uppajjanti:|| ||

'Sassato loko', ti vā,||
'asassato loko' ti, vā,||
'antavā loko' ti, vā||
'anantavā loko' ti, vā,||
'taɱ jīvaɱ taɱ sarīran' ti, vā,||
'aññaɱ jīvaɱ aññaɱ sarīran' ti, vā,||
'hoti Tathāgato param maraṇā' ti, vā,||
'na hoti Tathāgato param maraṇā' ti, vā,||
'hoti ca na ca hoti Tathāgato param maraṇā' ti, vā,||
'n'eva hoti na na hoti Tathāgato param maraṇā' ti, vā,||
yāni cimāni dvāsaṭṭhi diṭṭhigatāni Brahmajāle bhaṇitāni.|| ||

Imā kho gahapati diṭṭhiyo sakkāya diṭṭhiyā sati honti||
sakkāya diṭṭhiyā asati na hontī" ti.|| ||

 


 

"Katham pana bhante sakkāya diṭṭhi hotī" ti?|| ||

Idha gahapati assutavā puthujjano||
ariyānaɱ adassāvī||
ariya-Dhammassa akovido||
ariya-Dhamme avinīto||
sappurisānaɱ adassāvī||
sappurisa-Dhammassa akovido||
sappurisa-Dhamme avinīto:|| ||

Rūpaɱ attato samanupassati,||
rūpavantaɱ vā attānaɱ,||
attani vā rūpaɱ,||
rūpasmiɱ vā attānaɱ;|| ||

Vedanaɱ attato samanupassati,||
vedanāvantaɱ vā attānaɱ,||
attani vā vedanaɱ,||
vedanāsmiɱ vā attānaɱ;|| ||

Saññaɱ attato samanupassati,||
saññāvantaɱ vā attānaɱ,||
attani vā saññaɱ,||
saññāsmiɱ vā attānaɱ;|| ||

Sankhāre attato samanupassati,||
sankhārevantaɱ vā attānaɱ,||
attani vā sankhāre,||
sankhāresmiɱ vā attānaɱ;|| ||

Viññāṇaɱ attato samanupassati,||
viññāṇavantaɱ vā attānaɱ,||
attani vā viññāṇaɱ,||
viññāṇasmiɱ vā attānaɱ;|| ||

evaɱ kho gahapati sakkāyadiṭṭhi hotī" ti.|| ||

 


 

"Katham pana bhante sakkāya diṭṭhi na hotī" ti?|| ||

"Idha gahapati Sutavā ariyasāvako||
ariyānaɱ dassāvī||
ariya-Dhammassa kovido||
ariya-Dhamme suvinīto||
sappurisānaɱ dassāvī||
sappurisa-Dhammassa kovido||
sappurisa-Dhamme suvinīto:|| ||

Na rūpaɱ attato samanupassati,||
na rūpavantaɱ vā attānaɱ,||
na attani vā rūpaɱ,||
na rūpasmiɱ vā attānaɱ;|| ||

Na vedanaɱ attato samanupassati,||
na vedanāvantaɱ vā attānaɱ,||
na attani vā vedanaɱ,||
na vedanāsmiɱ vā attānaɱ;|| ||

Na saññaɱ attato samanupassati,||
na saññāvantaɱ vā attānaɱ,||
na attani vā saññaɱ,||
na saññāsmiɱ vā attānaɱ;|| ||

Na sankhāre attato samanupassati,||
na sankhārevantaɱ vā attānaɱ,||
na attani vā sankhāre,||
na sankhāresmiɱ vā attānaɱ;|| ||

Na viññāṇaɱ attato samanupassati,||
na viññāṇavantaɱ vā attānaɱ,||
na attani vā viññāṇaɱ,||
na viññāṇasmiɱ vā attānaɱ;|| ||

evaɱ kho gahapati sakkāyadiṭṭhi na hotī" ti.|| ||

 


 

[288] "Kuto bhante ayyo Isidatto āgacchatī" ti?|| ||

"Avantiyā khvāhaɱ gahapati āgacchāmi" ti.|| ||

"Atthi bhante Avantiyā Isidatto nāma kulaputto||
amhākaɱ adiṭṭhasahāyo pabbajito diṭṭho so āyasmā" ti?|| ||

"Evaɱ gahapatī" ti.|| ||

"Kahaɱ nu kho so bhante āyasmā etarahi viharatī" ti?|| ||

Evaɱ vutte āyasmā Isidatto tuṇhī ahosi.|| ||

"Ayyo no bhante Isidatto" ti?|| ||

"Evaɱ gahapatī" ti.|| ||

 


 

Abhiramatu bhante ayyo Isidatto Macchikāsaṇḍe, ramaṇīyaɱ Ambāṭakavanaɱ,||
ahaɱ ayyassa Isidattassa ussukkaɱ karissāmi||
cīvara-piṇḍapāta-senāsana-gilānapaccaya-bhesajjaparikkhārānanti."|| ||

"Kalyāṇaɱ vuccati gahapatī" ti.|| ||

Atha kho Citto gahapati āyasmato Isidattassa bhāsitaɱ abhinanditvā||
anumoditvā there bhikkhū paṇītena khādanīyena bhojanīyena sahatthā santappesi,||
sampavāresi.|| ||

Atha kho therā bhikkhū bhuttāvino onītapattapāṇino uṭṭhāy āsanā pakkamiɱsu.|| ||

Atha kho āyasmā thero āyasmantaɱ Isidattaɱ etad avoca:|| ||

"Sādhu kho tvaɱ āvuso Isidatta eso pañho paṭibhāsi,||
neso pañho maɱ paṭibhāsi,||
tena hāvuso Isidatta yadā aññadā pi||
evarūpo pañho āgaccheyya||
taɱ yevettha paṭibhāseyyā" ti.|| ||

Atha kho āyasmā Isidatto senāsanaɱ saɱsāmetvā pattacīvaraɱ ādāya Macchikāsaṇḍe pakkāmi,||
yaɱ Macchikāsaṇḍe pakkāmi||
tathā pakkanto va ahosi,||
na puna paccāgañjiti.|| ||

 


Contact:
E-mail
Copyright Statement   Webmaster's Page