Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
41: Citta Saɱyuttaɱ

Sutta 7

Godatta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ āyasmā godatto Macchikāsaṇḍe viharati ambāṭakavane, [296] atha kho Citto gahapati yenāyasmā godatto ten'upasaŋkami, upasaŋkamitvā āyasmantaɱ godattaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho cittaɱ gahapatiɱ āyasmā godatto etad avoca:|| ||

Yā cāyaɱ gahapati appamāṇā ceto-vimutti,||
yā ca ākiñcaññā ceto-vimutti yā ca suññatā ceto-vimutti yā ca animittā ceto-vimutti,||
ime dhammā nānatthā nānā vyañjanā?|| ||

Udāhū ekatthā vyāñjanameva nānanti?|| ||

Atthi bhante pariyāyo yaɱ pariyāyaɱ āgamma ime dhammā nānatthā c'eva nānāvyañjanā ca,||
ati pana bhante pariyāyo yaɱ pariyāyaɱ āgamma ime dhammā ekatthā vyāñjanameva nānanti.|| ||

Katamo ca pana bhante pariyāyo yaɱ pariyāyaɱ āgamma ime dhammā nānatthā c'eva nānāvyañjanā ca:|| ||

Idha bhante bhikkhu mettā-sahagatena cetasā ekaɱ disaɱ pharitvā viharati,||
tathā dutiyaɱ, tathā tatiyaɱ,||
tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena pharitvā viharati.|| ||

Idha bhante bhikkhu karuṇā-sahagatena cetasā ekaɱ disaɱ pharitvā viharati,||
tathā dutiyaɱ, tathā tatiyaɱ,||
tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena pharitvā viharati.|| ||

Idha bhante bhikkhu muditā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena pharitvā viharati.|| ||

Idha bhante bhikkhu upekkhā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ,||
iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena pharitvā viharati.|| ||

Ayaɱ vuccati bhante appamāṇā ceto-vimutti.|| ||

Katamā ca bhante ākiñcaññāceto-vimutti:|| ||

Idha bhante bhikkhu sabbaso viññāṇañcāyatanaɱ samatikkamma||
'N'atthi kiñcī' ti||
ākiñcaññāyatanaɱ upasampajja viharati,||
ayaɱ vuccati bhante ākiñcaññāceto-vimutti.|| ||

Katamā ca bhante suññatāceto-vimutti:|| ||

Idha bhante bhikkhu araññagato vā rukkhamūlagato vā suññāgāragato vā itipaṭisaɱcikkhati suññamidaɱ attena [297] vā attaniyena vā, ayaɱ vuccati bhante suññātāceto-vimutti.|| ||

Katamā ca bhante animittāceto-vimutti:|| ||

Idha bhante bhikkhu sabbanimittānaɱ amanasi-kārā animittaɱ ceto samādhiɱ upasampajja viharati, ayaɱ vuccati bhante animittāceto-vimutti.|| ||

Ayaɱ kho bhante pariyāyo yaɱ pariyāyaɱ āgamma ime dhammā nānatthā c'eva nānāvyañjanā ca.|| ||

Katamo ca bhante pariyāyo yaɱ pariyāyaɱ āgamma ime dhammā ekatthā vyañjanameva nānaɱ:|| ||

Rāgo kho bhante pamāṇakaraṇo doso pamāṇakaraṇo moho pamāṇakaraṇo,||
te khīṇāsavassa bhikkhuno pahīnā ucchinnamūlā tālāvatthukatā anabhāvakatā āyatiɱ anuppādadhammā.|| ||

Yāvatā kho bhante appamāṇā cetovimUttiyo akuppā tāsaɱ ceto-vimutti aggam akkhāyati.|| ||

Sā kho panākuppā ceto-vimutti suññā rāgena suññā dosena suññā mohena.|| ||

Rāgo kho bhante kiñcanaɱ doso kiñcanaɱ moho kiñcanaɱ,||
te khīṇāsavassa bhikkhuno pahīnā uccinnamūlā tālāvatthukatā anabhāvakatā āyatiɱ anuppādadhammā.|| ||

Yāvatā kho bhante ākiñcaññā cetovimUttiyo akuppā tāsaɱ ceto-vimutti aggam akkhāyati; sā kho panākuppā ceto-vimutti suññā rāgena suññā dosena suññā mohena.|| ||

Rāgo kho bhante nimittakaraṇo doso nimittakaraṇo moho nimittakaraṇo,||
te khīṇāsavassa bhikkhuno pahīnā ucchinnamūlā tālāvatthukatā anabhāvakatā āyatiɱ anuppādadhammā.|| ||

Yāvatā kho bhante animittā cetovimUttiyo akuppā tāsaɱ ceto-vimutti aggam akkhāyati;||
sā kho panākuppā ceto-vimutti suññā rāgena suññā dosena suññā mohena.|| ||

Ayaɱ kho bhante pariyāyo yaɱ pariyāyaɱ āgamma ime dhammā ekatthā vyañjanameva nānanti.|| ||

Lābhā te gahapati suladdhante gahapati yassa te gambhīre Buddhavacane paññācakkhu kamatī ti.|| ||

 


Contact:
E-mail
Copyright Statement   Webmaster's Page