Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
41: Citta Saɱyuttaɱ

Sutta 8

Nigaṇṭha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Tena kho pana samayena Nigaṇṭho Nātaputto Macchikāsaṇḍaɱ [298] anuppatto hoti mahatiyā Nigaṇṭhaparisāya saddhiɱ,||
assosi kho Citto gahapati Nigaṇṭho kira Nātaputto Macchikāsaṇḍaɱ anuppatto mahatiyā Nigaṇṭhaparisāya saddhinti.|| ||

Atha kho Citto gahapati sambahulehi upāsakehi saddhiɱ yena Nigaṇṭho Nātaputto ten'upasaŋkami,||
upasaŋkamitvā nigaṇṭhena nātaputtena saddhiɱ sammodi sammodanīyaɱ kathaɱ sārāṇīyaɱ vītisāretvā eka-m-antaɱ nisīdi,||
eka-m-antaɱ nisinnaɱ kho cittaɱ gahapatiɱ Nigaṇṭho Nātaputto etad avoca:|| ||

Saddahasi tvaɱ gahapati samaṇassa Gotamassa atthi avitakko avicāro samādhi,||
atthi vitakka vicāranaɱ nirodhoti.|| ||

Na khvāhaɱ ettha bhante Bhagavato saddhāya gacchāmi:||
atthi avitakko avicāro samādhi,||
atthi vitakka-vicārānaɱ nirodhoti.|| ||

Evaɱ vutte Nigaṇṭho Nātaputto sakaɱ parisaɱ ulloketvā etad avoca:|| ||

Idaɱ bhavanto passantu yāvaujuko cāyaɱ Citto gahapati,||
yāva asaṭho cāyaɱ Citto gahapati,||
yāva amāyāvī cāyaɱ Citto gahapati,||
vātaɱ vā so jālena bādhetabbaɱ maññeyya yo vitakkavicāre nirodhetabbaɱ maññeyya,||
sakamuṭṭhinā vā so gaŋgāya sotaɱ āvāretabbaɱ maññeyyāti.|| ||

Yo vitakka vicāre nirodhetabbaɱ maññeyyāti.|| ||

Taɱ kim maññasi bhante katamaɱ nu kho paṇītataraɱ ñāṇaɱ vā saddhā vāti.|| ||

Saddhāya kho gahapati ñāṇaɱ yeva paṇītataraɱ.|| ||

Ahaɱ kho bhante yāvad eva ākaŋkhāmi vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja [299] viharāmi,||
ahaɱ kho bhante yāvad eva ākaŋkhāmi vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharāmi.|| ||

Pītiyā ca virāgā ca upekkhako ca viharati sato ca sampajāno,||
sukhañca kāyena paṭisaŋvedeti.|| ||

Yaɱ taɱ ariyā ācikkhanti:||
'Upekkhako satimā sukha-vihārī' ti,||
tatiyaɱ-jhānaɱ upasampajja viharāmi.|| ||

Ahaɱ kho bhante yāvad eva ākaŋkhāmi sukhassa ca pahāṇā dukkhassa ca pahāṇā pubb'eva somanassa-domanassānaɱ atthaŋgamā adukkhaɱ-asukhaɱ upekkhāsatiparisuddhiɱ catutthaɱ-jhānaɱ upasampajja viharāmi.|| ||

Na so khvāhaɱ bhante evaɱ jānanto evaɱ passanto kassa aññassa samaṇassa vā brāhmaṇassa vā saddhāya gamissāmi||
"atthi avitakko avicāro samādhi atthi vitakka-vicārānaɱ nirodho" ti.|| ||

Evaɱ vutte Nigaṇṭho Nātaputto sakaɱ parisaɱ ulloketvā etad avoca:|| ||

Idaɱ bhavanto passantu:||
yāva anujjuko cāyaɱ Citto gahapati,||
yāva saṭho cāyaɱ Citto gahapati,||
yāva māyāvī cāyaɱ citto gahapatīti||
idan'eva kho te mayaɱ bhante bhāsitaɱ evaɱ ājānāma:||
"idaɱ bhavanto passantu yāva ujuko cāyaɱ Citto gahapati,||
yāva asaṭho cāyaɱ Citto gahapati,||
yāva amāyāvī cāyaɱ Citto gahapati,||
idan'eva ca pana te mayaɱ bhante bhāsitaɱ evaɱ ājānāma:|| ||

"Idaɱ bhavanto passantu,||
yāva anujjuko cāyaɱ Citto gahapati,||
yāva saṭho cāyaɱ Citto gahapati,||
yāva māyāvī cāyaɱ citto gahapatī" ti.|| ||

Sace te bhante purimaɱ saccaɱ pacjimaɱ te micchā,||
sace pana te bhante pacchimaɱ saccaɱ purimaɱ te micchā.|| ||

Ime kho pana bhante dasa sahadhammikā pañhā āgacchanti,||
yadā tesaɱ atthaɱ ājāneyyāsi atha maɱ paṭihareyyāsi saddhiɱ Nigaṇṭha parisāya,||
'eko pañho, eko uddeso, ekaɱ veyyākaraṇaɱ,||
dve pañhā, dve uddesā, dve veyyākaraṇāni,||
tayo pañhā, tayo uddesā, tīṇī veyyākaraṇāni,||
cattāro pañhā, cattāro uddesā, cattārī veyyākaraṇāni,||
pañca pañhā, pañca uddesā, pañca veyyākaraṇāni,||
cha pañhā, cha uddesā, cha veyyākaraṇāni,||
satta pañhā, satta uddesā, satta veyyākaraṇāni,||
aṭṭha pañhā, [300] aṭṭha uddesā, aṭṭha veyyākaraṇāni,||
nava pañhā, nava uddesā, nava veyyākaraṇāni,||
dasa pañhā, dasa uddesā, dasa veyyākaraṇānī' ti.|| ||

Atha kho Citto gahapati Nigaṇṭhaɱ Nātaputtaɱ ime dasa sahadhammike pañhe āpucchitvā uṭṭhāy āsanā pakkāmīti.|| ||

 


Contact:
E-mail
Copyright Statement   Webmaster's Page