Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
41: Citta Saɱyuttaɱ

Sutta 10

Gilāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Tena kho pana samayena Citto gahapati ābādhiko hoti dukkhito bāḷhagilāno.|| ||

Atha kho sambahulā ārāmadevatā||
vanadevatā||
rukkhadevatā||
osadhī tiṇa vanaspatīsu adhivatthā devatā||
saŋgamma samāgamma Cittaɱ gahapatiɱ etad avocuɱ:|| ||

"Paṇidhehi gahapati:|| ||

'Anāgatam addhānaɱ rājā assaɱ cakkavattī'" ti.|| ||

Evaɱ vutte Citto gahapati tā ārāmadevatā||
vanadevatā||
rukkhadevatā||
osadhī tiṇa vanaspatīsu adhivatthā devatā||
etad avoca:|| ||

"Tam pi aniccaɱ,||
tam pi addhuvaɱ||
tam pi pahāya gamanīyan" ti.|| ||

Evaɱ vutte Cittassa gahapatino mittāmaccā ñātisālohitā [303] Cittaɱ gahapatiɱ etad avocuɱ:|| ||

"Satiɱ ayyaputta upaṭṭhapehi mā vippalapī" ti.|| ||

"Kinnāhaɱ vadāmi yaɱ maɱ tumhe evaɱ vadetha:|| ||

'Sati ayya putta upaṭṭhapehi mā vippalapī' ti?|| ||

"Evaɱ kho tvaɱ ayyaputta vadesi:|| ||

'Tam pi aniccaɱ,||
tam pi addhuvaɱ||
tam pi pahāya gamanīyan' ti.|| ||

"Tathā hi pana maɱ ārāmadevatā||
vanadevatā||
rukkhadevatā||
osadhī tiṇa vanaspatīsu adhivatthā devatā||
evam āhaɱsu:|| ||

'Paṇidhehi gahapati anāgatam addhānaɱ rājā assaɱ catkavattī' ti.|| ||

Tāsāhaɱ evaɱ vadāmi:|| ||

'Tam pi aniccaɱ,||
tam pi addhuvaɱ||
tam pi pahāya gamanīyan'" ti.|| ||

"Kinte ayyaputta ārāmadevatā||
vanadevatā||
rukkhadevatā||
osadhī tiṇa vanaspatīsu adhivatthā devatā||
atthavasaɱ sampassamānā evam āhaɱsu:|| ||

'Paṇidhehi gahapati anāgatam addhānaɱ rājā assaɱ cakkavattī'" ti?|| ||

"Tāsaɱ kho ārāmadevatānaɱ||
vanadevatānaɱ||
rukkhadevatānaɱ||
osadhī tiṇa vanaspatīsu adhivatthānaɱ devatānaɱ||
evaɱ hoti:|| ||

'Ayaɱ kho Citto gahapati sīlavā kalyāṇadhammo,||
sace paṇidahissati:|| ||

"Anāgatam addhānaɱ rājā assaɱ cakkavattī" ti,|| ||

ijjhissati sīlavato cetopaṇidhi,||
visuddhattā,||
dhammiko dhammikaɱ phalaɱ,||
anusarissatī' ti.|| ||

Imaɱ kho ārāmadevatā||
vanadevatā||
rukkhadevatā||
osadhī tiṇa vanaspatīsu adhivatthā devatā||
atthavasaɱ sampassamānā evam āhaɱsu:|| ||

"Paṇidhehi gahapati anāgatam addhānaɱ rājā assaɱ cakkavattī" ti,|| ||

tāsāhaɱ evaɱ vadāmi:|| ||

"Tam pi aniccaɱ,||
tam pi addhuvaɱ||
tam pi pahāya gamanīyan"'" ti.|| ||

"Tena hi ayyaputta amhe pi ovadehī"ti.|| ||

"Tasmāt iha vo evaɱ sikkhitabbaɱ:|| ||

[304] 'Buddhe aveccappasādena samannāgatā bhavissāma:|| ||

"Iti pi so Bhagavā arahaɱ sammā sambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā" ti.|| ||

Dhamme aveccappasādena samannāgatā bhavissāma:|| ||

"Svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī" ti.|| ||

Saŋghe aveccappasādena samannāgatā bhavissāma:|| ||

"Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni aṭṭhapurisapuggalā esa Bhagavato sāvakasaŋgho āhuneyyo pāhuneyyo dakkhiṇeyyo añjalikaraṇīyo anuttaraɱ puññakkhettaɱ lokassā"' ti.|| ||

Yaɱ kho pana kiñci kule deyyadhammaɱ sabbantaɱ appaṭivibhattaɱ bhavissati sīlavantehi kalyāṇadhammehī" ti.|| ||

Evaɱ hi vo sikkhitabban" ti.|| ||

Atha kho Citto gahapati mittāmacce ñātisālohite Buddhe ca dhamme ca saŋghe ca pasāde cāge ca samādapetvā kālam akāsīti.|| ||

 

Cittavaggo paṭhamo

 


Contact:
E-mail
Copyright Statement   Webmaster's Page