Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
42: Gāmani Saɱyuttaɱ

Sutta 2

Tālapuṭa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandaka nivāpe.|| ||

Atha kho Tālapuṭo naṭagāmaṇī yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho tālapuṭo naṭagāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ naṭānaɱ bhāsamānānaɱ yo so naṭo raŋgamajjhe samajjamajejha saccālikena janaɱ bhāseti rameti,||
so kāyassa bhedā param maraṇā pahāsānaɱ devānaɱ sahavyataɱ uppajjatī ti.|| ||

Idha Bhagavā kimāhā" ti?|| ||

"Alaɱ gāmaṇī tiṭṭhate taɱ,||
mā maɱ etaɱ pucchi" ti.|| ||

Dutiyam pi kho Tālapuṭo naṭagāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ naṭānaɱ bhāsamānānaɱ yo so naṭo raŋgamajjhe samajjamajejha saccālikena janaɱ bhāseti rameti,||
so kāyassa bhedā param maraṇā pahāsānaɱ devānaɱ sahavyataɱ uppajjatī ti.|| ||

Idha Bhagavā kimāhā" ti?|| ||

"Alaɱ gāmaṇī tiṭṭhate taɱ,||
mā maɱ etaɱ pucchi" ti.|| ||

Tatiyam pi kho tālapuṭo naṭagāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ naṭānaɱ bhāsamānānaɱ yo so naṭo raŋgamajjhe samajjamajejha saccālikena janaɱ bhāseti rameti,||
[307] so kāyassa bhedā param maraṇā pahāsānaɱ devānaɱ sahavyataɱ uppajjatī ti.|| ||

Idha Bhagavā kimāhā" ti?|| ||

"Addhā kho tyāhaɱ gāmaṇī na labhāmi:|| ||

'Alaɱ gāmaṇī tiṭṭhate taɱ,||
mā maɱ etaɱ pucchi' ti.|| ||

Api ca tyāhaɱ vyākarissāmi.|| ||

Pubbe kho gāmaṇī,||
sattā avītarāgā rāgabandhanabaddhā,||
tesaɱ naṭo raŋgamajjhe samajjamajjhe ye dhammā rajanīyā te upasaŋharati bhiyyo sarāgāya.|| ||

Pubbe kho gāmaṇī||
sattā avītadosā dosābandhanabaddhā,||
tesaɱ naṭo raŋgamajjhe samajjamajjhe ye dhammā dosanīyā te upasaŋharati bhiyyo sadosāya.|| ||

Pubbe kho gāmaṇi,||
sattā avītamohā mohabandhanabaddhā,||
tesaɱ naṭo raŋgamajjhe samajjamajjhe ye dhammā mohanīyā te upasaŋharati bhīyyo samohāya.|| ||

So attanā matto pamatto pare madetvā pamādetvā kāyassa bhedā param maraṇā pahāso nāma nirayo tatth uppajjati.|| ||

Sace kho panassa evaɱ diṭṭhī hoti:|| ||

'Yo so naṭo raŋgamajjhe samajjamajjhe saccālikena janaɱ bhāseti rameti,||
so kāyassa bhedā param maraṇā pahāsānaɱ devānaɱ sahavyataɱ uppajjatī' ti|| ||

sāssa hoti micchā diṭṭhi.|| ||

Micchā diṭṭhikassa kho panāhaɱ gāmaṇī purisapuggalassa dvinnaɱ gatīnaɱ aññataraɱ gatiɱ vadāmi nirayahaɱ vā tiracchānayoniɱ vā" ti.|| ||

Evaɱ vutte Tālapuṭo naṭagāmaṇī parodi, assūni pavattesi.|| ||

"Etaɱ kho tyāhaɱ gāmaṇī nālatthaɱ:|| ||

'Alaɱ gāmaṇī tiṭṭhate taɱ,||
mā maɱ etaɱ pucchi'" ti.|| ||

"Nāhaɱ bhante etaɱ rodāmi,||
yaɱ maɱ Bhagavā evam āha,||
api cāhaɱ bhante pubbakehi ācariyapācariyehi naṭehi dīgha-rattaɱ nikato vañcito paraddho:|| ||

'Yo so naṭo [308] raŋgamajjhe samajjamajjhe saccālikena janaɱ bhāseti rameti, so kāyassa bhedā param maraṇā pahāsānaɱ devānaɱ sahavyataɱ uppajjatī' ti.|| ||

"Abhikkantaɱ bhante||
abhikkantaɱ bhante!|| ||

Seyyathā pi bhante nikkujjitaɱ vā ukkujjeyya,||
paṭicchantaɱ vā vivareyya,||
mūḷahassa vā maggaɱ ācikkheyya andhakāre vā tela pajjotaɱ dhāreyya cakkhumanto rūpāni dakkhintī ti.|| ||

Evam evaɱ Bhagavatā aneka pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
labheyyāhaɱ bhante Bhagavato santike pabbajjaɱ||
labheyyaɱ upasampadanti.

Alattha kho tālapuṭo naṭagāmiṇī Bhagavato santike pabbajjaɱ,||
alatthupasampadaɱ,||
acirūpasampanno ca panāyasmā Tālapuṭo eko vūpakaṭṭho appamatto ātāpi pahitatto viharanto na cirass'eva yassatthāya kulaputtā samma-d-eva agārasmā anagāriyaɱ pabbajanti,||
tadanuttariyaɱ brahmacariyapariyosānaɱ diṭṭhe va dhamme sayaɱ abhiññā sacchikatvā upasampajja vihāsi:|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itttāyā' ti abbhaññāsi.|| ||

Aññataro ca panāyasmā Tālapuṭo arahataɱ ahosīti.|| ||

 


Contact:
E-mail
Copyright Statement   Webmaster's Page