Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
42: Gāmani Saɱyuttaɱ

Sutta 4

Hatthāroha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandaka nivāpe.|| ||

Atha kho Hatthāroho gāmaṇī yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Hatthāroho gāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ Hatthārohānaɱ bhāsamānānaɱ:|| ||

'Yo so hatthāroho saŋgāme ussahati vāyamati,||
tam enaɱ ussahannaɱ vāyamannaɱ vāyamantaɱ pare hananti pariyāpādenti,||
so kāyassa bhedā param maraṇā sarañjitānaɱ devānaɱ sahavyataɱ upapajjatī' ti.|| ||

Idha Bhagavā kimāhā ti?|| ||

Alaɱ gāmaṇī||
tiṭṭhate taɱ,||
mā maɱ etaɱ pucchiti.|| ||

Dutiyam pi kho hatthāroho gāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ Hatthārohānaɱ bhāsamānānaɱ:|| ||

'Yo so hatthāroho saŋgāme ussahati vāyamati,||
tam enaɱ ussahannaɱ vāyamannaɱ vāyamantaɱ pare hananti pariyāpādenti,||
so kāyassa bhedā param maraṇā sarañjitānaɱ devānaɱ sahavyataɱ upapajjatī' ti.|| ||

Idha Bhagavā kimāhā ti?|| ||

Alaɱ gāmaṇī||
tiṭṭhate taɱ,||
mā maɱ etaɱ pucchiti.|| ||

Tatiyam pikho hatthāroho gāmaṇī Bhagavantaɱ etad avoca:|| ||

"Sutaɱ me taɱ bhante pubbakānaɱ ācariyapācariyānaɱ Hatthārohānaɱ bhāsamānānaɱ:|| ||

'Yo so hatthāroho saŋgāme ussahati vāyamati,||
tam enaɱ ussahannaɱ vāyamannaɱ vāyamantaɱ pare hananti pariyāpādenti,||
so kāyassa bhedā param maraṇā sarañjitānaɱ devānaɱ sahavyataɱ upapajjatī' ti.|| ||

Idha Bhagavā kimāhā ti?|| ||

Addhā kho tyāhaɱ gāmaṇī na labhāmi|| ||

Alaɱ gāmaṇī||
tiṭṭhate taɱ,||
mā maɱ etaɱ pucchiti.

Api ca tyāhaɱ vyākarissāmi.|| ||

Yo so gāmaṇi hatthāroho saŋgāme ussahati vāyamati,||
[311] tassa taɱ cittaɱ pubbe hīnaɱ dukkaṭaɱ duppaṇihitaɱ:|| ||

'Ime sattā haññantu vā bajajhantu vā ucchijjantu vā vinassantu vā mā vā ahesuɱ iti vāti,||
tam enaɱ ussahantaɱ vāyamantaɱ pare hananti pariyāpāden' ti,||
so kāyassa bhedā param maraṇā sarañjito nāma nirayo tatth uppajjati.|| ||

Sace kho panassa evaɱ diṭṭhi hoti:|| ||

'Yo so hatthāroho saŋgāme ussahati vāyamati,||
tam enaɱ ussahannaɱ vāyamannaɱ vāyamantaɱ pare hananti pariyāpādenti,||
so kāyassa bhedā param maraṇā sarañjitānaɱ devānaɱ sahavyataɱ upapajjatī' ti.|| ||

Sāssa hoti micchādiṭṭhi,||
micchādiṭṭhikassa kho panāhaɱ gāmaṇī purisapuggalassa dvinnaɱ gatīnaɱ aññataraɱ gatiɱ vadāmi||
Nirayaɱ vā||
tiracchānayoniɱ vā" ti.|| ||

Evaɱ vutte hatthāroho gāmaṇī parodi,||
assūni pavattesi.|| ||

"Etaɱ kho tyāhaɱ gāmaṇī nālatthaɱ|| ||

'Alaɱ gāmaṇī||
tiṭṭhate taɱ,||
mā maɱ etaɱ pucchi' ti"

"Nāhaɱ bhante etaɱ rodāmi,||
yaɱ maɱ Bhagavā evam āha,||
api cāhaɱ bhante pubbakehi ācariyapācariyehi hatthārohehi dīgha-rattaɱ nikato vañcito paraddho,Yo so hatthāroho saŋgāme ussahati vāyamati,||
tam enaɱ ussahannaɱ vāyamannaɱ vāyamantaɱ pare hananti pariyāpādenti,||
so kāyassa bhedā param maraṇā sarañjitānaɱ devānaɱ sahavyataɱ upapajjatī' ti.|| ||

Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya||
mūḷahassa vā maggaɱ ācikkheyya,||
andhakāre vā telapajjotaɱ dhāreyya||
'cakkhumanto rūpāni dakkhinti' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ Bhagavā dhāretu ajjatagge pāṇupetaɱ saraṇaɱ gatanti.|| ||

 


Contact:
E-mail
Copyright Statement   Webmaster's Page