Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
42: Gāmani Saɱyuttaɱ

Sutta 7

Desanā (aka Khettūpama) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Nālandāyaɱ viharati Pāvarikambavane atha kho Asibandhaka putto gāmaṇī yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Asibandhaka putto gāmaṇī Bhagavantaɱ etad avoca:|| ||

"Nanu bhante Bhagavā sabbapāṇabhutahitānukampī viharatī" ti?|| ||

"Evaɱ gāmaṇī Tathāgato sabbapāṇabhutahitānugampī viharatī" ti.|| ||

"Atha kiñcarahi bhante Bhagavā ekaccānaɱ sakkaccaɱ dhammaɱ deseti,||
ekaccānaɱ no tathā sakkaccaɱ dhammaɱ desetī" ti?|| ||

[315] Tena hi gāmaṇī,||
taɱ yevettha paṭipucchissāmi,||
yathā te khameyya||
tathā naɱ vyākareyyāsi.|| ||

Taɱ kimmaññasi gāmaṇī?|| ||

Idha kassakassa gahapatino tīni khettāni:||
ekaɱ khettaɱ aggaɱ,||
ekaɱ khettaɱ majjhimaɱ,||
ekaɱ khettaɱ hīnaɱ jaṅgalaɱ ūsaraɱ||
pāpabhumi.|| ||

Taɱ kimmaññasi gāmaṇi?|| ||

Asu kassako gahapati bījāni patiṭṭhāpetukāmo kattha paṭhamaɱ patiṭṭhāpeyya,||
yaɱ vā aduɱ khettaɱ aggaɱ yaɱ vā||
aduɱ khettaɱ majjhimaɱ yaɱ vā||
aduɱ khettaɱ hīnaɱ jaṅgalaɱ ūsaraɱ pāpabhumin" ti?|| ||

"Asu bhante kassako gahapati bījāni patiṭṭhāpetukāmo yaɱ aduɱ khettaɱ aggaɱ tattha patiṭṭhāpeyya,||
tattha patiṭṭhāpetvā yaɱ aduɱ khettaɱ majjhimaɱ tattha patiṭṭhāpeyya,||
tattha patiṭṭhāpetvā yaɱ aduɱ khettaɱ hīnaɱ jaṅgalaɱ ūsaraɱ pāpabhumi tattha patiṭṭhāpeyya pi no pi patiṭṭhāpeyya.|| ||

Taɱ kissa hetu?|| ||

Antamaso gobhattam pi bhavissatī" ti.|| ||

"Seyyathā pi gāmaṇi yaɱ aduɱ khettaɱ aggaɱ,||
evam eva mayhaɱ bhikkhu-bhikkhuniyo.|| ||

Tesāhaɱ dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Ete hi gāmaṇi,||
maɱ dīpā maɱ-leṇā maɱ-tāṇā maɱ-saraṇā viharanti.|| ||

Seyyathā pi gāmaṇi, yaɱ aduɱ khettaɱ majjhimaɱ,||
evam eva mayhaɱ upāsaka-upāsikāyo.|| ||

Tasem pahaɱ dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Ete hi gāmaṇi,||
maɱ dīpā maɱ-leṇā maɱ-tāṇā maɱ-saraṇā viharanti.|| ||

Seyyathā pi gāmaṇi, yaɱ aduɱ khettaɱ hīnaɱ jaṅga- [316] laɱ ūsaraɱ pāpabhumi.|| ||

Evam eva mayhaɱ aññatitthiyā samaṇa-brāhmaṇā paribbājakā.|| ||

Tesam pahaɱ dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Appeva nāma eka-padam pi ājāneyyuɱ,||
taɱ n'esaɱ assa dīgha-rattaɱ hitāya sukhāyāti.|| ||

Seyyathā pi gāmaṇi, purisassa tayo udakamaṇikā,||
eko udakamaṇiko acchiddo ahārī aparihārī,||
eko udakamaṇiko acchiddo hārī parihārī,||
eko udakamaṇiko chiddo hārī parihārī.|| ||

Taɱ kimmaññasi gāmaṇi?|| ||

Asu pariso udakaɱ nikkhipitukāmo kattha paṭhamaɱ nikkhipeyya yo vā so udakamaṇiko acchiddo ahārī parihārī,||
yo vā so udakamaṇiko acchiddo hārī parihārī,||
yo vā so udakamaṇiko chiddo hārī parihārī" ti?|| ||

"Asu bhante puriso udakaɱ nikkhipitukāmo yo so udakamaṇiko acchiddo ahārī aparihārī tattha nikkhipeyya,||
tattha nikkhipitvā yo so udakamaṇiko acchiddo hārī parihārī tattha nikkhipeyya,||
tattha nikkhipitvā yo so udakamaṇiko chiddo hārī parihārī tattha nikkhipeyyā pi no pi nikkhipeyya.|| ||

Taɱ kissa hetu?|| ||

Antamaso bhaṇḍadhovanam pi bhavissati" ti.|| ||

Seyyathā pi gāmaṇi yo so udakamaṇiko acchiddo ahārī aparihārī,||
evameva mayhaɱ bhikkhu-bhikkhuniyo.|| ||

Tesāhaɱ dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Ete hi gāmaṇi,||
maɱ dīpā maɱ-leṇā maɱ-tāṇā maɱ-saraṇā viharanti.|| ||

Seyyathā pi gāmaṇi, yo so udakamaṇiko acchiddo hārī parihārī,||
evam eva mayhaɱ upāsaka-upāsikāyo.|| ||

Tesāhaɱ pahaɱ [317] dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Ete hi gāmaṇi,||
maɱ dīpā maɱ-leṇā maɱ-tāṇā maɱ-saraṇā viharanti.|| ||

Seyyathā pi gāmaṇi, yo so udakamaṇiko jiddo hārī parihārī,||
evam eva mayhaɱ aññatitthiyā samaṇa-brāhmaṇa paribbājakā.|| ||

Tesāhaɱ pahaɱ dhammaɱ desemi||
ādi-kalyāṇaɱ||
majjhe-kalyāṇaɱ||
pariyosāna-kalyāṇaɱ||
sātthaɱ savyañjanaɱ kevala-paripuṇṇaɱ parisuddhaɱ brahmacariyaɱ pakāsemi.|| ||

Taɱ kissa hetu?|| ||

Appeva nāma eka padam pi ājāneyyuɱ,||
taɱ n'esaɱ assa dīgha-rattaɱ hitāya sukhāyāti.|| ||

Evaɱ vutte Asibandhakaputto gāmaṇī Bhagavantaɱ etad avoca:|| ||

"Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya||
mūḷahassa vā maggaɱ ācikkheyya,||
andhakāre vā telapajjotaɱ dhāreyya||
'cakkhumanto rūpāni dakkhinti' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement   Webmaster's Page