Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. Saḷāyatana Vagga:
42: Gāmani Saɱyuttaɱ

Sutta 8

Saŋkhadhama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Nālandāyaɱ viharati Pāvarikambavane.|| ||

Atha kho Asibandhaka putto gāmaṇi||
Nigaṇṭha-sāvako||
yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Asibandhakaputto gāmaṇim Bhagavā etad avoca:|| ||

"Kathan nu kho gāmaṇi, Nigaṇṭho Nātaputto sāvakānaɱ dhammaɱ desetī" ti?|| ||

"Evaɱ kho bhante Nigaṇṭho Nātaputto sāvakānaɱ dhammaɱ deseti:|| ||

'Yo koci pāṇam atipāteti sabbo so āpāyiko nerayiko.|| ||

Yo koci adinnam ādiyati sabbo so āpāyiko nerayiko.|| ||

Yo koci kāmesu micchā carati sabbo so āpāyiko nerayiko.|| ||

Yo koci musā bhaṇati sabbo so āpāyiko nerayiko.|| ||

Yaɱ bahulaɱ yaɱ bahulaɱ viharati||
tena tena niyyatī' ti.|| ||

Evaɱ kho bhante Nigaṇṭho Nātaputto sāvakānaɱ dhammaɱ desetī" ti.|| ||

"'Yaɱ bahulaɱ yaɱ bahulañ ca gāmaṇi viharati||
tena [318] tena niyyatī' ti.|| ||

Evaɱ sante na koci āpāyiko nerayiko bhavissati yathā Nigaṇṭhassa Nātaputtassa vacanaɱ.

Taɱ kim maññasi gāmaṇi?|| ||

Yo so puriso pāṇātipātī,||
rattiyā vā||
divasassa vā||
samayāsamayaɱ upādāya,||
katamo bahutaro samayo yaɱ vā||
so pāṇaɱ atipāteti yaɱ vā||
so pāṇaɱ nātipātetī" ti?|| ||

"Yo so bhante puriso pāṇātipātī,||
rattiyā vā||
divasassa vā||
samayāsamayaɱ upādāya||
appataro so samayo yaɱ||
so pāṇaɱ atipāteti.|| ||

Atha kho so va bahutaro samayo yaɱ||
so pāṇaɱ nātipātetī" ti.|| ||

"'Yaɱ bahulaɱ yaɱ bahulañ ca gāmaṇi viharati tena tena nīyyatī' ti.|| ||

Evaɱ sante na koci āpāyiko nerayiko bhavissati||
yathā Nigaṇṭhassa Nātaputtassa vacanaɱ.|| ||

Taɱ kim maññasi gāmaṇi?|| ||

Yo so puriso adinnādāyī,||
rattiyā vā||
divasassa vā||
samayāsamayaɱ upādāya||
katamo bahutaro samayo yaɱ vā||
so adinnaɱ ādiyati yaɱ vā||
so adinnaɱ nādiyatī" ti?|| ||

"Yo so bhante puriso adinnādāyī||
rattiyā vā||
divasassa vā||
samayāsamayaɱ upādāya,||
appataro so samayo yaɱ||
so adinnaɱ ādiyati.|| ||

Atha kho so va bahutaro samayo yaɱ so adinnaɱ nādiyatī" ti.|| ||

"'Yaɱ bahulaɱ yaɱ bahulañ ca gāmaṇi viharati tena tena nīyyatī' ti.|| ||

Evaɱ sante na koci āpāyiko nerayiko bhavissati||
yathā Nigaṇṭhassa Nātaputtassa vacanaɱ.|| ||

Taɱ kim maññasi gāmaṇi?|| ||

Yo so puriso kāmesu micchācārī,||
rattiyā vā||
divasassa vā||
samayāsamayaɱ upādāya||
katamo bahutaro samayo yaɱ vā||
so kāmesu micchā carati yaɱ vā||
so kāmesu micchā na caratī" ti?|| ||

"Yo so bhante puriso kāmesu micjācārī,||
rattiyā vā||
divasassa vā||
samayāsamayaɱ upādāya||
appataro so samayo yaɱ||
so kāmesu micchā carati.|| ||

Atha kho sova bahutaro samayo yaɱ so kāmesu micchā na cara" ti.|| ||

"'Yaɱ bahulaɱ yaɱ bahulañca gāmaṇi viharati tena tena [319] nīyayatī' ti.|| ||

Evaɱ sante na koci āpāyiko nerayiko bhavissati||
yathā Nigaṇṭhassa Nātaputtassa vacanaɱ.|| ||

Taɱ kim maññasi gāmaṇi?|| ||

Yo so puriso musāvādī||
rattiyā vā||
divasassa vā||
samayāsamayaɱ upādāya||
katamo bahutaro samayo yaɱ vā||
so musā bhaṇati yaɱ vā||
so musā na bhaṇatī" ti?|| ||

"Yo so bhante puriso musāvādī||
rattiyā vā||
divasassa vā||
samayāsamayaɱ upādāya appataro||
so samayo yaɱ||
so musā bhaṇati.|| ||

Atha kho sova bahutaro samayo yaɱ so musā na bhaṇatī" ti.|| ||

"'Yaɱ bahulaɱ yaɱ bahulañca gāmaṇi viharati tena tena nīyyatī' ti.|| ||

Evaɱ sante na koci āpāyiko nerayiko bhavissati||
yathā Nigaṇṭhassa Nātaputtassa vacanaɱ.|| ||

 


 

Idha gāmaṇi ekacco satthā evaɱ-vādī hoti evaɱ diṭṭhi:|| ||

'Yo koci pāṇam atipāteti sabbo so āpāyiko nerayiko.|| ||

Yo koci adinnam ādiyati sabbo so āpāyiko nerayiko.|| ||

Yo koci kāmesu micchā carati sabbo so āpāyiko nerayiko.|| ||

Yo koci musā bhaṇati sabbo so āpāyiko nerayiko.'|| ||

Tasmiɱ kho pana gāmaṇi satthari sāvako abhippasanno hoti.|| ||

Tassa evaɱ hoti:|| ||

'Mayhaɱ kho satthā evaɱ vādī evaɱ diṭṭhi:|| ||

"Yo koci pāṇam atipāteti sabbo so āpāyiko nerayiko" ti.|| ||

Atthi kho pana mayā pāṇo atipātito.|| ||

Aham pi āpāyiko nerayiko' ti,|| ||

diṭṭhiɱ paṭilabhati.|| ||

Taɱ gāmaṇi vācaɱ appahāya||
taɱ cittaɱ appahāya||
taɱ diṭṭhiɱ appaṭinissajjitvā||
yathā hataɱ nikkhitto evaɱ niraye.|| ||

'Mayhaɱ kho satthā evaɱ vādī evaɱ diṭṭhi:|| ||

"Yo koci adinnaɱ ādiyati sabbo so āpāyiko nerayiko" ti.|| ||

Atthi kho pana mayā adinnaɱ ādinnaɱ.|| ||

Aham pamhi āpāyiko nerayiko' ti,|| ||

diṭṭhiɱ paṭilabhati.|| ||

Taɱ gāmaṇi vācaɱ appahāya||
taɱ cittaɱ appahāya||
taɱ diṭṭhiɱ appaṭinissajjitvā||
yathā hataɱ nikkhitto evaɱ niraye.|| ||

'Mayhaɱ kho satthā evaɱ vādī evaɱ diṭṭhi:|| ||

"Yo koci kāmesu micachā carati, sabbo [320] so āpāyiko nerayiko" ti.|| ||

Atthi kho pana mayā kāmesu micchāciṇṇaɱ.|| ||

Aham pamhi āpāyiko nerayiko' ti,|| ||

diṭṭhiɱ paṭilabhati.|| ||

Taɱ gāmaṇi vācaɱ appahāya||
taɱ cittaɱ appahāya||
taɱ diṭṭhiɱ appaṭinissajjitvā||
yathā hataɱ nikkhitto evaɱ niraye.|| ||

'Mayhaɱ kho satthā evaɱ vādī evaɱ diṭṭhi:|| ||

"Yo koci musā bhaṇati sabbo so āpāyiko nerayiko" ti.|| ||

Atthi kho pana mayā kāmesu micchāciṇṇaɱ.|| ||

Aham pamhi āpāyiko nerayiko' ti,|| ||

diṭṭhiɱ paṭilabhati.|| ||

Taɱ gāmaṇi vācaɱ appahāya||
taɱ cittaɱ appahāya||
taɱ diṭṭhiɱ appaṭinissajjitvā||
yathā hataɱ nikkhitto evaɱ niraye.|| ||

 


 

Idha pana gāmaṇi Tathāgato loke uppajjati arahaɱ Sammā-sambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā.|| ||

So aneka pariyāyena pāṇātipātaɱ garahati vigarahati pāṇātipātāviramathāti cāha,||
adinnādānaɱ garahati vigarahati||
ādinnādānā viramathāti cāha,||
kāmesu micchācāraɱ garahati vigarahati||
kāmesu micchācārā viramathāti cāha,||
musā-vādaɱ garahati vigarahati||
musā-vādā viramathāti cāha.|| ||

Tasmiɱ kho pana gāmaṇi satthari sāvako abhippasanno hoti,||
so iti paṭisaɱcikkhati:|| ||

'Bhagavā kho aneka-pariyāyena pāṇātipātaɱ garahati vigarahati:|| ||

"Pāṇātipātā viramathāti cāha".|| ||

Atthi kho pana mayā pāṇo atipātito yāvatako vā tāvatako vā;||
taɱ na suṭṭhu||
taɱ na sādhu.|| ||

Ahañ c'eva kho pana tappaccayā vippaṭisārī assaɱ||
"na me taɱ pāpakaɱ kammaɱ akataɱ bhavissatī"' ti|| ||

So iti paṭisaŋkhāya taɱ c'eva pāṇātipātaɱ pajahati,||
āyatiñ ca pāṇātipātā paṭivirato hoti;||
evam etassa pāpassa kammassa pahānaɱ hoti,||
evam etassa pāpassa kammassa samatikkamo hoti.|| ||

Bhagavā kho aneka-pariyāyena adinnādānaɱ garahati vigarahati:|| ||

"Adinnādāna viramathāti cāha".|| ||

Atthi kho pana mayā adinnaɱ ādinnaɱ yāvatakaɱ vā tāvatakaɱ vā;||
taɱ na suṭṭhu||
taɱ na sādhu.|| ||

Ahañ c'eva kho pana tappaccayā vippaṭisārī assaɱ||
"na me taɱ pāpakaɱ kammaɱ akataɱ bhavissatī"' ti|| ||

So iti paṭisaŋkhāya tañc'eva [321] adinnādānaɱ pajahati,||
āyatiñ ca adinnādānā paṭivirato hoti;||
evam etassa pāpassa kammassa pahānaɱ hoti,||
evam etassa pāpassa kammassa samatikkamo hoti.|| ||

Bhagavā kho aneka-pariyāyena kāmesu micchācāraɱ garahati vigarahati:|| ||

"Kāmesu micchācārā viramathāti cāha".|| ||

Atthi kho pana mayā kāmesu micchāciṇṇaɱ yāvatakaɱ vā tāvatakaɱ vā;||
taɱ na suṭṭhu||
taɱ na sādhu.|| ||

Ahañ c'eva kho pana tappaccayā vippaṭisārī assaɱ||
"na me taɱ pāpakaɱ kammaɱ akataɱ bhavissatī"' ti|| ||

So iti paṭisaŋkhāya taɱ c'eva kāmesu micchācāraɱ pajahati,||
āyatiñ ca kāmesu micchācārā paṭivirato hoti;||
evam etassa pāpassa kammassa pahānaɱ hoti,||
evam etassa pāpassa kammassa samatikkamo hoti.|| ||

Bhagavā kho aneka-pariyāyena musā-vādaɱ garahati vigarahati:|| ||

"Musāvadā viramathāti cāha".|| ||

Atthi kho pana mayā musā bhaṇitaɱ yāvatakaɱ vā tāvatakaɱ vā;||
taɱ na suṭṭhu||
taɱ na sādhu.|| ||

Ahañ c'eva kho pana tappaccayā vippaṭisārī assaɱ||
"na me taɱ pāpakaɱ kammaɱ akataɱ bhavissatī"' ti|| ||

So iti paṭisaŋkhāya taɱ c'eva musā-vādaɱ pajahati,||
āyatiñ ca musā-vādā paṭivirato hoti;||
evam etassa pāpassa kammassa pahānaɱ hoti,||
evam etassa pāpassa kammassa samatikkamo hoti.|| ||

 


 

So pāṇātipātaɱ pahāya pāṇātipātā paṭivirato hoti||
adinnādānaɱ pahāya adinnādānā paṭivirato hoti,||
kāmesu micchācāraɱ pahāya kāmesu micchācārā paṭivirato hoti, musā-vādaɱ pahāya musā-vādā paṭivirato hoti,||
pisuṇāvācaɱ pahāya pisuṇāyavācāya paṭivirato hoti,||
pharusaɱvācaɱ pahāya pharusāya vācāya paṭivirato hoti,||
samphappalāpaɱ pahāya samphappalāpā paṭivirato hoti,||
abhijjhaɱ pahāya anabhijjhālū hoti,||
vyāpādadosaɱ [322] pahāya abyāpannacitto hoti,||
micchādiṭṭhiɱ pahāya sammādiṭṭhiko hoti.|| ||

 


 

Sa kho so gāmaṇi ariyasāvako evaɱ vigatābhijjho vigatavyāpādo.|| ||

Asammūḷho sampajāno patissato mettā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ;||
iti uddham-adhotiriyaɱ||
sabbadhi||
sabbattatāya||
sabbāvantaɱ lokaɱ||
mettā-sahagatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||

Seyyathā pi gāmaṇi balavā saŋkhadhamo appakasireṇeva catuddisā viññāpeyya,||
evam eva kho gāmaṇi||
evaɱ bhāvitāya mettāya ceto-vimuttiyā||
evaɱ bahulīkatāya yaɱ pamāṇakataɱ kammaɱ||
na taɱ tatrāvasissati,||
na taɱ tatrāvatiṭṭhati.|| ||

Sa kho so gāmaṇi ariyasāvako evaɱ vigatābhijjho vigatavyāpādo.|| ||

Asammūḷho sampajāno patissato karuṇā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ;||
iti uddham-adhotiriyaɱ||
sabbadhi||
sabbattatāya||
sabbāvantaɱ lokaɱ||
karuṇā-sahagatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||

Seyyathā pi gāmaṇi balavā saŋkhadhamo appakasiren'eva catuddisā viññāpeyya,||
evam eva kho gāmaṇi||
evaɱ bhāvitāya karuṇāya ceto-vimuttiyā||
evaɱ bahulīkatāya yaɱ pamāṇakataɱ kammaɱ||
na taɱ tatrāvasissati,||
na taɱ tatrāvatiṭṭhati.|| ||

Sa kho so gāmaṇi ariyasāvako evaɱ vigatābhijjho vigatavyāpādo.|| ||

Asammūḷho sampajāno patissato muditā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ;||
iti uddham-adhotiriyaɱ||
sabbadhi||
sabbattatāya||
sabbāvantaɱ lokaɱ||
muditā-sahagatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||

Seyyathā pi gāmaṇi balavā saŋkhadhamo appakasiren'eva catuddisā viññāpeyya,||
evam eva kho gāmaṇi||
evaɱ bhāvitāya muditāya ceto-vimuttiyā||
evaɱ bahulīkatāya yaɱ pamāṇakataɱ kammaɱ||
na taɱ tatrāvasissati,||
na taɱ tatrāvatiṭṭhati.|| ||

Sa kho so gāmaṇi ariyasāvako evaɱ vigatābhijjho vigatavyāpādo.|| ||

Asammūḷho sampajāno patissato upekhāsahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ;||
iti uddham-adhotiriyaɱ||
sabbadhi||
sabbattatāya||
sabbāvantaɱ lokaɱ||
upekhāsahagatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||

Seyyathā pi gāmaṇi balavā saŋkhadhamo appakasiren'eva catuddisā viññāpeyya,||
evam eva kho gāmaṇi||
evaɱ bhāvitāya upekhāya ceto-vimuttiyā||
evaɱ bahulīkatāya yaɱ pamāṇakataɱ kammaɱ||
na taɱ tatrāvasissati,||
na taɱ tatrāvatiṭṭhati.|| ||

Evaɱ vutte Asibandhakaputto gāmaṇī Bhagavantaɱ etad avoca:|| ||

"Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya||
mūḷahassa vā maggaɱ ācikkheyya,||
andhakāre vā telapajjotaɱ dhāreyya||
'cakkhumanto rūpāni dakkhinti' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement   Webmaster's Page