Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. saḷāyatana Vagga:
42: Gamani Saɱyuttaɱ

Sutta 9

Kula Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Kosalesu cārikaɱ caramāno mahatā bhikkhu-saŋghena saddhiɱ yena Nālandā tad [323] avasari.|| ||

Tatra sudaɱ Bhagavā Nālandāyaɱ viharati Pāvarikambavane.|| ||

Tena kho pana samayena Nālandā dukhhikkhā hoti dvihitikā||
setaṭṭhikā||
salākāvuttā.|| ||

Tena kho pana samayena Nigaṇṭho Nātaputto Nālandāyaɱ paṭivasati mahatiyā Nigaṇṭhaparisāya saddhiɱ.|| ||

Atha kho Asibandhakaputto gāmanī Nigaṇṭhasāvako yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Asibandhakaputtaɱ gāmaṇīɱ Nigaṇṭho Nātaputto etad avoca:|| ||

Ehi tvaɱ gāmaṇi,||
samaṇassa Gotamassa vādaɱ āropehi,||
evaɱ te kalyāṇo kittisaddo abbhuggacchati:|| ||

'Asibaddhakaputtena gāmaṇinā samaṇassa Gotamassa evaɱ mahiddhikassa||
evaɱ mahānubhāvassa vādo āropito' ti."|| ||

"Kathaɱ panāhaɱ bhante samaṇassa Gotamassa evaɱ mahiddhikassa||
evaɱ mahānubhāvassa vādaɱ āropessāmī" ti?|| ||

"Ehi tvaɱ gāmaṇi,||
yena Samaṇo Gotamo ten'upasaŋkama||
upasaŋkamitvā samaṇaɱ Gotamaɱ evaɱ vadehi:|| ||

'Nanu bhante Bhagavā aneka-pariyāyena kulānaɱ anuddayaɱ vaṇṇeti,||
anurakkhaɱ vaṇṇeti,||
anukampaɱ vaṇṇetī' ti?|| ||

Sace te gāmaṇi Samaṇo Gotamo evaɱ phuṭṭho evaɱ vyākaroti:|| ||

'Evaɱ gāmaṇi Tathāgato aneka-pariyāyena kulānaɱ anuddayaɱ vaṇṇoti,||
anurakkhaɱ vaṇṇeti,||
anukampaɱ vaṇṇetī" ti||
tam enaɱ tvaɱ evaɱ vadeyyāsi:|| ||

'Atha kiñcarahi bhante Bhagavā dukhhikkhe||
dvihitike||
setaṭṭhike||
salākāvutte mahatā bhikkhu-saŋghena||
saddhiɱ cārikaɱ carati||
ucchedāya Bhagavā kulānaɱ paṭipanno,||
anayāya Bhagavā kulānaɱ paṭipanno,||
upaghātāya Bhagavā kulānaɱ paṭipanno" ti.|| ||

Imaɱ kho te gāmaṇi Samaṇo Gotamo ubhato koṭikaɱ pañhaɱ phuṭṭho n'eva sakkhīti uggilituɱ n'eva sakkhīti ogilitun" ti.|| ||

[324] "Evaɱ bhante" ti kho Asibandhakaputto gāmaṇi Nigaṇṭhassa nātaputtassa paṭissutvā uṭṭhāy āsanā Nigaṇṭhaɱ nātaputtaɱ abhivādetvā padakkhiṇaɱ katvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Asibandhakaputto gāmaṇi Bhagavantaɱ etad avoca:|| ||

"Nanu bhante Bhagavā aneka-pariyāyena kulānaɱ anuddayaɱ vaṇṇeti,||
anurakkhaɱ vaṇṇeti,||
anukampaɱ vaṇṇetī"ti?|| ||

"Evaɱ gāmaṇi Tathāgato aneka-pariyāyena kulānaɱ anuddayaɱ vaṇṇeti,||
anurakkhaɱ vaṇṇeti,||
anukampaɱ vaṇṇetī" ti.|| ||

"Atha kiñcarahi bhante Bhagavā dukhikkhe||
dvīhitike||
setaṭṭhike,||
salākāvutte||
mahatā bhikkhu-saŋghena saddhiɱ cārikaɱ carati||
ucchedāya Bhagavā kulānaɱ paṭipanno,||
anayāya Bhagavā kulānaɱ paṭipanno,||
upaghātāya Bhagavā kulānaɱ paṭipanno" ti?|| ||

"Ito so gāmaṇi ekanavuto kappo,||
yam ahaɱ anussarāmi||
nābhijānāmi kiñci kulaɱ pakkabhikkhāanuppadānamattena upahata pubbaɱ||
atha kho yāni tāni kulāni||
aḍḍhāni mahaddhanāni||
mahabhogāni||
pahūta-jātarūparajatāni||
pahūta-cittupakaraṇāni||
pahūta-dhanadhaññāni,||
sabbāni tāni
dāna-sambhūtāni||
c'eva sacca-sambhūtāni ca||
saññama-sambhūtāni ca.|| ||

Aṭṭha kho gāmaṇī hetu||
aṭṭha paccayāv||
kulānaɱ upaghātāya.|| ||

Rājato vā kulāni upaghātaɱ gacchanti,||
corato vā kulāni upaghātaɱ gacchanti,||
aggito vā kulāni upaghātaɱ gacchanti,||
udakato vā kulāni upaghātaɱ gacchanti,||
nihitaɱ vā nādhigacchanti,||
duppayuttā vā kammantaɱ jahanti||
kule vā kulaŋgāro uppajjati||
yo te bhoge [325] vikirati||
vidhamati||
viddhaɱseti,||
aniccatāyeva aṭṭhamī ti.|| ||

Ime kho gāmaṇi aṭṭhahetu aṭṭhapaccayā kulānaɱ upaghātāya.|| ||

Imesu kho gāmiṇi aṭṭhasu hetusu||
aṭṭhasu paccayesu||
santesu saɱvijjamānesu yo maɱ evaɱ vadeyya:

'Ucchedāya Bhagavā kulānaɱ paṭipanno,||
anayāya Bhagavā kulānaɱ paṭipanno,||
upaghātāya Bhagavā kulānaɱ paṭipanno' ti.|| ||

Taɱ gāmaṇi vācaɱ appahāya||
taɱ cittaɱ appahāya||
taɱ diṭṭhiɱ appaṭinissajitvā||
yathābhataɱ nikkhitto evaɱ niraye" ti.|| ||

Evaɱ vutte Asibandhakaputto gāmaṇī Bhagavantaɱ etad avoca:|| ||

"Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya||
mūḷahassa vā maggaɱ ācikkheyya,||
andhakāre vā telapajjotaɱ dhāreyya||
'cakkhumanto rūpāni dakkhinti' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement   Webmaster's Page