Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. saḷāyatana Vagga:
42: Gamani Saɱyuttaɱ

Sutta 10

Maṇiculaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Tena kho pana samayena rājantepure rājaparisāyaɱ sannisinnānaɱ sannipatitānaɱ ayamantarā kathā udapādi: "kappati samaṇānaɱ Sakyaputtiyānaɱ jātarūparajataɱ, sādiyanti samaṇā Sakyaputtiyā jātarūparajataɱ.|| ||

Patigaṇhanti samaṇā Sakyaputtiyā jātarūparajatan" ti.|| ||

Tena kho pana samayena maniCūḷako gāmaṇī tassaɱ parisāyaɱ nisinno hoti.|| ||

Atha kho maṇiCūḷako gāmaṇī taɱ parisaɱ etad avoca: mā ayyā evaɱ avacuttha,||
na kappati samaṇānaɱ Sakyaputtiyānaɱ jātarūparajataɱ,||
na sādiyanti samaṇā Sakyaputtiyā jātarūparajataɱ,||
na patigaṇhanti samaṇā Sakyaputtiyā jātarūparajataɱ,||
nikkhittamaṇisuvaṇṇā samaṇā Sakyaputtiyā apetajātarūparajatāti.|| ||

Asakkhi kho maṇiCūḷako gāmaṇi taɱ parisaɱ saññapetuɱ.|| ||

Atha kho maṇiCūḷako gāmaṇi yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi.|| ||

[326] Eka-m-antaɱ nisinno kho maṇi'acūko gāmaṇi Bhagavantaɱ etad avoca:|| ||

Idha bhante rājantepure rājaparisāyaɱ sannisinnānaɱ sannipatinānaɱ ayamantarā kathā udapādi:||
kappati samaṇānaɱ Sakyaputtiyānaɱ jātarūparajataɱ,||
sādiyanti samaṇā sākyaputtiyā jātarūparajataɱ,||
patigaṇhanti samaṇā Sakyaputtiyā jātarūparajatanti.|| ||

Evaɱ vuttāhaɱ bhante taɱ parisaɱ etad avoca:||
mā ayyā evaɱ avacuttha,||
na kappati samaṇānaɱ Sakyaputtiyānaɱ jātarūparajataɱ,||
na sādiyanti samaṇā Sakyaputtiyā jātarūparajataɱ,||
na patigaṇhanti samaṇā Sakyaputtiyā jātarūparajataɱ,||
nikkhittamaṇisuvaṇṇā samaṇā Sakyaputtiyā apetajātarūparajatāti.|| ||

Asakkhiɱ khohaɱ taɱ bhante parisaɱ saññapetuɱ.|| ||

Kaccāhaɱ bhante evaɱ vyākaramāno vuttavādī c'eva Bhagavato homi.|| ||

Na ca Bhagavantaɱ abhūtena abbhācikkhāmi, Dhammassa cānudhammaɱ vyākaromi, na ca koci saha dhammiko vādānupāto gārayhaɱ ṭhānaɱ āgacchatī ti.|| ||

Taggha tvaɱ gāmaṇi evaɱ vyākaramāno vuttavādī c'eva me hosi, na ca maɱ abhūtena abbhācikkhasi, Dhammassa cānudhammaɱ vyākarosi, na ca koci sahadhammiko vādānupāto gārayhaɱ ṭhānaɱ āgacchati.|| ||

Na hi kappati gāmaṇi samaṇānaɱ Sakyaputtiyānaɱ jātarūparajataɱ,||
na sādiyanti samaṇā Sakyaputtiyā jātarūparajataɱ,||
na patigaṇhanti samaṇā Sakyaputtiyā jātarūparajataɱ,||
nikkhitta maṇisuvaṇṇā samaṇā sākyaputtiyā apetajātarūparajatā.|| ||

Yassa kho gāmaṇi jātarūparajataɱ kappati, pañca pi tassa kāmaguṇā kappanti.|| ||

Yassa pañcakāmaguṇā kappanti, ekaɱsen'etaɱ gāmaṇi dhāreyyāsi: assamaṇadhammo asakkiyaputtiyadhammoti.|| ||

Api cāhaɱ gāmaṇi evaɱ vadāmi:||
tiṇaɱ tiṇatthikena pariyesitabbaɱ, dāruɱ dārutthikena pariyesitabbaɱ, sakaṭaɱ sakaṭatthikena pariyesitabbaɱ puriso purisatthikena [327] pariyesitabbo.|| ||

Natvevāhaɱ gāmaṇi kenaci pariyāyena jātarūparajataɱ sāditabbaɱ pariyesitabbanti vadāmīti.|| ||

 


Contact:
E-mail
Copyright Statement   Webmaster's Page