Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. saḷāyatana Vagga:
42: Gamani Saɱyuttaɱ

Sutta 11

Bhadraka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā mallesu viharati Uruvelakappaɱ nāma mallānaɱ nigamo. Atha kho bhadrako gāmaṇī yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho bhadrako gāmaṇī Bhagavantaɱ etad avoca:||
Sādhu me bhante Bhagavā dukkhassa samudayañ ca atthagamañ ca desetuti.|| ||

Ahañce te gāmaṇi atītaɱ addhānaɱ ārabbha dukkhassa samudayañ ca atthagamañ ca deseyyaɱ: "evaɱ ahosi atītam addhānan" ti.|| ||

Tatra te siyā kaŋkhā siyā vimati.|| ||

Ahañce te gāmaṇi anāgatam addhānaɱ ārabbha dukkhassa samudayañ ca atthagamañ ca deseyyaɱ.|| ||

"Evaɱ bhavissati anāgatam addhānan" ti. Tatrā pi te siyā kaŋkhā siyā vimati.|| ||

Api cāhaɱ gāmaṇi idh'eva nisinno ettha ca te nisinnassa dukkhassa samudayañ ca atthagamañ ca desissāmi. Taɱ suṇohi, sādhukaɱ manasi karohi, bhāsissāmīti.|| ||

Evaɱ bhante' ti kho bhadrako gāmaṇi Bhagavato paccassosi Bhagavā etad avoca:|| ||

Taɱ kim maññasi gāmaṇi atthi te Uruvelakappe manussā yesante [328] vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsāti.|| ||

Atthi me bhante Uruvelakappe manussā yesaɱ me vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsāti.|| ||

Atthi pana te gāmaṇi Uruvelakappe manussā yesante vadhena vā bandhena vā garahāya vā nūppajjeyyuɱ soka-parideva-dukkha-domanass'-upāyāsāti.|| ||

Atthi me bhante Uruvelakappe manussā yesaɱ me vadhena vā bandhena vā jāniyā vā garahāya vā nūppajjeyyuɱ soka-parideva-dukkha-domanass'-upāyāsāti.|| ||

Konu kho gāmaṇi hetu kho paccayo yena te ekaccānaɱ Uruvelakappiyānaɱ manussānaɱ vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsā?|| ||

Ko pana gāmaṇi hetu ko paccayo yena te ekaccānaɱ Uruvelakappiyānaɱ manussānaɱ vadhena vā bandhena vā jāniyā vā garahāya vā nūppajjeyyuɱ soka-parideva-dukkha-domanass'-upāyāsāti.|| ||

Yesaɱ me bhante Uruvelakappiyānaɱ manussānaɱ vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsā atthi me tesu chandarāgo.|| ||

Yesaɱ pana me bhante Uruvelakappiyānaɱ manussānaɱ vadhena vā bandhena vā jāniyā vā garahāya vā nūppajjeyyuɱ soka-parideva-dukkha-domanass'-upāyāsā n'atthi me tesu chandarāgoti.|| ||

Iminā tvaɱ gāmaṇi dhammena diṭṭhena viditena akālikena pattena pariyogā'hena atītānāgate nayaɱ nehi, yaɱ kho kiñci atītam addhānaɱ dukkhaɱ uppajjamānaɱ uppajjati. Sabbantaɱ chandamūlakaɱ chandanidānaɱ, chando hi mūlaɱ dukkhassa yaɱ hi kiñci anāgatam addhānaɱ dukkhaɱ uppajjamānaɱ uppajjissati, sabbantaɱ chandamūlakaɱ chandanidānaɱ chando hi mūlaɱ dukkhassāti.|| ||

Acchariyaɱ bhante abbhutaɱ bhante yāva subhāsitamidaɱ bhante Bhagavatā "yaɱ kiñci -1 atītam addhānaɱ dukkhaɱ uppajjamānaɱ [329] uppajjati sabbantaɱ chandamūlakaɱ chandanidānaɱ, chando hi mūlaɱ dukkhassa.|| ||

Yaɱ kiñci anāgatam addhānaɱ dukkhaɱ uppajjamānaɱ uppajjissati sabbantaɱ chandamūlakaɱ chandanidānaɱ, chando hi mūlaɱ dukkhassāti.|| ||

Atthi me bhante ciravāsī. Nāma kumāro, bahi āvasathe. Paṭivasati, so khvāhaɱ bhante kālasseva vuṭṭhāya purisaɱ uyyojemi: "gaccha bhaṇe ciravāsiɱ kuMāraɱ jānāhīti. Yāvakīvañca bhante so puriso nāgacchati tassa me hoteva aññathattaɱ; mā heva ciravāsissa kumārassa kiñci ābādhayitthāti.|| ||

Taɱ kim maññasi gāmaṇi, ciravāsissa te kumārassa vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsāti.|| ||

Ciravāsissa me bhante kumārassa vadhena vā bandhena vā jāniyā vā garahāya vā jīvitassapi siyā aññathattaɱ, kimpana me nūppajjissanti soka-parideva-dukkhe-domanass-upāyāsāti.|| ||

Iminā pi kho etaɱ gāmaṇi pariyāyena veditabbaɱ "yaɱ kiñci dukkhaɱ uppajjamānaɱ uppajjati, sabbantaɱ chandamūlakaɱ chandanidānaɱ chando hi mūlaɱ dukkhassā" ti.|| ||

Taɱ kim maññasi gāmaṇi yadā te ciravāsissa mātā adiṭṭhā āsi assutā, ahosi ciravāsissa mātuyā chando vā rāgo vā pemaɱ vāti.|| ||

No h'etaɱ bhante.|| ||

Dassanaɱ vā te gāmaṇi āgamma savanaɱ vā te gāmaṇi āgamma evante ahosi: ciravāsissa mātuyā chando vā rāgo vā pemaɱ vāti. Evaɱ bhante. Taɱ kim maññasi gāmaṇi. Ciravāsissa mātuyā te vadhena vā bandhena vā jāniyā vā garahāya vā uppajjeyyuɱ soka-parideva-dukkha-domanass'-upāyāsāti. [330] ciravāsissa mātuyā me bhante vadhena vā bandhena vā jāniyā vā garahāya vā jīvitassapi siyā aññathattaɱ, kmpana me nūppajjiyasnti soka-parideva-dukkha-domanass'-upāyāsāti.|| ||

Iminā pi kho etaɱ gāmaṇi pariyāyena veditabbaɱ yaɱ kiñci dukkhaɱ uppajjamānaɱ uppajjati sabbantaɱ chandamūlakaɱ chandanidānaɱ, chandohi mūlaɱ dukkhassāti.|| ||

 


Contact:
E-mail
Copyright Statement   Webmaster's Page