Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
IV. saḷāyatana Vagga:
42: Gamani Saɱyuttaɱ

Sutta 12

Rāsiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Atha kho Rāsiyo gāmaṇi yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Rāsiyo gāmaṇi Bhagavantaɱ etad avoca:|| ||

"Sutaɱ me taɱ bhante:|| ||

'Samaṇo gotamo sabbaɱ tapaɱ garahati,||
sabbaɱ tapassiɱ lūkhājīviɱ ekaɱsena upavadati upakkosatī' ti.|| ||

Ye te bhante evam āhaɱsu:|| ||

'Samaṇo gotamo sabbaɱ tapaɱ garahati,||
sabbaɱ tapassiɱ lukhajīviɱ ekaɱsena upavadati upakkosatī' ti,|| ||

kacci te bhante Bhagavato vuttavādino||
na ca Bhagavantaɱ abhūtena abbhācikkhanti,||
dhammānudhammaɱ vyākaronti,||
na ca koci sahadhammiko vādānupāto gārayhaɱ ṭhānaɱ āgacchatī" ti?|| ||

Ye te gāmaṇi evam āhaɱsu:|| ||

'Samaṇo gotamo sabbaɱ tapaɱ garahati,||
sabbaɱ tapassiɱ lukhajīviɱ ekaɱsena upavadati upakkosatī' ti,|| ||

na me te vuttavādino,||
abbhācikkhanti ca pana maɱ te asatā abhūtena.|| ||

1.

Dve me gāmaṇi antā pabbajitena na sevitabbā:|| ||

Yo cāyaɱ kāmesu kāmasukhallikānuyogo||
hīno||
gammo||
pothujjaniko||
anariyo||
anatthasaɱhito,|| ||

Yo cāyaɱ attakilamathānuyogo||
dukkho||
anariyo||
anatthasaɱhito,|| ||

ete te gāmaṇi ubho ante anupagamma majjhimā paṭipadā Tathāgatena abhi- [331] sambuddhā cakkhukaraṇī||
ñāṇakaraṇī||
upasamāya||
abhiññāya||
sambodhāya||
nibbānāya saɱvattati.|| ||

Katamā ca sā gāmaṇi majjhimā paṭipadā Tathāgatena abhisambuddhā cakkhukaraṇī||
ñāṇakaraṇī||
upasamāya||
abhiññāya||
sambodhāya||
nibbānāya saɱvattati,||
ayam eva ariyo aṭṭhaṅgiko maggo,||
seyyathīdaɱ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaɱ kho sā gāmaṇi majjhimā paṭipadā Tathāgatena abhisambuddhā cakkhukaraṇī||
ñāṇakaraṇī||
upasamāya||
abhiññāya||
sambodhāya||
nibbānāya saɱvattati.|| ||

2.

Tayo kho me gāmaṇi kāmabhogino santo saɱvijjamānā lokasmiɱ.|| ||

Katame tayo?|| ||

(i)

Idha gāmaṇi ekacco kāmabhogī||
adhammena bhoge pariyesati sāhasena||
adhammena bhoge pariyesitvā sāhasena||
na attānaɱ sukheti pīṇeti||
na saɱvibhajati||
na puññāni karoti.|| ||

(ii)

Idha gāmaṇi ekacco kāmabhogī||
adhammena bhoge pariyesati sāhasena||
adhammena bhoge pariyesitvā sāhasena||
attānaɱ sukheti pīṇeti||
na saɱvibhajati||
na puññāni karoti.|| ||

(iii)

Idha gāmaṇi ekacco kāmabhogī||
adhammena bhoge pariyesati sāhasena||
adhammena bhoge pariyesitvā sāhasena||
attānaɱ sukheti pīṇeti||
saɱvibhajati||
puññāni ca karoti.|| ||

(iv)

Idha pana gāmaṇi ekacco kāmabhogī||
dhammādhammena bhoge pariyesati sāhasena pi asāhasena pi,||
dhammādhammena bhoge pariyesitvā sāhasena pi asāhasena pi||
[332] na attānaɱ sukheti pīṇeti,||
na saɱvibhajati,||
na puññāni karoti.|| ||

(v)

Idha pana gāmaṇi ekacco kāmabhogī||
dhammādhammena bhoge pariyesati sāhasena pi asāhasena pi,||
dhammādhammena bhoge pariyesitvā sāhasena pi asāhasena pi||
attānaɱ sukheti pīṇeti||
na saɱvibhajati||
na puññāni karoti.|| ||

(vi)

Idha pana gāmaṇi ekacco kāmabhogī||
dhammādhammena bhoge pariyesati sāhasena pi asāhasena pi,||
dhammādhammena bhoge pariyesitvā sāhasena pi asāhasena pi||
attānaɱ sukheti pīṇeti||
saɱvibhajati||
puññāni ca karoti.|| ||

(vii)

Idha pana gāmaṇi ekacco kāmabhogī||
dhammena bhoge pariyesati asahasena,||
dhammena bhoge pariyesitvā asāhasena||
na attānaɱ sukheti pīṇeti||
na saɱvibhajati na puññāni karoti.|| ||

(viii)

Idha pana gāmaṇi ekacco kāmabhogī||
dhammena bhoge pariyesati asahasena,||
dhammena bhoge pariyesitvā asāhasena||
attānaɱ sukheti pīṇeti||
na saɱvibhajati||
na puññāni karoti.|| ||

(ix)

Idha pana gāmaṇi ekacco kāmabhogī||
dhammena bhoge pariyesati asahasena,||
dhammena bhoge pariyesitvā asāhasena||
attānaɱ sukheti pīṇeti||
saɱvibhajati||
puññāni ca karoti.|| ||

Te ca bhoge gathito,||
mucchito ajjhāpanno anādīnavadassāvī||
anissaraṇapañño paribhuñjati.|| ||

(x)

Idha pana gāmaṇi ekacco kāmabhogī||
dhammena bhoge pariyesati asahasena,||
dhammena bhoge pariyesitvā asāhasena||
[333]attānaɱ sukheti pīṇeti||
saɱvibhajati||
puññāni ca karoti.|| ||

Te ca bhoge agathito||
amucchito anajjhāpanno ādīnavadassāvī||
nissaraṇapaññe paribhuñjati.|| ||

3.

(i)

Tatra gāmaṇi yvāyaɱ kāmabhogī||
adhammena bhoge pariyesati sāhasena,||
adhammena bhoge pariyesitvā sāhasena||
na attānaɱ sukheti pīṇeti||
na saɱvibhajati||
na puññāni karoti,||
ayaɱ gāmaṇi kāmabhogī||
tīhi ṭhānehi gārayho.|| ||

Katamehi tīhi gārayho?|| ||

Adhammena bhoge pariyesati sāhasenāti||
iminā paṭhamena ṭhānena gārayho.|| ||

Na attānaɱ sukheti pīṇetīti||
iminā dutiyena ṭhānena gārayho.|| ||

Na saɱvibhajati||
na puññāni karotīti||
iminā tatiyena ṭhānena gārayho.|| ||

Ayaɱ gāmiṇī kāmabhogī||
imehi tīhi ṭhānehi gārayho.|| ||

(ii)

Tatra gāmaṇi yvāyaɱ kāmabhogī||
adhammena bhoge pariyesati sāhasena,||
adhammena bhoge pariyesitvā sāhasena||
attānaɱ sukheti pīṇeti||
na saɱvibhajati||
na puññāni karoti,||
ayaɱ gāmaṇi kāmabhogī||
dvīhi ṭhānehi gārayho||
ekena ṭhānena pāsaɱso.|| ||

Katamehi dvīhi ṭhānehi gārayho?|| ||

Adhammena bhoge pariyesati sāhasenāti||
iminā paṭhamena ṭhānena gārayho.|| ||

Na saɱvibhajati na puññāni karotīti||
iminā dutiyena ṭhānena gārayho.|| ||

Katamena ekena ṭhānena pāsaɱso?|| ||

Attānaɱ sukheti pīṇetī ti.|| ||

Iminā ekena ṭhānena pāsaɱso.|| ||

Ayaɱ gāmaṇī kāmabhogī||
imehi dvihī ṭhānehi gārayho,||
iminā ekena ṭhānena pāsaɱso.|| ||

(iii)

Tatra gāmaṇi yvāyaɱ kāmabhogī||
adhammena bhoge pariyesati sāhasena,||
adhammena bhoge pariyesitvā sāha- [334] sena||
attānaɱ sukheti pīṇeti||
saɱvibhajati||
puññāni karoti,||
ayaɱ gāmaṇi kāmabhogī||
ekena ṭhānena gārayho||
dvihi ṭhānehi pāsaɱso.|| ||

Katamena ekena ṭhānena gārayho?|| ||

Adhammena bhoge pariyesati sāhasenāti||
iminā ekena ṭhānena gārayho.|| ||

Katamehi dvīhi ṭhānehi pāsaɱso?|| ||

Attānaɱ sukheti pīṇetīti||
iminā paṭhamena ṭhānena pāsaɱso.|| ||

Saɱvibhajati puññāni karotīti||
iminā dutiyena ṭhānena pāsaɱso.|| ||

Ayaɱ gāmaṇi kāmabhogī||
iminā ekena ṭhānena gārayho.|| ||

Imehi dvīhi ṭhānehi pāsaɱso.|| ||

(iv)

Tatra gāmaṇī yvāyaɱ kāmabhogī||
dhammādhammena bhoge pariyesati||
sāhasena pi asāhasena pi||
dhammādhammena bhoge pariyesitvā||
sāhasena pi asāhasena pi||
na attānaɱ sukheti pīṇeti||
na saɱvibhajati||
na puññāni karoti||
ayaɱ gāmaṇi kāmabhogī||
ekena ṭhānehi pāsaɱso,||
tīhi ṭhānehi gārayho.|| ||

Katamehi ekena ṭhānehi pāsaɱso?|| ||

Dhammena bhoge pariyesati||
asāhasenāti||
iminā ekena ṭhānena pāsaɱso.|| ||

Katamehi tīhi ṭhānehi gārayho?|| ||

Adhammena bhoge pariyesati||
sāhasenāti||
iminā paṭhamena ṭhānena gārayho.|| ||

Na attānaɱ sukheti pīṇeti ti||
iminā dutiyena ṭhānena gārayho.|| ||

Na saɱvibhajati||
na puññāni karotī||
iminā tatiyena ṭhānena gārayho.|| ||

Ayaɱ gāmaṇi kāmabhogī||
imehi ekena ṭhānehi pāsaɱso,||
imehi tīhi ṭhānehi gārayho.|| ||

(v)

Tatra gāmaṇī yvāyaɱ kāmabhogī||
dhammādhammena bhoge pariyesati||
sāhasena pi asāhasena pi||
dhammādhammena bhoge pariyesitvā||
sāhasena pi asāhasena pi||
attānaɱ sukheti pīṇeti||
na saɱvibhajati||
na puññāni karoti,||
ayaɱ gāmaṇi kāmabhogī||
dvīhi ṭhānehi pāsaɱso,||
dvīhi ṭhānena gārayho.|| ||

Katamehi dvīhi ṭhānehi pāsaɱso?|| ||

Dhammena bhoge pariyesati asāhasenāti||
iminā paṭhamena ṭhānena pāsaɱso.|| ||

Attānaɱ sukheti pīṇetīti||
iminā dutiyena ṭhānena [335] pāsaɱso.|| ||

Katamehi dvīhi ṭhānehi gārayho?|| ||

Adhammena bhoge pariyesati||
sāhasenāti||
iminā paṭhamena ṭhānena gārayho.|| ||

Na saɱvibhajati||
na puññāni karoti||
imehi dutiyena ṭhānehi gārayho.|| ||

Ayaɱ gāmaṇi kāmabhogī||
imehi dvīhi ṭhānehi pāsaɱso,||
imehi dvīhi ṭhānehi gārayho.|| ||

(vi)

Tatra gāmaṇi yvāyaɱ kāmabhogī||
dhammādhammena bhoge pariyesati||
sāhasena pi asāhasena pi||
dhammādhammena bhoge pariyesitvā||
sāhasena pi asāhasena pi||
attānaɱ sukheti pīṇeti||
saɱvibhajati||
puññāni karoti,||
ayaɱ gāmaṇi kāmabhogī||
tīhi ṭhānehi pāsaɱso,||
ekena ṭhānena gārayho.|| ||

Katamehi tīhi ṭhānehi pāsaɱso?|| ||

Dhammena bhoge pariyesati asāhasenāti||
iminā paṭhamena ṭhānena pāsaɱso.|| ||

Attānaɱ sukheti pīṇetīti||
iminā dutiyena ṭhānena pāsaɱso.|| ||

Saɱvibhajati||
puññāni karoti,||
iminā tatiyena ṭhānena pāsaɱso.|| ||

Katamehi ekena ṭhānehi gārayho?|| ||

Adhammena bhoge pariyesati||
sāhasenāti||
iminā ekena ṭhānena gārayho.|| ||

Ayaɱ gāmaṇi kāmabhogī||
imehi tīhi ṭhānena pāsaɱso,||
iminā ekena ṭhānehi gārayho.|| ||

(vii)

Tatra gāmaṇi yvāyaɱ kāmabhogī||
dhammena bhoge pariyesati asāhasena,||
dhammena bhoge pariyesitvā asāhasena||
na attānaɱ sukheti pīṇeti||
na saɱvibhajati||
na puññāni karoti||
ayaɱ gāmaṇi kāmabhogī||
ekena ṭhānena pāsaɱso,||
dvīhi ṭhānehi gārayho.|| ||

Katamena ekena ṭhānena pāsaɱso?|| ||

Dhammena bhoge pariyesati asāhasenāti||
iminā ekena ṭhānena pāsaɱso.|| ||

Katamehi dvīhi ṭhānehi gārayho?|| ||

Na attānaɱ sukheti pīṇetīti||
iminā paṭhamena ṭhānena gārayho.|| ||

Na saɱvibhajati||
na puññāni karotīti||
iminā dutiyena ṭhānena gārayho.|| ||

Ayaɱ gāmaṇi kāmabhogī||
iminā ekena ṭhānena pāsaɱso,||
imehi dvīhi ṭhānehi gārayho.|| ||

(viii)

[336] Tatra gāmaṇi yvāyaɱ kāmabhogī||
dhammena bhoge pariyesati asāhasena,||
dhammena bhoge pariyesitvā asāhasena||
attānaɱ sukheti pīṇeti,||
na saɱvibhajati,||
na puññāni karoti,||
ayaɱ gāmaṇi kāmabhogī||
dvīhi ṭhānehi pāsaɱso,||
ekena ṭhānena gārayho.|| ||

Katamehi dvīhi ṭhānehi pāsaɱso?|| ||

Dhammena bhoge pariyesati asāhasenāti||
iminā paṭhamena ṭhānena pāsaɱso.|| ||

Attānaɱ sukheti pīṇetīti||
iminā dutiyena ṭhānena pāsaɱso.|| ||

Katamena ekena ṭhānena gārayho?|| ||

Na saɱvibhajati||
na puññāni karotīti||
iminā ekena ṭhānena gārayho.|| ||

Ayaɱ gāmaṇi kāmabhogī||
imehi dvīhi ṭhānehi pāsaɱso,||
iminā ekena ṭhānena gārayho.|| ||

(ix)

Tatra gāmaṇi yvāyaɱ kāmabhogī||
dhammena bhoge pariyesati asāhasena,||
dhammena bhoge pariyesitvā asāhasena||
attānaɱ sukheti pīṇeti||
saɱvibhajati||
puññāni karoti,||
te ca bhoge gathito||
mucchito||
ajjhāpanno||
anādīnavadassāvī||
anissaraṇapañño paribhuñjati,||
ayaɱ gāmaṇi kāmabhogī||
tīhi ṭhānehi pāsaɱso,||
ekena ṭhānena gārayho.|| ||

Katamehi tīhi ṭhānehi pāsaɱso?|| ||

Dhammena bhoge pariyesati asāhasenāti||
iminā paṭhamena ṭhānena pāsaɱso.|| ||

Attānaɱ sukheti pīṇetīti||
iminā dutiyena ṭhānena pāsaɱso.|| ||

Saɱvibhajati||
puññāni karotīti||
iminā tatiyena ṭhānena pāsaɱso.|| ||

Katamena ekena ṭhānena gārayho?|| ||

Te ca bhoge gathito||
mucchito||
ajjhāpanno||
anādīnavadassāvī||
anissaraṇapañño paribhuñjatīti||
iminā ekena ṭhānena gārayho.|| ||

Ayaɱ gāmaṇi kāmabhogī||
imehi tīhi ṭhānehi pāsaɱso,||
iminā ekena ṭhānena gārayho.|| ||

(ix)

Tatra gāmaṇi yvāyaɱ kāmabhogī||
dhammena bhoge pariyesati asāhasena,||
dhammena bhoge pariyesitvā asāhasena||
attānaɱ sukheti pīṇeti||
saɱvibhajati||
puññāni karoti,||
[337] te ca bhoge agathito||
amucchito||
anajjhāpanno||
ādīnavadassāvī||
nissaraṇa pañño paribhuñjati,||
ayaɱ gāmaṇi kāmabhogī||
catuhi ṭhānehi pāsaɱso.|| ||

Katamehi catuhi ṭhānehi pāsaɱso?|| ||

dhammena bhoge pariyesati asāhasenāti||
iminā paṭhamena ṭhānena pāsaɱso.|| ||

Attānaɱ sukheti pīṇetīti||
iminā dutiyena ṭhānena pāsaɱso.|| ||

Saɱvibhajati||
puññāni karotīti||
iminā tatiyena ṭhānena pāsaɱso.|| ||

Te ca bhoge agathito||
amucchito||
anajjhāpanno||
ādīnavadassāvī||
nissaraṇapañño||
paribhuñjatīti||
iminā catutthena ṭhānena pāsaɱso.|| ||

Ayaɱ gāmaṇi kāmabhogī||
imehi catuhi ṭhānehi pāsaɱso.|| ||

4.

Tayo me gāmaṇi tapassino lukhajīvino,||
santo saɱvijjamānā lokasmiɱ.|| ||

Katame tayo?|| ||

(i)

Idha gāmaṇi ekacco tapassī lukhajīvi saddhā||
Agārasmā anagāriyaɱ pabbajito hoti:|| ||

'Appeva nāma kusalaɱ dhammaɱ adhigaccheyyaɱ,||
appeva nāma uttari-manussa dhammā||
alam ariya-ñāṇa-dassana-visesaɱ sacchikareyyan" ti.|| ||

So attānaɱ ātāpeti paritāpeti,||
kusalañ ca dhammaɱ nādhigacchati,||
uttari-manussaɱ-dhammā||
alam ariya-ñāṇa-dassana-visesaɱ||
na sacchikaroti.|| ||

(ii)

Idha pana gāmaṇi ekacco tapassī lukhajīvī||
saddhā agārasmā anagāriyaɱ pabbajito hoti:|| ||

"Appeva nāma kusalaɱ dhammaɱ adhigaccheyyaɱ,||
appeva nāma uttari-manussa dhammā alam ariya-ñāṇa-dassana-visesaɱ sacchikareyyan" ti.|| ||

So attānaɱ ātāpeti paritāpeti,||
kusalañ ca kho dhammaɱ adhigacchati,||
uttariñ ca manussa-dhammā||
alam ariya-ñāṇa-dassana-visesaɱ||
na sacchikaroti.|| ||

(iii)

[338] Idha pana gāmaṇi ekacco tapassī lukhajīvī||
saddhā agārasmā anagāriyaɱ pabbajito hoti:|| ||

"Appeva nāma kusalaɱ dhammaɱ adhigaccheyyaɱ,||
appeva nāma uttari-manussadhammā||
alam ariya-ñāṇa-dassana-visesaɱ sacchikareyyan" ti.|| ||

So attānaɱ ātāpeti paritāpeti,||
kusalañ ca dhammaɱ adhigacchati,||
uttari-manussa-dhammā||
alam ariya-ñāṇa-dassana-visesaɱ sacchikaroti.|| ||

5.

(i)

Tatra gāmaṇi yvāyaɱ tapassī lukhajīvī||
attānaɱ ātāpeti paritāpeti,||
kusalañ ca dhammaɱ nādhigacchati,||
uttariñ ca manussa-dhammā||
alam ariya-ñāṇa-dassana-visesaɱ na sacchikaroti.|| ||

Ayaɱ gāmaṇi tapassī lukhajīvi||
tīhi ṭhānehi gārayho.|| ||

Katamehi tīhi ṭhānehi garayho?|| ||

Attānaɱ ātāpeti paritāpetīti||
iminā paṭhamena ṭhānena gārayho.|| ||

Kusalañ ca dhammaɱ nādhigacchatīti||
iminā dutiyena ṭhānena gārayho.|| ||

Uttariñ ca manussa-dhammā||
alam ariya-ñāṇa-dassana-visesaɱ na sacchikarotīti||
iminā tatiyena ṭhānena gārayho.|| ||

Ayaɱ gāmaṇi tapassī lukhajīvi||
imehi tīhi ṭhānehi gārayho.|| ||

(ii)

Tatra gāmaṇi yvāyaɱ tapassī lukhajīvī||
attānaɱ ātāpeti paritāpeti,||
kusalaɱ hi kho dhammaɱ adhigacchati,||
uttariñ ca manussa-dhammā||
alam ariya-ñāṇa-dassana-visesaɱ na sacchikaroti.|| ||

Ayaɱ gāmaṇī tapassī lukhajīvi||
dvīhi ṭhānehi gārayho,||
ekena ṭhānena pāsaɱso.|| ||

Katamehi dvīhi ṭhānehi gārayho?|| ||

Attānaɱ ātāpetaki paritāpetīti||
iminā paṭhamena ṭhānena gārayho.|| ||

Uttariñ ca manussa-dhammā||
alam ariya-ñāṇa-dassana-visesaɱ na sacchikarotīti||
iminā dutiyena ṭhānena gārayho.|| ||

Katamena ekena ṭhānena pāsaɱso?|| ||

Kusalaɱ hi kho dhammaɱ adhigacchatīti||
iminā ekena ṭhānena pāsaɱso.|| ||

Ayaɱ gāmaṇi tapassī lukhajīvī||
imehi dvīhi ṭhānehi gārayho,||
iminā ekena ṭhānena pāsaɱso.|| ||

(iii)

[339] Tatra gāmaṇi yvāyaɱ tapassī lukhajīvī||
attānaɱ ātāpeti paritāpeti,||
kusalañ ca dhammaɱ adhigacchati,||
uttariñ ca manussa-dhammā||
alam ariya-ñāṇa-dassana-visesaɱ sacchikaroti||
ayaɱ gāmaṇi, tapassī lukhajīvī||
erakena ṭhānena gārayho,||
dvīhi ṭhānehi pāsaɱso.|| ||

Katamena ekena ṭhānena garayho?|| ||

Attānaɱ ātāpeti paritāpetīti||
iminā ekena ṭhānena gārayho.|| ||

Katamehi dvīhi ṭhānehi pāsaɱso?|| ||

Kusalañ ca dhammaɱ adhigacchatīti||
iminā paṭhamena ṭhānena pāsaɱso.|| ||

Uttariñ ca manussa-dhammā||
alam ariya-ñāṇa-dassana-visesaɱ sacchikarotīti||
iminā dutiyena ṭhānena pāsaɱso.|| ||

Ayaɱ gāmaṇi tapassī lukhajīvī||
iminā ekena ṭhānena gārayho||
imehi dvīhi ṭhānehi pāsaɱso.|| ||

6.

Tisso imā gāmaṇi sandiṭṭhikā||
nijjarā||
akālikā||
ehipassikā||
opanayikā paccattaɱ||
veditabbā viññūhi.|| ||

Katamā tisso?|| ||

(i)

Yaɱ ratto rāgādhikaraṇaɱ attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti,||
rāge pahīne n'eva attavyābādhāya pi ceteti,||
na paravyābādhāya ceteti,||
na ubhayavyābādhāya ceteti||
sandiṭṭhikā||
nijjarā||
akālikā||
ehipassikā||
opanayikā paccattaɱ||
veditabbā viññūhi.|| ||

(ii)

Yaɱ duṭṭho dosādhikaraṇaɱ attavyābādhāya pi ceteti,||
paravyābādhāya pi ceteti,||
ubhayavyābādhāya pi ceteti||
dose pahīne n'eva attavyābādhaya pi ceteti,||
na paravyābādhāya ceteti,||
na ubhayavyābādhāya ceteti,||
sandiṭṭhikā [340] nijjarā||
akālikā||
ehipassikā||
opanayikā paccattaɱ||
veditabbā viññūhi.|| ||

(iii)

Yaɱ muḷho mohādhikaraṇaɱ attavyābādhāya pi ceteti||
paravyābādhāya pi ceteti,||
ubhayavyābādhāya pi ceteti,||
mehe pahīne n'eva attavyābādhāya pi ceteti,||
na paravyābādhāya ceteti,||
na ubhayavyābādhāya ceteti||
sandiṭṭhikā nijjarā||
akālikā||
ehipassikā||
opanayikā paccattaɱ||
veditabbā viññūhi.|| ||

Imā kho gāmaṇi tisso sandiṭṭhikā nijjarā||
akālikā||
ehipassikā||
opanayikā paccattaɱ||
veditabbā viññūhi" ti.|| ||

Evaɱ vutte Rāsiyo gāmaṇī Bhagavantaɱ etad avoca:|| ||

"Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭicchannaɱ vā vivareyya||
mūḷahassa vā maggaɱ ācikkheyya,||
andhakāre vā telapajjotaɱ dhāreyya||
'cakkhumanto rūpāni dakkhinti' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement   Webmaster's Page