Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
IV. Saḷāyatana Vagga
44. Avyākata Saŋyutta

Sutta 2

Anurādha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Tena kho pana samayena āyasmā Anurādho Bhagavato avidūre araññakuṭikāyaɱ viharati.|| ||

Atha kho sambahulā aññatitthiyā paribbājakā yenāyasmā Anurādho ten'upasaŋkamiɱsu.|| ||

Upasaŋkamitvā āyasmatā Anurādhena saddhiɱ sammodiɱsu.|| ||

Sammodaniyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinno kho te aññatitthiyā paribbājakā āyasmantaɱ Anurādhaɱ etad avocuɱ:|| ||

"Yo so āvuso Anurādha, Tathāgato uttamapuriso paramapuriso paramapattippatto,||
taɱ Tathāgato imesu catusu ṭhānesu paññāpayamāno paññāpeti:|| ||

'Hoti Tathāgato param maraṇā' vā.|| ||

'Na hoti Tathāgato param maraṇā' ti vā.|| ||

'Hoti ca na ca hoti Tathāgato param maraṇā' ti vā.|| ||

'N'eva hoti na na hoti Tathāgato param maraṇā' ti vā" ti.|| ||

"Yo so āvuso Tathāgato uttamapuriso paramapuriso paramapattippatto,||
taɱ Tathāgato aññatra imehi catuhi ṭhānehi paññāpayamāno paññāpeti:|| ||

'Hoti Tathāgato param maraṇā' vā.|| ||

'Na hoti Tathāgato param maraṇā' ti vā.|| ||

'Hoti ca na ca hoti Tathāgato param maraṇā' ti vā.|| ||

'N'eva hoti na na hoti Tathāgato param maraṇā' ti vā" ti.|| ||

Evaɱ vutte aññatitthiyā paribbājakā āyasmantaɱ Anurādhaɱ etad avocuɱ:|| ||

"So cāyaɱ bhikkhu navo bhavissati acirapabbajito,||
thero vā pana bālo avyatto" ti.|| ||

Atha te aññatitthiyā paribbājanakā āyasmantaɱ Anurādhaɱ nava vādena ca bālavādena ca apasādetvā uṭṭhāy āsanā pakkamiɱsu.|| ||

[381] Atha kho āyasmato Anurādhassa acirapakkantesu tesu aññatitthiyesu paribbājakesu etad ahosi:|| ||

"Sa ce kho maɱ te aññatitthiyā paribbājakā uttariɱ puccheyyuɱ.|| ||

Kathaɱ vyākaramāno nu khvāhaɱ tesaɱ aññatitthiyānaɱ paribbājakānaɱ vuttavādī c'eva Bhagavato assaɱ,||
na ca Bhagavantaɱ abhūtena abbhācikkheyyaɱ,||
Dhammassa cānudhammaɱ vyākareyyaɱ.|| ||

Na ca koci sahadhammiko vādānuvādo gārayhaɱ ṭhānaɱ āgaccheyyā" ti.|| ||

Atha kho āyasmā Anurādho yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Anurādho Bhagavantaɱ etad avoca:|| ||

Idhāhaɱ bhante, Bhagavato avidūre araññakuṭikāyaɱ viharāmi,||
atha kho bhante sambahulā aññatitthiyā paribbājakā yenāhaɱ ten'upasaŋkamiɱsu.|| ||

Upasaŋkamitvā mama saddhiɱ sammodiɱsu,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinnā kho bhante aññatitthiyā paribbājakā maɱ etad avocuɱ:|| ||

"Yo so āvuso Anurādha, Tathāgato uttamapuriso paramapuriso paramapattippatto,||
taɱ Tathāgato imesu catusu ṭhānesu paññāpayamāno paññāpeti:|| ||

'Hoti Tathāgato param maraṇā' vā.|| ||

'Na hoti Tathāgato param maraṇā' ti vā.|| ||

'Hoti ca na ca hoti Tathāgato param maraṇā' ti vā.|| ||

'N'eva hoti na na hoti Tathāgato param maraṇā' ti vā" ti.|| ||

Evam vutto ham bhante te aññatitthiye paribbājake etad avocaɱ:|| ||

"Yo so āvuso Tathāgato uttamapuriso paramapuriso paramapattippatto,||
taɱ Tathāgato aññatra imehi catuhi ṭhānehi paññāpayamāno paññāpeti:|| ||

'Hoti Tathāgato param maraṇā' vā.|| ||

'Na hoti Tathāgato param maraṇā' ti vā.|| ||

'Hoti ca na ca hoti Tathāgato param maraṇā' ti vā.|| ||

'N'eva hoti na na hoti Tathāgato param maraṇā' ti vā" ti.|| ||

Evaɱ vutte aññatitthiyā paribbājakā āyasmantaɱ Anurādhaɱ etad avocuɱ:|| ||

"So cāyaɱ bhikkhu navo bhavissati acirapabbajito,||
thero vā pana bālo avyatto" ti.|| ||

Atha kho mam bhante te aññatitthiyā paribbājanakā āyasmantaɱ nava vādena ca bālavādena ca apasādetvā uṭṭhāy āsanā pakkamiɱsu.|| ||

Tassa mayham bhante acirapakkantesu tesu aññatitthi- [382] yesu paribbājakesu etad ahosi:|| ||

"Sa ce kho maɱ te aññatitthiyā paribbājakā uttariɱ puccheyyuɱ.|| ||

Kathaɱ vyākaramāno nu khvāhaɱ tesaɱ aññatitthiyānaɱ paribbājakānaɱ vuttavādī c'eva Bhagavato assaɱ,||
na ca Bhagavantaɱ abhūtena abbhācikkheyyaɱ,||
Dhammassa cānudhammaɱ vyākareyyaɱ.|| ||

Na ca koci sahadhammiko vādānuvādo gārayhaɱ ṭhānaɱ āgaccheyyā" ti.|| ||

 


 

"Taɱ kim maññasi Anurādha?|| ||

Rūpaɱ niccaɱ vā aniccaɱ vā" ti?|| ||

"Aniccaɱ bhante".|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ:|| ||

'Etaɱ mama,||
eso'hamasmi,||
eso me attā" ti?"|| ||

"No h'etaɱ bhante."|| ||

"Vedanā niccaɱ vā aniccaɱ vā" ti?|| ||

"Aniccaɱ bhante".|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ:|| ||

'Etaɱ mama,||
eso'hamasmi,||
eso me attā" ti?"|| ||

"No h'etaɱ bhante."|| ||

"Saññā niccaɱ vā aniccaɱ vā" ti?|| ||

"Aniccaɱ bhante".|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ:|| ||

'Etaɱ mama,||
eso'hamasmi,||
eso me attā" ti?"|| ||

"No h'etaɱ bhante."|| ||

"Sankhārā niccaɱ vā aniccaɱ vā" ti?|| ||

"Aniccaɱ bhante".|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ:|| ||

'Etaɱ mama,||
eso'hamasmi,||
eso me attā" ti?"|| ||

"No h'etaɱ bhante."|| ||

"Viññāṇaɱ niccaɱ vā aniccaɱ vā" ti?|| ||

"Aniccaɱ bhante".|| ||

"Yaɱ panāniccaɱ dukkhaɱ vā taɱ sukhaɱ vā" ti?|| ||

"Dukkhaɱ bhante."|| ||

"Yaɱ panāniccaɱ dukkhaɱ vipariṇāmadhammaɱ kallannu taɱ samanupassituɱ:|| ||

'Etaɱ mama,||
eso'hamasmi,||
eso me attā" ti?"|| ||

"No h'etaɱ bhante."|| ||

"Tasmāt iha Anurādha, yaɱ kiñcirūpaɱ atītānāgata paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
sabbaɱ rūpaɱ:|| ||

'N'etaɱ mama,||
neso ham asmi,||
na me so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci vedanā atītānāgata paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
sabbaɱ vedanaɱ:|| ||

'N'etaɱ mama,||
neso ham asmi,||
na me so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yā kāci saññā atītānāgata paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
sabbaɱ saññā:|| ||

'N'etaɱ mama,||
neso ham asmi,||
na me so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Ye keci sankhārā atītānāgata paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
sabbaɱ sankhārā:|| ||

'N'etaɱ mama,||
neso ham asmi,||
na me so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Yaɱ kiñci viññāṇaɱ atītānāgata paccuppannaɱ||
ajjhattaɱ vā bahiddhā vā||
oḷārikaɱ vā sukhumaɱ vā||
hīnaɱ vā paṇītaɱ vā||
yaɱ dūre santike vā,||
sabbaɱ viññāṇaɱ:|| ||

'N'etaɱ mama,||
neso ham asmi,||
[383] na me so attā' ti.|| ||

Evam etaɱ yathābhūtaɱ sammappaññāya daṭṭhabbaɱ.|| ||

Evaɱ passaɱ Anurādha, sutavā ariyasāvako||
rūpasmim pi nibbindati,||
vedanāya pi nibbindati,||
saññāya pi nibbindati,||
sankhāresu pi nibbindati,||
viññāṇasmim pi nibbindati,||
nibbindaɱ virajjati.|| ||

Virāgā vimuccati vimuttasmiɱ vimuttamiti ñāṇaɱ hoti.|| ||

Khīṇā jāti||
Vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyāti pajānāti.|| ||

"Taɱ kiɱ maññasi Anurādha?|| ||

'Rūpaɱ Tathāgato' ti||
samanupassasī" ti?|| ||

"No h'etaɱ bhante."|| ||

"'Vedanaɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Saññaɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Sankhāre Tathāgato'||
ti samanupassasī" ti?|| ||

"No h'etaɱ bhante."|| ||

"'Viññāṇaɱ Tathāgato'||
ti samanupassasī" ti?|| ||

"No h'etaɱ bhante."|| ||

"Taɱ kiɱ maññasi Anurādha?|| ||

'Rūpasmiɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Aññatra rūpā Tathāgato'||
ti samanupassasī" ti?|| ||

"No h'etaɱ bhante."|| ||

"'Vedanāya Tathāgato'||
ti samanupassasī" ti?|| ||

"No h'etaɱ bhante."|| ||

"'Aññatra vedanāya Tathāgato'||
ti samanupassasī" ti?|| ||

"No h'etaɱ bhante."|| ||

"'Saññāya Tathāgato'||
ti samanupassasī" ti?|| ||

"No h'etaɱ bhante."|| ||

"'Aññatra saññāya Tathāgato'||
ti samanupassasī" ti?|| ||

"No h'etaɱ bhante."|| ||

"'Sankhāresu Tathāgato'||
ti samanupassasī" ti?|| ||

"No h'etaɱ bhante."|| ||

"'Aññatra sankhārehi Tathāgato'||
ti samanupassasī" ti?|| ||

"No h'etaɱ bhante."|| ||

"'Viññāṇasmiɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Aññatra viññāṇā Tathāgato'||
ti samanupassasī" ti?|| ||

"No h'etaɱ bhante."|| ||

"Taɱ kiɱ maññasi Anurādha?|| ||

Rūpaɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Vedanaɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Saññaɱ Tathāgato'||
ti samanupassasī" ti?|| ||

"No h'etaɱ bhante."|| ||

"'Sankhāre Tathāgato'||
ti samanupassasī" ti?|| ||

"No h'etaɱ bhante."|| ||

"'Viññāṇaɱ Tathāgato'||
ti samanupassasī" ti?|| ||

[384] "No h'etaɱ bhante."|| ||

"Taɱ kiɱ maññasi Anurādha?|| ||

Ayaɱ so arūpī||
avedano||
asaññī||
asankhāro||
aviññāṇo Tathāgato'||
ti samanupassasī" ti?|| ||

"No h'etaɱ bhante."|| ||

"Ettha te Anurādha, diṭṭhe va dhamme saccato thetato.|| ||

Tathāgate anupalabbhiyamāne Kallannu te taɱ vyākaraṇāya:. "Yo so āvuso Tathāgato uttamapuriso paramapuriso paramapattipatto, taɱ Tathāgato aññatiramehi catūhi ṭhānehi paññāpayamāno paññāpeti.|| ||

Hoti Tathāgato param maraṇāti vā na hoti Tathāgato param maraṇāti vā hoti ca na ca hoti Tathāgato param maraṇāti vā n'eva hoti na na hoti Tathāgato param maraṇāti vā" ti?|| ||

No h'etaɱ bhante|| ||

Sādhu sādhu Anurādha, pubbe cāhaɱ Anurādha, etarahi ca dukkhañc'eva paññāpemi dukkhassa ca nirodhanti.|| ||

 


Contact:
E-mail
Copyright Statement   Webmaster's Page