Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
IV. saḷāyatana Vagga
44. Avyākatasaŋyutta

Sutta 7

Moggalāna (or Āyatana) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Atha kho Vacchagotto paribbājako yenāyasmā Mahā Moggallāno ten'upasaŋkami,||
upasaŋkamitvā āyasmatā Mahā Moggallānena saddhiɱ sammodi,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdi,||
eka-m-antaɱ nisinno kho Vacchagotto paribbājako āyasmantaɱ Mahā Moggallānaɱ etad avoca:|| ||

"Kiɱ nu kho bho Moggallāna, sassato loko" ti?|| ||

"Avyākataɱ kho etaɱ Vaccha mayā:||
'sassato loko'" ti.|| ||

"Kiɱ pana bho Moggallāna, asassato loko" ti?|| ||

"Etam pi kho Vaccha, avyākataɱ mayā:||
'asassato loko'" ti.|| ||

"Kin nu kho bho Moggallāna, antavā loko" ti?|| ||

"Avyākataɱ kho etaɱ Vaccha mayā:||
'antavā loko'" ti.|| ||

"Kiɱ pana bho Moggallāna, anantavā loko" ti?|| ||

"Etam pi kho Vaccha, avyākataɱ mayā:||
'anantavā loko'" ti.|| ||

[392] "Kiɱ nu kho bho Moggallāna, taɱ jīvaɱ taɱ sarīran" ti?|| ||

"Avyākataɱ kho etaɱ Vaccha, mayā:||
'taɱ jīvaɱ taɱ sarīran'" ti.|| ||

"Kiɱ pana bho Moggallāna, aññaɱ jīvaɱ aññaɱ sarīran" ti?|| ||

"Etam pi kho Vaccha, avyākataɱ Bhagavatā: "aññaɱ jīvaɱ aññaɱ sarīran" ti.|| ||

"Kin nu kho bho Moggallāna, hoti Tathāgato param maraṇā" ti?|| ||

"Avyākataɱ kho etaɱ Vaccha mayā:||
'hoti Tathāgato param maraṇā'" ti.|| ||

"Kiɱ pana bho Moggallāna, na hoti Tathāgato param maraṇā" ti?|| ||

"Etam pi kho Vaccha, avyākataɱ mayā:||
'na hoti Tathāgato param maraṇā'" ti.|| ||

"Kin nu kho Moggallāna, hoti ca na ca hoti Tathāgato param maraṇā" ti?|| ||

"Avyākataɱ kho etaɱ Vaccha, mayā:||
'hoti ca na ca hoti Tathāgato param maraṇā'" ti.|| ||

"Kiɱ pana bho Moggallāna, n'eva hoti na na hoti Tathāgato param maraṇā" ti?|| ||

"Etam pi kho Vaccha, avyākataɱ mayā:||
'n'eva hoti na na hoti Tathāgato param maraṇā'" ti.|| ||

 


 

"Ko nu kho bho Moggallāna, hetu||
ko paccayo||
yena aññatitthiyānaɱ paribbājakānaɱ evaɱ puṭṭhānaɱ evaɱ vyākaraṇaɱ hoti:|| ||

'Sassato loko' ti vā,||
'asassato loko' ti vā||
'antavā loko' ti vā,||
'anantavā loko' ti vā,||
'taɱ jīvaɱ taɱ sarīranas' ti vā||
'aññaɱ jīvaɱ aññaɱ sarīran' ti vā,||
'hoti Tathāgato param maraṇā' ti vā,||
'na hoti Tathāgato param maraṇā' ti vā,||
'hoti ca na ca hoti Tathāgato param maraṇā' ti vā,||
'n'eva hoti na na hoti Tathāgato param maraṇā' ti" vā?|| ||

[393] Ko pana bho Moggallāna, hetu||
ko paccayo||
yena samaṇassa Gotamassa evaɱ puṭṭhassa na evaɱ vyākaraṇaɱ hoti:|| ||

'sassato loko'ti pi,||
'asassato loko'ti pi,||
'antavā loko' ti pi,||
'anantavā loko' ti pi,||
'taɱ jīvaɱ taɱ sarīran' ti pi,||
'aññaɱ jīvaɱ aññaɱ sarīran' ti pi,||
'hoti Tathāgato param maraṇā' ti pi,||
'na hoti Tathāgato param maraṇā' ti pi,||
'hoti ca na ca hoti Tathāgato param maraṇā' ti pi,||
'n'eva hoti na na hoti Tathāgato param maraṇā' ti pi" ti?|| ||

"Aññatitthiyā kho Vaccha, paribbājakā cakkhuɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Sotaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Ghānaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Jivhaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Kāyaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Manaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Tasmā aññatitthiyānaɱ paribbājakānaɱ evaɱ puṭṭhānaɱ evaɱ vyākaraṇaɱ hoti:|| ||

'Sassato loko' ti vā,||
'asassato loko' ti vā||
'antavā loko' ti vā,||
'anantavā loko' ti vā,||
'taɱ jīvaɱ taɱ sarīranas' ti vā||
'aññaɱ jīvaɱ aññaɱ sarīran' ti vā,||
'hoti Tathāgato param maraṇā' ti vā,||
'na hoti Tathāgato param maraṇā' ti vā,||
'hoti ca na ca hoti Tathāgato param maraṇā' ti vā,||
'n'eva hoti na na hoti Tathāgato param maraṇā' ti" vā.|| ||

Tathāgato ca kho Vaccha,||
arahaɱ||
Sammā-sambuddho cakkhuɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Sotaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Ghānaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Jivhaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Kāyaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Manaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Tasmā Tathāgatassa evaɱ puṭṭhassa na evaɱ vyākaraṇaɱ hoti:|| ||

'Sassato loko'ti pi,||
'asassato loko'ti pi,||
'antavā loko' ti pi,||
'anantavā loko' ti pi,||
'taɱ jīvaɱ taɱ sarīran' ti pi,||
'aññaɱ jīvaɱ aññaɱ sarīran' ti pi,||
'hoti Tathāgato param maraṇā' ti pi,||
'na hoti Tathāgato param maraṇā' ti pi,||
'hoti ca na ca hoti Tathāgato param maraṇā' ti pi,||
'n'eva hoti na na hoti Tathāgato param maraṇā' ti pi" ti.|| ||

 


 

Atha kho Vacchagotto paribbājako uṭṭhāy āsanā yena Bhagavā ten'upasaŋkami,||
upasaŋkamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vītisāratvā eka-m-antaɱ nisīdi.|| ||

Eka-m-antaɱ nisinno kho Vacchagotto paribbājako Bhagavantaɱ etad avoca:|| ||

"Kiɱ nu kho bho Gotama, sassato loko" ti?|| ||

"Avyākataɱ kho etaɱ Vaccha mayā:||
'sassato loko'" ti.|| ||

"Kiɱ pana bho Gotama, asassato loko" ti?|| ||

"Etam pi kho Vaccha, avyākataɱ mayā:||
'asassato loko'" ti.|| ||

"Kin nu kho bho Gotama, antavā loko" ti?|| ||

"Avyākataɱ kho etaɱ Vaccha mayā:||
'antavā loko'" ti.|| ||

"Kiɱ pana bho Gotama, anantavā loko" ti?|| ||

"Etam pi kho Vaccha, avyākataɱ mayā:||
'anantavā loko'" ti.|| ||

"Kiɱ nu kho bho Gotama, taɱ jīvaɱ taɱ sarīran" ti?|| ||

"Avyākataɱ kho etaɱ Vaccha, mayā:||
'taɱ jīvaɱ taɱ sarīran'" ti.|| ||

"Kiɱ pana bho Gotama, aññaɱ jīvaɱ aññaɱ sarīran" ti?|| ||

"Etam pi kho Vaccha, avyākataɱ Bhagavatā: "aññaɱ jīvaɱ aññaɱ sarīran" ti.|| ||

"Kin nu kho bho Gotama, hoti Tathāgato param maraṇā" ti?|| ||

"Avyākataɱ kho etaɱ Vaccha mayā:||
'hoti Tathāgato param maraṇā'" ti.|| ||

"Kiɱ pana bho Gotama, na hoti Tathāgato param maraṇā" ti?|| ||

"Etam pi kho Vaccha, avyākataɱ mayā:||
'na hoti Tathāgato param maraṇā'" ti.|| ||

"Kin nu kho Gotama, hoti ca na ca hoti Tathāgato param maraṇā" ti?|| ||

"Avyākataɱ kho etaɱ Vaccha, mayā:||
'hoti ca na ca hoti Tathāgato param maraṇā'" ti.|| ||

"Kiɱ pana bho Gotama, n'eva hoti na na hoti Tathāgato param maraṇā" ti?|| ||

"Etam pi kho Vaccha, avyākataɱ mayā:||
'n'eva hoti na na hoti Tathāgato param maraṇā'" ti.|| ||

 


 

"Ko nu kho bho Gotama, hetu||
ko paccayo||
yena aññatitthiyānaɱ paribbājakānaɱ evaɱ puṭṭhānaɱ evaɱ vyākaraṇaɱ hoti:|| ||

'Sassato loko' ti vā,||
'asassato loko' ti vā||
'antavā loko' ti vā,||
'anantavā loko' ti vā,||
'taɱ jīvaɱ taɱ sarīranas' ti vā||
'aññaɱ jīvaɱ aññaɱ sarīran' ti vā,||
'hoti Tathāgato param maraṇā' ti vā,||
'na hoti Tathāgato param maraṇā' ti vā,||
'hoti ca na ca hoti Tathāgato param maraṇā' ti vā,||
'n'eva hoti na na hoti Tathāgato param maraṇā' ti" vā?|| ||

[394] Ko pana bho Gotama, hetu||
ko paccayo||
yena bhoto Gotamassa evaɱ puṭṭhassa na evaɱ vyākaraṇaɱ hoti:|| ||

'sassato loko' ti pi,||
'asassato loko' ti pi,||
'antavā loko' ti pi,||
'anantavā loko' ti pi,||
'taɱ jīvaɱ taɱ sarīran' ti pi,||
'aññaɱ jīvaɱ aññaɱ sarīran' ti pi,||
'hoti Tathāgato param maraṇā' ti pi,||
'na hoti Tathāgato param maraṇā' ti pi,||
'hoti ca na ca hoti Tathāgato param maraṇā' ti pi,||
'n'eva hoti na na hoti Tathāgato param maraṇā' ti pi" ti?|| ||

"Aññatitthiyā kho Vaccha, paribbājakā cakkhuɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Sotaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Ghānaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Jivhaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Kāyaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Manaɱ:||
'etaɱ mama,||
eso'hamasmi,||
eso me attā' ti||
samanupassanti.|| ||

Tasmā aññatitthiyānaɱ paribbājakānaɱ evaɱ puṭṭhānaɱ evaɱ vyākaraṇaɱ hoti:|| ||

'Sassato loko' ti vā,||
'asassato loko' ti vā||
'antavā loko' ti vā,||
'anantavā loko' ti vā,||
'taɱ jīvaɱ taɱ sarīranas' ti vā||
'aññaɱ jīvaɱ aññaɱ sarīran' ti vā,||
'hoti Tathāgato param maraṇā' ti vā,||
'na hoti Tathāgato param maraṇā' ti vā,||
'hoti ca na ca hoti Tathāgato param maraṇā' ti vā,||
'n'eva hoti na na hoti Tathāgato param maraṇā' ti" vā.|| ||

Tathāgato ca kho Vaccha,||
arahaɱ||
Sammā-sambuddho cakkhuɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Sotaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Ghānaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Jivhaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Kāyaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Manaɱ:|| ||

'n'etaɱ mama,||
neso'hamasmi,||
na me so attā' ti||
samanupassati.|| ||

Tasmā Tathāgatassa evaɱ puṭṭhassa na evaɱ vyākaraṇaɱ hoti:|| ||

'Sassato loko' ti pi,||
'asassato loko' ti pi,||
'antavā loko' ti pi,||
'anantavā loko' ti pi,||
'taɱ jīvaɱ taɱ sarīran' ti pi,||
'aññaɱ jīvaɱ aññaɱ sarīran' ti pi,||
'hoti Tathāgato param maraṇā' ti pi,||
'na hoti Tathāgato param maraṇā' ti pi,||
'hoti ca na ca hoti Tathāgato param maraṇā' ti pi,||
'n'eva hoti na na hoti Tathāgato param maraṇā' ti pi" ti.|| ||

"Acchariyaɱ bho Gotama,||
abbhutaɱ bho Gotama,||
yatra hi nāma satthussa ca sāvakassa ca atthenattho vyañjanena vyañjanaɱ saɱsandissati samessati na vihāyissati yad idaɱ aggapadasmiɱ.|| ||

Idānāhaɱ bho Gotama, samaṇaɱ Moggallānaɱ [395] upasaŋkamitvā etam atthaɱ āpucchiɱ,||
samaṇo pi me Moggallāno etehi padehi etehi vyañjanehi etam atthaɱ vyākāsi seyyathā pi bhavaɱ Gotamo.|| ||

Acchariyaɱ bho Gotama,||
abbhutaɱ bho Gotama,||
yatra hi nāma satthussa ca sāvakassa ca atthenattho vyañjanena vyañjanaɱ saɱsandissati samessati na vihāyissati yad idaɱ aggapadasmin" ti.|| ||

 


Contact:
E-mail
Copyright Statement   Webmaster's Page