Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
IV. saḷāyatana Vagga
44. Avyākatasaŋyutta

Sutta 9

Kutūhalasālā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ:|| ||

Atha kho Vacchagotto paribbājako yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Vacchagotto paribbājako Bhagavantaɱ etad avoca:|| ||

"Purimāni bho Gotama divasāni purimatarāni sambahulānaɱ nānātitthiyaɱ.|| ||

Samaṇabrāhmaṇaɱ paribbājakānaɱ kutūhalasālāyaɱ sannisinnānaɱ sannipatitānaɱ ayamantarā kathā udapādi.|| ||

'Ayaɱ kho Pūraṇo Kassapo saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam pi kho Makkhali-Gosālo saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ [399] kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam Nigaṇṭho Nātaputto saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam pi kho Sañjayo Bellaṭṭhiputto saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam pi kho Pakudho Kaccāyano saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam pi kho Ajito Kesakambalo saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo pissa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno,||
asu amutra uppanno" ti.|| ||

Ayam pi kho Samaṇo Gotamo saŋhī c'eva gaṇī ca||
gaṇācariyo ca||
ñāto yayassi titthakaro sādhu sammato bahujanassa||
so pi sāvakaɱ abbhatītaɱ kālakataɱ uppattisu vyākaroti:|| ||

"Asu amutra uppanno||
asu amutra uppanno" ti.|| ||

Yo ca khvassa sāvako uttamapuriso paramapuriso paramapattipatto,||
tam pi sāvakaɱ abbhatītaɱ kālakataɱ uppattisu na vyākaroti:|| ||

'Asu amutra uppanno,||
asu amutra uppanno' ti.|| ||

Api ca kho naɱ evaɱ vyākaroti:|| ||

'Acchejji taṇhaɱ vivattayi saññojanaɱ sammā mānābhisamayā antam akāsi dukkhassā' ti.|| ||

Tassa mayhaɱ bho Gotama ahud eva kaŋkhā ahu vicikicchā|| ||

'Kathannāma Samaṇassa Gotamassa dhammābhiññeyya'" ti?|| ||

"Alaɱ hi te Vaccha,||
kaŋkhituɱ alaɱ vicikicchituɱ,||
kaŋkhanīye ca pana te ṭhāne vicikicchā uppannā.|| ||

Saupādānassa khvāhaɱ Vaccha uppattiɱ paññāpemi,||
no anupādānassa.|| ||

Seyyathā pi Vaccha, aghi saupādāno jalati,||
no anupādāno.|| ||

Evam eva khvāhaɱ Vaccha saupādānassa uppattiɱ paññāpemi,||
no anupādānassā" ti.|| ||

"Yasmiɱ pana bho Gotama samaye acchi vātena khittā duram pi gacchati,||
imassa pana bhavaɱ Gotamo kiɱ upādānasmiɱ paññāpetī" ti?|| ||

"Yasmiɱ Vaccha samaye acci vātena khittā duram pi gacchati,||
tam ahaɱ vātupādānaɱ vadāmi||
vāto hi'ssa Vaccha tasmiɱ samaye upādānaɱ hotī" ti.|| ||

[400] Yasmiñ ca pana bho Gotama, samaye imañ ca kāyaɱ nikkhipati,||
satto ca aññataraɱ kāyaɱ anuppanno hoti,||
imassa pana bhavaɱ Gotamo kiɱ upādānasmiɱ paññāpe" ti?|| ||

Yasmiɱ kho Vaccha samaye imañ ca kāyaɱ nikkhipati,||
satto ca aññataraɱ kāyaɱ anuppanno hoti,||
tam ahaɱ taṇhūpādānaɱ vadāmi||
taṇhā hi'ssa Vaccha tasmiɱ samaye upādānaɱ hotī" ti.|| ||

 


Contact:
E-mail
Copyright Statement   Webmaster's Page